Gbi Kome Kpee Krɛdɛɛ He Gbɛjianɔtoo Hee

Hiŋmɛi lɛ ji nɔ ko ni he yɔɔ naakpɛɛ. (Lala 139:14) Shi kɛlɛ, enyɛɛɛ nibii enyɔ ekwɛ yɛ be kome too lɛ nɔŋŋ mli. Enɛ ji anɔkwale kɛ́ akɛ hiŋmɛi lɛ miikwɛ nii diɛŋtsɛ kɛ agbɛnɛ kɛ́ aawie he yɛ mfonirifeemɔŋ. Kɛ wɔmumɔŋ hiŋmɛi lɛ nɔ aaatse lɛ, no lɛ esa akɛ wɔha Nyɔŋmɔ suɔmɔnaa nifeemɔ afee oti ni ma wɔhiɛ. Akɛni nibii ni yɔɔ Satan je lɛ mli ni gbalaa mɛi ajwɛŋmɔ lɛ miiya nɔ eefa hewɔ lɛ, kwɛ bɔ ni sɛɛnamɔ yɔɔ he akɛ gbi kome kpee krɛdɛɛ he gbɛjianɔtoo kɛha afi 2006 sɔɔmɔ afi lɛ baagbála saneyitso ni ji “Ha Ohiŋmɛi nɔ Atse” lɛ mli!—Mat. 6:22.

Mɛni wɔbaanyɛ wɔfee koni wɔná Yehowa dɛŋ jɔɔmɔ? (Abɛi 10:22) Abaasusu sanebimɔ nɛɛ he yɛ fã ni ji “Ha Ohiŋmɛi nɔ Atse Koni Oná Jɔɔmɔi” lɛ mli. Saji ni abaabibii mɛi lɛ baatsɔɔ wɔ sɛɛnamɔi ni yɔɔ Ŋmalɛ naa shishitoo mlai ni wɔkɛaatsu nii lɛ he. Klɛŋklɛŋ wiemɔ ni saralɔ ni baaba lɛ baaha lɛ yitso ji “Hiŋmɛi ni Aaaha Enɔ Atse yɛ Jeŋ Fɔŋ Mli,” ni ebaabɔ wɔ kɔkɔ yɛ nibii ni baanyɛ aha wɔshihilɛ afee haŋtsii ni baanyɛ atsĩ wɔmumɔŋ hiɛyaa naa lɛ he. Agbɛnɛ hu wɔbaakase bɔ ni wɔbaafee wɔkɔ “nɔ ni hi lɛ.”—Luka 10:42.

Mɛɛ gbɛ nɔ fɔlɔi kɛ mɛi krokomɛi baanyɛ atsɔ awo oblahii kɛ oblayei ni ji Kristofoi lɛ hewalɛ koni amɛtiu mumɔŋ nibii asɛɛ? Fɔlɔi kɛ oblahii kɛ oblayei baawie sanebimɔ ni he hiaa nɛɛ he yɛ wiemɔi ni abaaha ni yitsei ji “Fɔlɔi ni Tsɛ̃ɔ Amɛgãi lɛ Jogbaŋŋ” kɛ “Oblahii kɛ Oblayei ni Tiuɔ Mumɔŋ Otii Asɛɛ” lɛ mli. (Lala 127:4) Naagbee wiemɔ ni saralɔ ni baaba lɛ baaha lɛ baatsɔɔ wɔ bɔ ni wɔkɛ Yehowa asafo lɛ baanyiɛ pɛpɛɛpɛ akɛ aŋkroaŋkroi, akɛ wekui, kɛ agbɛnɛ akɛ asafo lɛ mli.

Ekɔɔɔ he eko kɛji wɔji mɛi ni kpaako wɔbale anɔkwale lɛ loo wɔji mɛi ni miisɔmɔ Yehowa afii nyɔŋmai abɔ nɛ, ehe miihia ni ‘wɔha wɔhiŋmɛi nɔ atse.’ Gbi kome kpee krɛdɛɛ he gbɛjianɔtoo lɛ baaye abua wɔ ni wɔfee nakai pɛpɛɛpɛ.