Bɔ ni Anɔkwale lɛ Haa Wɔyeɔ Wɔhe
1 Be ko lɛ, Yesu kɛɛ Yudafoi ni ehé lɛ amɛye lɛ akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yoh. 8:32) Eewie heyeli ko ni fe heyeli kɛkɛ ni maŋ ko yɔɔ lɛ he, heyeli ni mɔ fɛɛ mɔ baanyɛ aná—niiatsɛ loo ohiafo, woloŋlelɔ loo mɔ ni leee woloŋ. Yesu tsɔɔ anɔkwale ni baaha aye he kɛjɛ esha kɛ gbele nyɔŋyeli lɛ shishi. Taakɛ Yesu tsɔɔ mli lɛ, “mɔ fɛɛ mɔ ní feɔ esha lɛ, esha lɛ nyɔŋ ji lɛ.” (Yoh. 8:34) Kwɛ bɔ ni wɔshweɔ be mli ni adesai toibolɔi fɛɛ “baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli” lɛ wɔhaa!—Rom. 8:21.
2 Anɔkwale ni kɔɔ Yesu kɛ gbɛfaŋnɔ ni etsuɔ yɛ Nyɔŋmɔ yiŋtoi ahe nitsumɔ mli lɛ he lɛ kɛ heyeli nɛɛ haa. Nɔ ni fata he ji nilee ni kɔɔ ekpɔmɔ afɔle ni eshã yɛ wɔhewɔ lɛ he. (Rom. 3:24) Biblia mli anɔkwale lɛ ni wɔkpɛlɛɔ nɔ kɛ toiboo ni wɔkɛbaa wɔhe shi wɔhaa no amrɔ nɛɛ po lɛ yeɔ ebuaa wɔ koni wɔná heyeli falɛ ko kɛjɛ gbeyeishemɔ, tsuifaa, kɛ nifeemɔi ni yeɔ mɔ awui fɛɛ ahe.
3 Heyeli Kɛmiijɛ Gbeyeishemɔ kɛ Tsuifaa He: Esaaa akɛ je lɛŋ shihilɛi haa wɔtsui fãa, ejaakɛ wɔle nɔ hewɔ ni efɔŋfeemɔ yɔɔ shihilɛ mli lɛ, ni wɔle akɛ etsɛŋ ni abaajie kɛjɛ shikpɔŋ lɛ nɔ. (Lala 37:10, 11; 2 Tim. 3:1; Kpoj. 12:12) Kɛfata he lɛ, anɔkwale lɛ haa wɔyeɔ wɔhe kɛjɛɔ apasa tsɔɔmɔi ni kɔɔ shihilɛ mli ni gbohii lɛ yɔɔ lɛ he lɛ he. Wɔle akɛ gbohii lɛ nyɛŋ amɛye wɔ awui, ákɛ amɛnaaa nɔ̃ yɛ naanɔ piŋmɔ ko mli, ni ákɛ Nyɔŋmɔ egbeee gbɔmɛi koni amɛbafata ehe yɛ mumɔi ashihilɛhe lɛ.—Jaj. 9:5; Bɔf. 24:15.
4 Anɔkwale ni tamɔ nɛkɛ wo tsɛ ko kɛ nyɛ ko hewalɛ beni amɛbi gbo yɛ oshara ko mli lɛ. Nyɛ lɛ kɛɛ akɛ: “Gbɛ agbo eba wɔshihilɛ mli ni anyɛŋ atsĩ kɔkɔɔkɔ kɛyashi wɔɔna wɔbi lɛ ekoŋŋ kɛtsɔ gbohiiashitee lɛ nɔ. Shi wɔle akɛ wɔpiŋmɔ lɛ ji nɔ ni baahi shi be kukuoo kɛkɛ.”
5 Heyeli Kɛmiijɛ Nifeemɔi ni Yeɔ Mɔ Awui Amli: Biblia mli anɔkwale lɛ baanyɛ atsake mɔ ko susumɔ kɛ esu, ni no baaha eye ehe kɛjɛ naagbai ni anyɛɔ ajoɔ naa foi lɛ ahe. (Efe. 4:20-24) Anɔkwa ni ayeɔ kɛ nii ni atsuɔ waa baanyɛ aye abua ni aba ohiayeli shi. (Abɛi 13:4) He-kɛ-afɔleshaa suɔmɔ kpo ni wɔjieɔ lɛ haa wekukpaa ni yɔɔ wɔkɛ mɛi ateŋ lɛ yaa hiɛ. (Kol. 3:13, 14) Bulɛ ni ajieɔ lɛ kpo atsɔɔ Kristofoi ayitsoyeli lɛ baa weku mli naagbai ashi. (Efe. 5:33–6:1) Dãatɔɔ, bɔlɛnamɔ mli jeŋba shara, tawa shɛremɔ, kɛ tsofai fɔji kɛ nitsumɔ ni kaa mɔ he ni ajoɔ naa foi lɛ haa anáa gbɔmɔtsoŋ hewalɛ kpakpa.—Abɛi 7:21-23; 23:29, 30; 2 Kor. 7:1.
6 Oblanyo ko kɛ afii nɛɛhu hi shi ni enyɛɛɛ ekpa tsofai fɔji ni ekɛtsuɔ nii ni eka ehe lɛ. Gbi ko lɛ ekɛ shiɛlɔ ko kpe yɛ gbɛjegbɛ nɔ odaseyeli mli. Eŋɔ woji lɛ eko, ni ato gbɛjianɔ koni ayasara lɛ yɛ eshia. Aje Biblia mli nikasemɔ shishi. Nyɔji enyɔ sɛɛ lɛ, nuu lɛ kpa tsofai fɔji lɛ kɛ nitsumɔ kwraa, ni yɛ nyɔji kpaanyɔ ni ekɛkase nii lɛ sɛɛ lɛ, abaptisi lɛ. Akɛni enyɛmi nuu kɛ ewuyoo na akɛ etsake kɛjɛ subaŋ ni eka ehe lɛ mli hewɔ lɛ, amɛbɔi Biblia lɛ kasemɔ.
7 Ye Obua Mɛi Krokomɛi ni Amɛná Heyeli: Ekolɛ ebaawa kɛha mɛi ni kɛ amɛwala be fɛɛ ehi shi akɛ nyɔji kɛha apasa tsɔɔmɔi lɛ akɛ amɛaanu heyeli ni Nyɔŋmɔ Wiemɔ lɛ kɛhaa lɛ shishi. Ekolɛ amɛtsui he ni aaashɛ lɛ baabi mɔdɛŋbɔɔ krɛdɛɛ kɛ hesaamɔ jogbaŋŋ yɛ tsɔɔlɔ lɛ gbɛfaŋ. (2 Tim. 4:2, 5) Amrɔ nɛɛ jeee be ni esa akɛ wɔfee kpɔkee yɛ wɔnitsumɔ akɛ ‘wɔjaje heyeli wɔtsɔɔ nomii lɛ’ mli. (Yes. 61:1) Kristofoi aheyeli lɛ jara wa. Nine ni aaashɛ nɔ lɛ tsɔɔ naanɔ wala.—1 Tim. 4:16.