Kpee Krɛdɛɛ Gbi He Gbɛjianɔtoo Hee
“Jwɛŋmɔ Gbɛfaŋ lɛ, Nyɛfea Nyɛhe Mɛi ni Edara” ji kpee krɛdɛɛ gbi he gbɛjianɔtoo ni jeɔ shishi yɛ July 2001 lɛ saneyitso. (1 Kor. 14:20) Mɛni hewɔ ebaafee nɔ ni sɛɛnamɔ yɔɔ he akɛ wɔɔya lɛ? Jeŋ ni efɔŋfeemɔ eyi mli obɔ mli wɔyɔɔ lɛ. Bɔni afee ni wɔtsĩ enɛ naa lɛ, esa akɛ wɔha wɔmumɔŋ shishinumɔ mli nyɛmɔi lɛ aya hiɛ, koni wɔnyɛ wɔkɛ ekpakpa aye efɔŋ nɔ kunim. No ji nɔ ni kpee krɛdɛɛ gbi lɛ he gbɛjianɔtoo lɛ baaye abua wɔ ni wɔfee.
Yɛ kpee lɛ shishijee mli lɛ, kpokpaa nɔkwɛlɔ lɛ baawie “Nibii ni Yeɔ Buaa ni Haa Wɔtsɔmɔɔ Mɛi ni Edara yɛ Biblia Shishinumɔ Mli” lɛ he. Ebaatsɔɔ wɔ bɔ ni wɔɔfee wɔfi shi shiŋŋ yɛ Kristofoi ahemɔkɛyeli mli. Wielɔ ni afɔ̃ nine atsɛ lɛ lɛ baama bɔ ni Biblia shishitoo mlai kɛ nitsumɔ diɛŋtsɛ ni aaaná he hiaa kɛha saji ayoomɔ oya lɛ nɔ mi, yɛ be mli ni ewieɔ saneyitso ni ji “Buu Omumɔŋ Shihilɛ He Kɛtsɔ Ojwɛŋmɔŋ Nyɛmɔi lɛ Atsɔsemɔ Nɔ” lɛ he lɛ.
Esa akɛ oblahii kɛ oblayei lɛ hu aha amɛjwɛŋmɔŋ shishinumɔ aya hiɛ. Abaawie enɛ he yɛ efãi ni ji “Nɔ Hewɔ ni Esa akɛ Afee Gbekɛbii yɛ Efɔŋ Gbɛfaŋ” kɛ “Oblahii kɛ Oblayei ni Náa Shishinumɔ Bianɛ” lɛ amli. Bó oblahii kɛ oblayei ni miigba nɔ ni amɛfeɔ koni amɛkɛwaje amɛhe yɛ mumɔŋ koni amɛnyɛ amɛye je lɛŋ nitsumɔi fɔji ni amɛaatao mli amɛle lɛ anɔ kunim ni amɛkwa haomɔ lɛ toi.
Te wɔɔfee tɛŋŋ wɔná miishɛɛ ni da fe fɛɛ yɛ shihilɛ mli? Wielɔ ni baasara nyɛ lɛ baatsɔɔ enɛ mli yɛ enaagbee wiemɔ ni ji “Ná Biblia Shishitoo Mlai ni Akɛtsuɔ Nii kɛ Shishinumɔ lɛ He Sɛɛ” lɛ mli. Ekɛ nɔkwɛmɔnii ni tsɔɔ akɛ, Nyɔŋmɔ Wiemɔ lɛ ni akɛtsuɔ nii yɛ shihilɛ mli lɛ yeɔ ebuaa wɔ, ni wɔtsuɔ naagbai ahe nii, wɔkpɛɔ wɔyiŋ, ni wɔnáa nɔ ni Yehowa tsɔɔ wɔ lɛ he sɛɛ diɛŋtsɛ lɛ baaha.
Mɛi ni sumɔɔ ni amɛkɛ nu mli baptisimɔ afee amɛhenɔjɔɔmɔ lɛ he okadi amɛha Nyɔŋmɔ yɛ kpee lɛ shishi lɛ aha onukpai asɛinɔtalɔ lɛ ale amrɔ nɔŋŋ. Kadimɔ okalanda lɛ nɔ amrɔ nɔŋŋ ní aaatswa kpee krɛdɛɛ gbi lɛ be lɛ he adafi, ni oto gbɛjianɔ diɛŋtsɛ koni oná kpee lɛ shishi wiemɔi kpakpai lɛ ahe sɛɛ. Kaaha kpee krɛdɛɛ gbi lɛ fã ko miiŋmɛɛ bo! Ebaawaje bo koni oŋmɛ otsui shi yɛ gbɛjianɔtoo fɔŋ nɛɛ mli, ni ohi shi akɛ anɔkwafo kɛha Yehowa.