Nɔ Hewɔ ni Wɔkuɔ Wɔsɛɛ Wɔyaa Shii Abɔ
1. Mɛɛ sane wɔshiɛmɔ nitsumɔ lɛ haa abiɔ?
1 Yɛ hei babaoo lɛ, wɔtsuɔ wɔshikpɔŋkuku lɛ mli nii wɔgbeɔ naa yɛ be kɛ beaŋ. Wɔkuɔ wɔsɛɛ kɛyaa shĩa kometoo lɛ nɔŋŋ mli shii abɔ, eyɛ mli akɛ ekolɛ shiatsɛ lɛ ekɛɛ wɔ akɛ ebɛ wiemɔ lɛ he miishɛɛ. Mɛni hewɔ wɔkuɔ wɔsɛɛ wɔkɛ mɛi ní tseee amɛhiɛ amɛhaaa wɔ lɛ yagbaa sane ekoŋŋ lɛ?
2. Mɛni ji yiŋtoo titri hewɔ ni wɔyaa nɔ wɔshiɛɔ lɛ?
2 Suɔmɔ Kɛha Yehowa kɛ Gbɔmɛi: Suɔmɔ ni wɔyɔɔ kɛha Yehowa lɛ ji yiŋtoo titri hewɔ ni wɔyaa nɔ wɔshiɛɔ lɛ. Wɔtsuii tsirɛɔ wɔ koni wɔya nɔ wɔgba wɔ-Nyɔŋmɔ kpeteŋkpele lɛ he sane wɔtsɔɔ mɛi krokomɛi. (Luka 6:45) Suɔmɔ ni wɔyɔɔ kɛha Yehowa lɛ tsirɛɔ wɔ koni wɔbo efamɔi lɛ atoi, ní wɔye wɔbua mɛi krokomɛi ni amɛhu amɛfee nakai nɔŋŋ. (Abɛi 27:11; 1 Yoh. 5:3) Anɔkwayeli mli ni wɔɔjɛ wɔŋmɛ wɔtsui shi yɛ nitsumɔ nɛɛ mli lɛ damɔɔɔ bɔ ni mɛi lɛ baabo wɔ toi amɛha lɛ nɔ. Beni awaa klɛŋklɛŋ afii 100 lɛ mli Kristofoi lɛ ayi po lɛ, amɛtee nɔ amɛshiɛ “ni amɛfɔ̃ɔɔ.” (Bɔf. 5:42) Yɛ nɔ najiaŋ ni wɔɔha sane lɛ toi ni mɛi booo lɛ aje wɔnijiaŋ wui lɛ, wɔkɛ ekãa yaa nɔ wɔshiɛɔ, ni wɔkɛ nakai feemɔ tsɔɔ bɔ ni suɔmɔ ni wɔyɔɔ kɛha Yehowa, kɛ bɔ ni wɔtuu wɔhe wɔha lɛ lɛ mli wa ha.
3. Mɛɛ gbɛ nɔ suɔmɔ ni wɔyɔɔ kɛha mɛi krokomɛi lɛ baaye abua wɔ koni wɔyanɔ wɔshiɛ?
3 Wɔyaa nɔ wɔshiɛɔ hu ejaakɛ wɔsumɔɔ wɔnanemɛi. (Luka 10:27) Yehowa sumɔɔɔ ni mɔ ko hiɛ akpata. (2 Pet. 3:9) Yɛ shikpɔŋkukuji ní afɔɔ shiɛmɔ yɛ mli lɛ po amli lɛ, wɔkɛ mɛi kpeɔ ní amɛmiisumɔ ni amɛsɔmɔ Yehowa. Ákɛ nɔkwɛmɔnɔ lɛ, yɛ Guadeloupe lɛ, mɛi 56 fɛɛ mɛi 56 mli 1 ji Yehowa Odasefonyo, shi abaptisi mɛi 214 nyɛsɛɛ afi lɛ. Mɛi aaashɛ 20,000 tee Kaimɔ lɛ, ni tsɔɔ akɛ mɛi 22 fɛɛ mɛi 22 mli 1 ni yɔɔ Guadeloupe lɛ tee!
4. Mɛɛ gbɛ̀i anɔ tsakemɔi baa shikpɔŋkukuji amli?
4 Tsakemɔi ni Baa yɛ Shikpɔŋkuku lɛ Mli: Bɔ ni wɔshikpɔŋkuku lɛ yɔɔ lɛ yaa nɔ etsakeɔ. Kɛ́ wɔyashiɛ yɛ shĩa ko mli ni abooo wɔ toi shi wɔsaa wɔku wɔsɛɛ kɛtee jɛmɛ ekoŋŋ lɛ, weku mli bii lɛ ateŋ mɔ kroko—ni ekolɛ enuko wɔshɛɛ sane lɛ pɛŋ lɛ—baanyɛ ahere wɔ ni ebo wɔ toi. Aloo ekolɛ wɔbaayana mɛi heei komɛi ní efã kɛbahi jɛmɛ ni yɔɔ wiemɔ lɛ he miishɛɛ diɛŋtsɛ. Gbekɛbii ní amɛfɔlɔi teɔ shi kɛwoɔ shiɛmɔ nitsumɔ lɛ daraa ni amɛyahiɔ he kroko. Ekolɛ mɛi ni tamɔ nɛkɛ lɛ baasumɔ ní amɛbo Maŋtsɛyeli shɛɛ sane lɛ toi.
5. Mɛni baanyɛ aha mɛi abo sane lɛ toi waa?
5 Mɛi hu tsakeɔ. Tsutsu ko lɛ, bɔfo Paulo ji “musubɔlɔ kɛ yiwalɔ kɛ mɛi aniseniianiifeelɔ.” (1 Tim. 1:13) Nakai nɔŋŋ hu mɛi babaoo ni miisɔmɔ Yehowa ŋmɛnɛ lɛ ji mɛi ni tsutsu ko lɛ amɛbɛ anɔkwale lɛ he miishɛɛ. Ekolɛ amɛteŋ mɛi komɛi po te shi amɛwo sanekpakpa lɛ yɛ be ko mli. Je lɛŋ shihilɛ ni yaa nɔ etsakeɔ lɛ baanyɛ aha shitee-kɛwolɔi komɛi loo mɛi ni kulɛ amɛbɛ wiemɔ lɛ he miishɛɛ lɛ abo sanekpakpa lɛ toi. Mɛi komɛi baanyɛ abo sanekpakpa lɛ toi kɛ́ amɛkɛ naagba ko kpe yɛ amɛshihilɛ mli, tamɔ kɛ́ amɛwekunyo ko gbo, amɛnitsumɔ ŋmɛɛ amɛ, amɛná shika he naagba, loo amɛye hela ko.
6. Mɛni hewɔ esa akɛ wɔyanɔ wɔkɛ miishɛɛ ashiɛ lɛ?
6 Nibii agbɛjianɔtoo nɛɛ miiba enaagbee, shi wɔshiɛmɔ kɛ kaselɔfeemɔ nitsumɔ lɛ miiya hiɛ oyayaayai. (Yes. 60:22) No hewɔ lɛ, wɔyaa nɔ wɔshiɛɔ kɛ miishɛɛ, ni wɔbɔɔ mɔdɛŋ akɛ wɔná jwɛŋmɔ ni ja. Ekolɛ mɔ kroko ni wɔkɛaagba sane lɛ baabo wɔ toi. Esa akɛ wɔyanɔ wɔshiɛ! ‘Kɛji wɔfee enɛ lɛ, wɔɔhere wɔ diɛŋtsɛ kɛ mɛi ni boɔ wɔ toi lɛ fɛɛ ayiwala.’—1 Tim. 4:16.