Akɛ Miishɛɛ Diɛŋtsɛ Here Nɔ!
1 Kristofoi awekui ni yɔɔ he fɛɛ he lɛ ejie hiɛsɔɔ ni ekãa yɔɔ mli ni amɛyɔɔ lɛ kpo yɛ vidio ni ji Young People Ask—How Can I Make Real Friends? (Oblahii kɛ Oblayei Biɔ Akɛ—Te Mafee Tɛŋŋ Mabɔ Nanemɛi Kpakpai?) lɛ he. Tsɛ ko ni yɔɔ United States lɛ kɛɛ akɛ, beni amɛkwɛ amɛgbe naa lɛ, ebihii lɛ tara shi dioo—amɛnu shishi ni amɛkpɛlɛ nɔ fɛɛ nɔ ni yɔɔ vidio lɛ mli lɛ nɔ! Amaniɛbɔɔ ko ni jɛ Malawi lɛ kɛɛ akɛ nyɛmimɛi hii kɛ yei bibii ni yɔɔ jɛmɛ lɛ hu baanyɛ anu shishi ni amɛkpɛlɛ nɔ nakai nɔŋŋ ejaakɛ amɛnáa nɔnyɛɛ ni tamɔ nakai nɔŋŋ kɛjɛɔ amɛ tipɛŋfoi adɛŋ yɛ skul. Tsɛ ko ni yɔɔ Germany lɛ kɛɛ yɛ vidio lɛ he akɛ: Minuɔ he akɛ eji hetoo kɛha misɔlemɔi lɛ.” Oblayoo ko kɛɛ akɛ: “Miida nyɛ shi akɛ nyɛkai mi akɛ Yehowa susuɔ mihe.” Onukpa ko ni yɔɔ New Zealand lɛ bɔ amaniɛ akɛ: “Eye ebua wɔbiyei ni yeko afii 20 lɛ ateŋ mɔ kome kɛba wala gbɛ lɛ nɔ.” Yoo onukpa ko ni ebote gbalashihilɛ mli lɛ kwɛ vidio lɛ ni ekɛɛ akɛ: “Kwɛ bɔ ni mishweɔ akɛ oblahii kɛ oblayei fɛɛ ni yɔɔ anɔkwale lɛ mli lɛ baakwɛ vidio nɛɛ koni no atsirɛ amɛ ni amɛha anɔkwale lɛ atsɔ amɛnɔ!” Wekui, mɛni hewɔ nyɛkwɛɛɛ vidio lɛ ekoŋŋ? No sɛɛ lɛ, nyɛfea ekome kɛsusua sanebimɔi ni nyiɛ sɛɛ lɛ ahe.
2 Hiɛkpamɔ: Mɛni ji naanyo kpakpa?—Abɛi 18:24.
3 Gbɛtsiinɔ Kɛha Naanyobɔɔ: Te ooofee tɛŋŋ oye henumɔ akɛ ajie bo kwraa kɛjɛ mli lɛ nɔ kunim yɛ? (Fil. 2:4) Mɛni hewɔ esa akɛ osumɔ akɛ oooha osu kɛ baŋ aya hiɛ, ni namɔ baanyɛ aye abua bo koni ofee nakai? Mɛni baagbele hegbɛi anaa kɛha bo koni oná nanemɛi babaoo, ni nɛgbɛ nine baashɛ amɛnɔ yɛ?—2 Kor. 6:13.
4 Nyɔŋmɔ kɛ Naanyobɔɔ: Te ooofee tɛŋŋ oná okɛ Yehowa teŋ wekukpaa, ni mɛni hewɔ nakai mɔdɛŋbɔɔ lɛ sa lɛ? (Lala 34:9) Namɔ baanyɛ awaje okɛ Nyɔŋmɔ teŋ naanyobɔɔ lɛ fe fɛɛ?
5 Nanemɛi Gbohii: Namɛi ji nanemɛi fɔji? (1 Kor. 15:33) Te aaafee tɛŋŋ ni nanemɛi gbohii aaanyiɛ mɔ ko hiɛ kɛyabote mumɔŋ hiɛkpatamɔ mli lɛ? Mɛni Biblia mli amaniɛbɔɔ ni kɔɔ Dina he lɛ tsɔɔ bo?—1 Mose 34:1, 2, 7, 19.
6 Ŋmɛnɛŋmɛnɛ Beaŋ Drama: Mɛɛ gbɛ nɔ shoofeemɔ ná Tara nɔ hewalɛ yɛ? Mɛɛ gbɛ nɔ etsɔ ebu naanyo ni ekɛ je lɛŋ oblahii kɛ oblayei bɔɔ lɛ bem yɛ? Mɛɛ osharai amli amɛkɛ lɛ yawo? Mɛni hewɔ efɔlɔi enaaa oshara mli ni eyɔɔ lɛ, shi mɛɛ sú amɛkɛye amɛbua lɛ koni ená hewalɛ yɛ mumɔŋ? Mɛɛ gbɛ nɔ nyɛmi yoo gbɛgbalɔ ko jie ehe kpo yɛ akɛ naanyo diɛŋtsɛ kɛha Tara yɛ? Mɛni hewɔ ni esa akɛ Kristofoi abo Abɛi 13:20 kɛ Yeremia 17:9 lɛ toi lɛ? Mɛɛ nikasemɔ ko ni he hiaa Tara kase?
7 Naamuu: Mɛɛ nikasemɔi wɔkase kɛjɛ vidio nɛɛ mli? Mɛɛ gbɛ nɔ obaanyɛ okɛtsu nii ni okɛye obua mɛi krokomɛi?—Lala 71:17.