Kpee Krɛdɛɛ Gbi He Gbɛjianɔtoo Hee

Saji babaoo yɛ ŋmɛnɛ ni kɔɔ bɔ ni wɔɔfee ni wɔha wɔtsui lɛ aná hewalɛ kpakpa bɔni afee ni wɔná wala sɛɛkɛlɛ mli miishɛɛ babaoo. Shi bɔ ni wɔ mfonirifeemɔŋ tsui lɛ yɔɔ ha lɛ ji nɔ ni he hiaa fe fɛɛ. Belɛ, kwɛ bɔ ni saneyitso kɛha kpee krɛdɛɛ gbi lɛ he gbɛjianɔtoo ni baaje shishi yɛ nyɔŋ nɛɛ nɔ ni ji: “Ní Aaasɔmɔ Yehowa Kɛ Tsui Muu Fɛɛ” lɛ sa jogbaŋŋ ha. (1 Kron. 28:9) Mɛni wɔbaanyɛ wɔkpa gbɛ akɛ wɔɔkase?

Kpokpaa nɔkwɛlɔ lɛ baawie saneyitso ni ji “Yelikɛbuamɔ ní Akɛaaha Mɛi Krokomɛi koni Amɛjɛ Miishɛɛ Mli Amɛkɛ Amɛsusuma Asɔmɔ Yehowa” lɛ he. Sanegbai ni baaya nɔ lɛ baama mlifilimɔ ni jɛɔ miishɛɛ ni mɛi ni taoɔ amɛsɔmɔ Yehowa lɛ jieɔ lɛ kpo lɛ sɛɛ ni adiɔ kɛ Biblia mli nikasemɔi ni akɛ amɛfeɔ lɛ mli kɛbaa lɛ nɔ mi. Ŋwanejee ko kwraa bɛ he akɛ mɔ fɛɛ mɔ baaná miishɛjemɔ kɛ hewalɛwoo kɛjɛ saralɔ lɛ klɛŋklɛŋ wiemɔ ni ji, “Wɔtsuii Ahe ni Wɔɔbu yɛ Haomɔ Jeŋ ko Mli” lɛ mli. Baptisimɔ wiemɔ lɛ kɛ leebi kpee lɛ baaba naagbee.

Yɛ shwane mli lɛ, fã ni hiɛ saneyitso ni ji “Yelikɛbuamɔ ní Akɛaaha” lɛ baatsɔɔ bɔ ni wɔɔfee wɔye wɔbua mɛi krokomɛi. Mɛni fɔlɔi baanyɛ afee koni amɛkɛbu amɛbii lɛ atsuii ahe kɛjɛ nibii fɔji ni baanyɛ aná amɛnɔ hewalɛ lɛ ahe, ni amɛye amɛbua amɛ koni amɛtsi kɛbɛŋkɛ Yehowa? Fã ni ji “Ye Obua Obii lɛ Koni Amɛná Yehowa He Miishɛɛ” lɛ kɛ ŋaawoi ni abaanyɛ akɛtsu nii baaha, ni ekɛ bɔ ni abaafee enɛ aha lɛ he nɔkwɛmɔnɔ hu baaha.

Ani wɔkɛ nibii fɛɛ ni Yehowa kɛhaa wɔ koni no aha wɔ mfonirifeemɔŋ tsui lɛ aná hewalɛ kpakpa lɛ miitsu nii? Saralɔ lɛ naagbee wiemɔ ni ji, “Yaa nɔ Okɛ Susuma Muu Fɛɛ Asɔmɔ Yehowa” lɛ baagbala jwɛŋmɔ kɛya nifeemɔi ejwɛ ni he hiaa ni haa wɔhiɛɔ wɔmumɔŋ shidaamɔ mli lɛ anɔ. Be kɛ mɔdɛŋbɔɔ enyiɛ wɔkɛsɔleɔ, wɔkɛkaseɔ Nyɔŋmɔ Wiemɔ lɛ, wɔkɛshiɛɔ kɛ ekãa, ni wɔkɛ Kristofoi krokomɛi bɔɔ? Ani wɔbaanyɛ wɔya wɔhiɛ yɛ enɛɛmɛi ateŋ eko mli?

Yehowa kɛ ninefɔɔ lɛ haa akɛ: “Okɛ otsui afɔ̃ tsɔsemɔ nɔ, ni okɛ otoii hu afɔ̃ nilee wiemɔi anɔ.” (Abɛi 23:12) Too gbɛjianɔ bianɛ koni oya Ŋmalɛ naa nitsɔɔmɔ gbi nɛɛ ni he yɔɔ sɛɛnamɔ lɛ shishi. Nakai ni ooofee lɛ baawo bo hewalɛ koni oya nɔ osɔmɔ Yehowa kɛ otsui muu fɛɛ ni ojɛ miishɛɛ mli okɛ osusuma asɔmɔ.