Nyɛfea Ekome
1 Shii enyiɛ onaa ekpɛ ohe yɛ bɔ ni afee adesa gbɔmɔtso lɛ aha lɛ he pɛŋ? (Lala 139:14) Gbɔmɔtso lɛ he nibii lɛ feɔ ekome kɛtsuɔ nii. Nyɔŋmɔ Wiemɔ lɛ kɛ Kristofoi asafo lɛ to gbɔmɔtso ko ni kɛ ehe kpãa gbee jogbaŋŋ lɛ he. Yɛ Kristo, ni ji Yitso lɛ shishi lɛ, asafo lɛ mli bii fɛɛ ‘mɔmɔɔ amɛhe amɛshimɔshimɔɔ amɛhe nɔ ni tsɔ̃ɔ nɔ ni jɛɔ talɔ fɛɛ talɔ mli lɛ nɔ etsaratsaraa ehe nɔ.’ (Efe. 4:16a) No hewɔ lɛ, Yehowa nyɛɔ ekɛ ewebii ni efee ekome lɛ tsuɔ nii kɛtsuɔ naakpɛɛ nibii ahe nii.
2 Klɛŋklɛŋ afii oha lɛ mli asafo lɛ mli bii lɛ kɛ “jwɛŋmɔ kome” fee nii kɛtsu amɛteŋ mɔ fɛɛ mɔ mumɔŋ kɛ heloonaa hiamɔ nii ahe nii. (Bɔf. 2:44-47) Kɛtsɔ Yehowa sɛɛfimɔ nɔ lɛ, amɛfee ekome kɛkpee shitee-kɛwoo ni yɔɔ gbeyei anaa ni amɛye nɔ kunim. (Bɔf. 4:24-31) Amɛjaje Maŋtsɛyeli shɛɛ sane lɛ yɛ he fɛɛ he ni amɛyaa, ni amɛgbɛ sanekpakpa lɛ amɛshwã je lɛ fã ni ale yɛ nakai beaŋ lɛ mli. (Kol. 1:32) Yɛ ŋmɛnɛŋmɛnɛ beaŋ lɛ, Kristofoi asafo lɛ efee ekome kɛtsu nɛkɛ nibii nɛɛ nɔŋŋ ahe nii yɛ gbɛ ni da po nɔ. Mɛɛ nibii nɛkɛ kɛ ekomefeemɔ nɛɛ ba?
3 Afee Amɛ Ekome Kɛtsɔ Ŋwɛi Nitsɔɔmɔ Nɔ: Wɔjamɔ lɛ efee wɔ ekome yɛ je lɛŋ he fɛɛ he. Te feɔ tɛŋŋ ni enɛ baa lɛ nakai lɛ? Wɔyɔseɔ gbɛ ni anaa ni Yehowa tsɔɔ nɔ ekɛ mumɔŋ ‘niyenii haa yɛ be ni sa nɔ lɛ.’ (Mat. 24:45) Wɔhiɛ sɔɔ “gbɔmɛi ateŋ nikeenii” ni ekɛha akɛ tsɔɔlɔ yɛ asafo lɛ mli lɛ hu. Be mli ni wɔkɛ heshibaa kpɛlɛɔ gbɛjianɔ ni Yehowa eto koni ekɛlɛ wɔ yɛ mumɔŋ lɛ nɔ lɛ, bɔ ni wɔnuɔ Nyɔŋmɔ Wiemɔ lɛ shishi wɔhaa lɛ mli waa ni ekanyaa wɔ yɛ nɔ kome he, koni wɔkase Yesu ákɛ ekaselɔi. Esa akɛ wɔya nɔ wɔkase Nyɔŋmɔ Wiemɔ lɛ, ní wɔbɔ mɔdɛŋ koni ‘wɔnine ashɛ hemɔkɛyeli ekomefeemɔ lɛ nɔ.’ (Efe. 4:8, 11-13) Ani ooha wɔmumɔŋ ekomefeemɔ lɛ miiya hiɛ kɛtsɔ Biblia lɛ ni oookane daa gbi lɛ nɔ?
4 Akɛ Kristofoi Anaanyobɔɔ Efee Amɛ Ekome: Suɔmɔ gbalaa wɔ kɛbɛŋkɛɔ wɔhe kpaakpa yɛ Kristofoi akpeei ashishi. ‘Wɔyɔseyɔseɔ wɔhe’ yɛ nɛkɛ kpeei nɛɛ ashishi. (Heb. 10:24, 25) Nɔ ni fata enɛ he ji ni wɔkwɛ nii kɛteke bɔ ni mɔ pueɔ yɛ kponɔgbɛ, kɛ wɔnyɛmimɛi lɛ ni wɔbaale amɛ jogbaŋŋ, ni wɔna amɛ yɛ gbɛ ni Yehowa naa amɛ lɛ nɔ, akɛ mɛi ni jara wa. (Hag. 2:7) Be mli ni wɔboɔ amɛhemɔkɛyeli wiemɔi lɛ atoi lɛ, suɔmɔ ni wɔyɔɔ kɛha amɛ lɛ mli waa ni ewajeɔ ekomefeemɔ ni yɔɔ wɔteŋ lɛ. Ani ale bo akɛ oji mɔ ko ni baa asafoŋ kpeei daa?
5 Hefatalɔi Nitsulɔi yɛ Sɔɔmɔ lɛ Mli: Sanekpakpa lɛ ni wɔkɛ nanemɛi heyelilɔi shiɛɔ lɛ haa wɔfeɔ ekome kɛtsuɔ Nyɔŋmɔ suɔmɔnaa nii ahe nii. Bɔfo Paulo hiɛ sɔ ‘enanemɛi nitsulɔi yɛ Nyɔŋmɔ maŋtsɛyeli lɛ hewɔ.’ (Kol. 4:11) Niiashikpamɔi ni wɔgbaa wɔhe kɛ yelikɛbuamɔ ni wɔkɛhaa wɔhe yɛ be mli ni wɔtsuɔ sɔɔmɔ nitsumɔ lɛ yeɔ ebuaa wɔ koni wɔtsu wɔ Kristofoi anitsumɔ ni akɛwo wɔdɛŋ lɛ he nii, ni ewajeɔ ekomefeemɔ ni yɔɔ wɔteŋ lɛ.—Kol. 3:14.
6 Ekomefeemɔ Hewalɛ ni Mumɔ Krɔŋkrɔŋ lɛ Kɛbaa: Be mli ni wɔkɛ mɔdɛŋbɔɔ feɔ Yehowa suɔmɔnaa nii lɛ, ehaa wɔnine shɛɔ emumɔ lɛ nɔ. Enɛ yeɔ ebuaa wɔ koni wɔjie béi kɛjɛ wɔteŋ ni wɔfee ekome kɛhi shi. (Lala 133:1) Ekanyaa wɔ ‘koni wɔto mumɔ ekomefeemɔ lɛ yɛ hejɔlɛ kpãa lɛ mli.’ (Efe. 4:3) Wɔteŋ mɔ fɛɛ mɔ baanyɛ aha ni gbeekpamɔ ni yɔɔ Nyɔŋmɔ webii ateŋ lɛ aya hiɛ kɛtsɔ mumɔ lɛ yibii lɛ ni wɔɔwo yɛ bɔ ni wɔkɛ wɔhe yeɔ wɔhaa lɛ mli.—Gal. 5:22, 23.
7 Ekomefeemɔ ni wɔkɛsɔmɔɔ yɛ Kristo yitsoyeli lɛ shishi lɛ ‘haa gbɔmɔtso lɛ daa, ni emaa ehe yɛ suɔmɔ mli.’ (Efe. 4:16b) Nɔ ni fe fɛɛ lɛ, ewoɔ Yehowa, “hejɔlɛ Nyɔŋmɔ” lɛ hiɛ nyam.—Rom. 16:20.