‘Gbɔmɛi Ateŋ Nikeenii’ kɛ Ekãa Kwɛɔ Tooku lɛ Nɔ
1 Kwɛ gbɛjianɔ ni suɔmɔ yɔɔ mli ni Yehowa eto kɛtsɔ e-Bi lɛ nɔ ni ekɛ ‘gbɔmɛi ateŋ nikeenii’ eha! (Efe. 4:8, 11, 12) Amɛyɛ sɔ̃i babaoo, ni nɔ ni fata he ji Nyɔŋmɔ tookuu lɛ anɔkwɛmɔ yɛ ekãa naa. (1 Pet. 5:2, 3) Wɔ fɛɛ wɔnáa he sɛɛ kɛjɛɔ gbɛjianɔtoo ni he hiaa waa nɛɛ mli. Kɛji mɛi komɛi kɛ shihilɛi ni mli wawai miikpe, kpaako amɛkɛ asafo lɛ bɔɔ, amɛyɛ gbɔjɔmɔi komɛi, loo amɛkpalaŋ kɛtee sɛɛ lɛ, nɛkɛ hii nɛɛ yɛ mɛi aŋkroaŋkroi fɛɛ amumɔŋ hilɛ-kɛhamɔ he miishɛɛ.—Fil. 2:4; 1 Tes. 5:12-14.
2 Kɛji nibii ni yaa nɔ yɛ je lɛŋ ni haoɔ mɔ lɛ kɛ yiŋkɔshikɔshifeemɔ babaoo ba lɛ, nɛkɛ tookwɛlɔi bibii nɛɛ bafeɔ “tamɔ abobaahe yɛ kɔɔyɔɔ naa kɛ teemɔhe yɛ nyɔŋmɔnɛmɔ naa.” Kɛji etɔ wɔ loo wɔjatsui lɛ tsii ní wɔnuɔ he akɛ miishɛjemɔ he miihia wɔ lɛ, amɛshɛjeɔ wɔmii, ‘amɛtamɔ faai yɛ ŋã kpataa nɔ loo tɛsaa kpele ko ni haa hɔ̃ɔŋ yɛ shikpɔŋ gbiŋ nɔ.’—Yes. 32:2.
3 Amɛwoɔ Mɛi ni Ekpa Shiɛmɔyaa lɛ Hewalɛ: Onukpai lɛ bɔɔ mɔdɛŋ krɛdɛɛ koni amɛwo mɛi ni amɛfo shiɛmɔyaa mli nyɔŋ muu fɛɛ loo amɛkpa shiɛmɔyaa kwraa lɛ hewalɛ koni amɛbɔ mɔdɛŋ ni amɛkɛ amɛhe awo asafo lɛ nifeemɔi fɛɛ amli daa. Nyɛmimɛi asaramɔ ni suɔmɔ yɔɔ mli eye ebua mɛi babaoo koni amɛya asafoŋ kpeei daa ni amɛbafee mɛi ni atswa amɛ ama shi yɛ mumɔŋ kɛyashɛ he ni amɛmiiná gbɛfaŋnɔ ekoŋŋ yɛ sɔɔmɔ nitsumɔ lɛ mli. Mɔdɛŋbɔi ni tamɔ nɛkɛ ni jɛ onukpai lɛ aŋɔɔ lɛ fɛɛ tsɔɔ Yehowa suɔmɔ kwɛmɔ kɛ Yesu Kristo hiɛnyiɛmɔ ni ekãa yɔɔ mli lɛ. Efee nɔkwɛmɔnɔ efɔ̃ shi yɛ mɔ hesusumɔ ni tamɔ nɛkɛ kpo ni aaajie lɛ kpo atsɔɔ etoi lɛ ateŋ mɔ fɛɛ mɔ ni ekolɛ ekpalaŋ loo elaaje lɛ.—Mat. 18:12-14; Yoh. 10:16, 27-29.
4 Tookwɛlɔi bibii lɛ taoɔ okadii ni miitsɔɔ akɛ ekolɛ mɔ ko miigbɔjɔ yɛ mumɔŋ. Mumɔŋ yelikɛbuamɔ he miihia mɔ fɛɛ mɔ ni ekolɛ ejieɔ nijiaŋwujee okadii akpo, ni ebatsɔ mɔ ni efɔɔɔ kpee baa, loo eba shi yɛ sɔɔmɔ nitsumɔ lɛ mli. Onukpai lɛ efee klalo akɛ amɛkɛ yelikɛbuamɔ baaha mɔ fɛɛ mɔ ni jeɔ shishi ejieɔ henumɔ kɛha je lɛŋ atadewoo kɛ hesaamɔ loo mɔ ni náa su ni ji keketee ni afeɔ ashiɔ asafo lɛ. Nɔkwɛlɔi ni susuɔ mɔ he lɛ jɛɔ amɛsuɔmɔ mli amɛkɛ anɔkwa miishɛɛ kɛ suɔmɔ ni hedɔɔ yɔɔ mli ni amɛyɔɔ lɛ mli amɛkɛ ‘amɛ diɛŋtsɛ amɛwala tete haa’ kɛ mɔdɛŋbɔi akɛ amɛaaye amɛbua mɛi ni tamɔ nɛkɛ koni amɛ tsiɛ suɔmɔ ni amɛyɔɔ kɛha Yehowa lɛ hiɛ ekoŋŋ.—1 Tes. 2:8.
5 Yɛ be ni eho lɛ amli lɛ, Kristofoi komɛi ni ejɔɔ amɛhe nɔ lɛ kɛ asafo lɛ náaa sharamɔ dɔŋŋ, enɛ ha amɛtsuuu mumɔŋ nibii ahe nii ejaakɛ amɛbatsɔmɔ mɛi ni gbɔmɔtsoŋ hewalɛnamɔ mli naagbai, ohia shihilɛ ni gbalaa mɔ sɛɛ, loo weku mli nɔnyɛɛi eye amɛnɔ. Ákɛ mɛi ni efeee keketee lɛ, onukpai lɛ jɛɔ mlihilɛ mli amɛkɛ nɔmimaa haa akɛ Yehowa susuɔ etoi lɛ fɛɛ ahe ni ebaaye ebua amɛ yɛ jaramɔ bei amli. (Lala 55:23; 1 Pet. 5:7) Tookwɛlɔi ni hiɛ yɔɔ amɛtoi lɛ anɔ lɛ baanyɛ aye abua amɛ koni amɛyɔse akɛ kɛji ‘amɛtsi amɛbɛŋkɛ Nyɔŋmɔ lɛ, eeetsi eeebɛŋkɛ amɛ,’ ni ekɛ miishɛjemɔ kɛ hejɔɔmɔ baaha amɛ.—Yak. 4:8; Lala. 23:3, 4.
6 Amɛkɛ Woo Haa Mɛi ni Egbɔjɔ yɛ Gbɔmɔtsoŋ Lɛ: Tookwɛlɔi bibii ni yɔɔ suɔmɔ nɛɛ hu susuɔ mɛi ni abaanyɛ aku hiɛ ashwie amɛnɔ lɛ ahe. Yɛ asafo fɛɛ asafo mli lɛ, ayɛ mɛi komɛi ni egbɔjɔ yɛ gbɔmɔtsoŋ, mɛi ni yɔɔ hei ni akwɛɔ mɛi yɛ, loo yɛ gbɛ ko nɔ lɛ mɛi ni amɛnyɛɛɛ nɔ ko kwraa amɛfee yɛ mli. Gbɛfaŋnɔ ni amɛnáa yɛ Maŋtsɛyeli shɛɛ sane lɛ jajemɔ mli lɛ faaa yɛ shihilɛ mli ni amɛyɔɔ lɛ hewɔ. Ekolɛ hegbɛ ni amɛyɔɔ ni amɛkɛaaye odase lɛ baaba kɛtsɔ saralɔi, helatsɛmɛi krokomɛi, loo mɛi akwɛlɔi ni amɛkɛ baashara lɛ pɛ nɔ. Shi kɛlɛ, abuɔ nɔ fɛɛ nɔ ni amɛnyɛɔ amɛfeɔ lɛ akɛ eji yelikɛbuamɔ ni sɛɛnamɔ yɔɔ he kɛha shiɛmɔ nitsumɔ muu lɛ fɛɛ. (Mat. 25:15) Kɛji amɛkɛ minitii 15 kɛkɛ ye odase po lɛ, esa akɛ abu enɛ he akɔntaa, ni abaaya nɔ abu amɛ akɛ amɛji Maŋtsɛyeli lɛ he shiɛlɔi.
7 ‘Gbɔmɛi ateŋ nikeenii’ lɛ le amɛnyɛmimɛi lɛ amumɔŋ hiamɔ nii lɛ diɛŋtsɛ yɛ afi lɛ mli be nɛɛ mli—Kaimɔ be lɛ. Mɛɛ be ni sa eji nɛkɛ kɛha onukpai lɛ akɛ amɛaabɔ mɔdɛŋ krɛdɛɛ koni amɛye amɛbua mɛi fɛɛ ni ekpalaŋ kɛtee lɛ koni shikome ekoŋŋ lɛ amɛná miishɛɛ kɛ jwɛŋmɔŋ toiŋjɔlɛ ni fataa naanyobɔɔ ni suɔmɔ yɔɔ mli ni yɔɔ asafo lɛ mli lɛ he! Wɔmii shɛɔ wɔhe kɛji akɛ wɔna mɛi ni tamɔ nɛkɛ ‘ni wɔkɛ amɛ yɔɔ hemɔkɛyeli kome lɛ mli lɛ’ yɛ asafoŋ kpeei ashishi kɛ agbɛnɛ yɛ sɔɔmɔ nitsumɔ lɛ mli ni amɛsaa amɛmiima hemɔkɛyeli ni amɛyɔɔ yɛ kpɔmɔ afɔleshaa lɛ mli lɛ nɔ mi lɛ.—Gal. 6:10; Luka 15:4-7; Yoh. 10:11, 14.