Ani Okɛ Ohe Woɔ Shiɛmɔ Nitsumɔ lɛ Mli Daa?
1 “Majie oyi gbi fɛɛ gbi.” (Lala 145:2a) Nɛkɛ wiemɔi nɛɛ tsɔɔ suɔmɔ ni mli kwɔ ni lalatsɛ lɛ yɔɔ kɛha Yehowa. Ákɛ Kristofoi lɛ, eji gbɛnaa nii ni kã wɔnɔ akɛ wɔkɛ “yijiemɔ afɔle” aha Yehowa kɛtsɔ wɔhe ni wɔkɛaawo shiɛmɔ nitsumɔ lɛ mli daa lɛ nɔ. (Heb. 13:15) Ani oofee nakai? Yɛ yiŋtoi srɔtoi komɛi ahewɔ lɛ wɔnyɛmimɛi ni wɔsumɔɔ amɛ lɛ ateŋ mɛi 8,000 eŋmɛ gbɛ ni nyɔŋ muu fɛɛ eho ní amɛkɛ amɛhe wooo shiɛmɔ nitsumɔ lɛ mli! Shi kɛlɛ, amɛbaanyɛ amɛná nɔyaa.
2 Gbɛjianɔtoo He Miihia: Gbɛjianɔtoo ni anyɛɔ atsuɔ he nii baaŋmɛ wɔgbɛ koni wɔná shiɛmɔ nitsumɔ lɛ mli gbɛfaŋnɔ daa otsi. Ehe miihia ni wɔŋmɛ pɛpɛɛpɛ yɛ teokrase nibii ni he hiaa lɛ asɛɛtiumɔ kɛ nibii krokomɛi ni he hiaa lɛ amli. Too gbɛjianɔ koni kɛ hoo lɛ okɛ ŋmɛlɛtswaa kome loo enyɔ atsu nii yɛ sɔɔmɔ lɛ mli yɛ otsi lɛ mli gbii lɛ amli. Mɛi krokomɛi baanyɛ ahé be kɛha sɔɔmɔ lɛ gbɛkɛnaashi. Kɛtsɔ tsakemɔi komɛi afeemɔ nɔ lɛ, mɛi pii baanyɛ aná be koni amɛkɛ asafo lɛ aná shiɛmɔ nitsumɔ lɛ mli gbɛfaŋnɔ yɛ Hɔɔ loo Hɔgbaa.—Abɛi 21:5a.
3 Kɛtsɔ hiɛ ni atsɔɔ asusuɔ nii ahe fioo lɛ nɔ lɛ, mɛi ni bɛ hewalɛ lɛ baanyɛ aye mɛi ni basaraa amɛ lɛ kɛ helatsamɔhe lɛ mli nitsulɔi lɛ odase trukaa. (Okɛto Luka 21:2-4 lɛ he.) Weku yitsei yɛ gbɛnaa nii ko ni hiɛdɔɔ yɔɔ mli akɛ amɛkɛ amɛŋamɛi kɛ amɛbii aaafee ekome kɛtsu nii yɛ sɔɔmɔ nitsumɔ lɛ mli.—1 Tim. 3:4, 12.
4 Mɛɛ Gbɛ nɔ Mɛi Krokomɛi Baanyɛ Aye Abua Yɛ? Ehe miihia ni woloŋ nikasemɔ nɔkwɛlɔi lɛ atao shiɛlɔi ni folɔɔ shiɛmɔyaa mli lɛ anaagbai ní amɛto gbɛjianɔ krɛdɛɛ koni amɛkɛye amɛbua amɛ ni amɛtsɔmɔ mɛi ni yaa shiɛmɔ daa. (Abɛi 27:23) Onukpai krokomɛi, asafoŋ sɔɔlɔi, gbɛgbalɔi, kɛ shiɛlɔi ni edara yɛ mumɔŋ lɛ baanyɛ aye abua. Kɛji akɛ afɔ̃ nine atsɛ bo koni oye obua mɛi ni tamɔ nɛkɛ lɛ, okɛ heshibaa, tsuishiŋmɛɛ, kɛ suɔmɔ afee.—Mat. 11:29.
5 Akɔntaabuu: Bɔɔ mɔdɛŋ ni okɛ osɔɔmɔ nitsumɔ lɛ he akɔntaabuu aha mra yɛ nyɔŋ fɛɛ nyɔŋ naagbee. (Mar. 6:30) Kɛji ehe bahia ni ofã gbɛ yɛ nyɔŋ lɛ mli lɛ, kwɛmɔ ni okɛ oshiɛmɔ nitsumɔ lɛ he akɔntaabuu fɛɛ akɔntaabuu ni oyɔɔ lɛ aha dani oshi.—Jaj. 9:11.
6 Ani suɔmɔ tsirɛɔ bo koni okɛ ohe awo mɛi ayiwalaheremɔ mli yɛ be mli ni je nɛɛ baa enaagbee lɛ? (1 Pet. 4:7) Kɛji nakai ji sane lɛ, tswaa ofai shi akɛ obaafee mɔ ni shiɛɔ yɛ daa nyɔŋ nɔ. Kɛtsɔ shiɛmɔ nitsumɔ lɛ ni okɛaaye klɛŋklɛŋ gbɛhe lɛ nɔ lɛ, ‘obaaya nɔ otsɔɔ nii ni ojaje sanekpakpa lɛ ni ofɔ̃ɔɔ.’—Bɔf. 5:42.