Jiemɔ Yehowa Yi Kɛtsɔ Trukaa Odaseyeli Nɔ
1 Yehowa anɔkwa tsuji taoɔ hegbɛi ni amɛkɛaajie eyi be fɛɛ be. (Lala 96:2, 3; Heb. 13:15) Gbɛ kome ni wɔbaanyɛ wɔtsɔ nɔ wɔfee enɛ lɛ ji ni wɔɔye trukaa odase. Yehowa jálɔi babaoo daa shi ŋmɛnɛ ákɛ mɔ ko ha amɛle Maŋtsɛyeli shɛɛ sane lɛ kɛtsɔ trukaa odaseyeli nɔ.
2 Bei pii lɛ trukaa odase ni aaaye mɔ kome pɛ lɛ gbeleɔ gbɛ kɛhaa mɛi krokomɛi koni amɛnu Maŋtsɛyeli shɛɛ sane lɛ. Ákɛ nɔkwɛmɔnɔ lɛ, sane ni Yesu kɛ Samaria yoo lɛ gba yɛ Yakob nubu lɛ he lɛ ha mɛi pii baná sanekpakpa lɛ he miishɛɛ. (Yohane 4:6-30, 39-42) Beni awo Paulo kɛ Sila tsuŋ yɛ Filipi lɛ, amɛye gboklɛfoi akwɛlɔ lɛ odase, ni lɛ kɛ ewe lɛ fɛɛ kpɛlɛ anɔkwale lɛ nɔ.—Bɔf. 16:25-34.
3 Hegbɛi: Mɛɛ hegbɛi oyɔɔ ní obaanyɛ okɛye trukaa odase? Mɛi komɛi feɔ nakai beni amɛmiiye jara yɛ shwapoi amli, beni amɛta maŋ tsɔne mli, loo beni amɛmiimɛ yɛ helatsamɔhe kɛha kwɛmɔ lɛ. Mɛi krokomɛi nyɛɔ amɛyeɔ odase beni amɛba hejɔɔmɔ fioo shwane yɛ nitsumɔhe loo yɛ skul. Wɔ Biblia he woji lɛ eko kɛkɛ ni wɔɔhiɛ koni ana lɛ baanyɛ aha mɛi krokomɛi abi wɔ wɔhemɔkɛyeli lɛ he sane.—1 Pet. 3:15.
4 Bɔ ni Wɔɔje Shishi Wɔha: Beni gbekɛyoo ko ni eye afii kpawo ni hiɛ gboɔ lɛ yɔɔ kpee ko shishi lɛ, enu bɔ ni ehe hiaa akɛ mɔ fɛɛ mɔ aaashiɛ lɛ he. No hewɔ lɛ, beni efata enyɛ he kɛmiiya koni amɛyaye jara yɛ shwapo ko mli lɛ, ekɛ woji bibii enyɔ wo ebaagi lɛ mli. Beni gbekɛyoo lɛ nyɛ hiɛ edɔ yɛ okpɔlɔ ni awoɔ nibii ahe nyɔmɔ yɛ he lɛ he lɛ, gbekɛyoo lɛ kɛ wolo bibioo ko ha yoo ko, ni yoo lɛ jɛ esuɔmɔ mli ekpɛlɛ nɔ. Beni abi gbekɛyoo ni hiɛ gboɔ nɛɛ bɔ ni fee ni ená ekãa kɛtsi ebɛŋkɛ yoo lɛ, eha hetoo akɛ: “Mikɛ mihe wie ni mikɛɛ kɛkɛ akɛ, Feemɔ klalo, Saamɔ ohe, Yaa! Ni mitee!”
5 Kɛji akɛ wɔbaanyɛ wɔye trukaa odase lɛ, no lɛ mumɔ ni tamɔ nakai gbekɛyoo bibioo lɛ nɔ lɛ he miihia wɔ fɛɛ. Mɛni baanyɛ aye abua wɔ? Sɔlemɔ koni oná ekãa ni okɛaawie. (1 Tes. 2:2) Saamɔ sanebimɔ ko he yɛ ojwɛŋmɔ mli loo wiemɔ saneyitso ko ni yɔɔ miishɛɛ ni obaanyɛ okɛje sanegbaa shishi lɛ he. No sɛɛ lɛ ná hekɛnɔfɔɔ akɛ Yehowa baajɔɔ omɔdɛŋbɔi lɛ anɔ.—Luka 12:11, 12.
6 Trukaa odase ni wɔɔye mɛi ni wɔkɛkpeɔ daa gbi lɛ kɛ yijiemɔ bahaa Yehowa ni ehaa wɔnáa miishɛɛ. Ebaanyɛ eye ebua mɔ koni ebanyiɛ wala gbɛ lɛ nɔ.