“Nyɛsaa Nyɛhe Nyɛtoa”
1 Yɛ Yesu gbalɛ ni sa kadimɔ waa ni kɔɔ nibii agbɛjianɔtoo nɛɛ naagbee lɛ he lɛ mli lɛ, ebɔ kɔkɔ eshi je lɛŋ shihilɛ mli yeyeeyefeemɔi ni wɔɔha enyɛ wɔnɔ vii lɛ. (Mat. 24:36-39; Luka 21:34, 35) Akɛni amanehulu kpeteŋkpele lɛ baanyɛ afɛ be fɛɛ be hewɔ lɛ, esa jogbaŋŋ akɛ wɔɔbo Yesu kɔkɔbɔɔ lɛ toi akɛ: “Nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.” (Mat. 24:44) Mɛni baanyɛ aye abua wɔ yɛ enɛ gbɛfaŋ?
2 Yeyeeyefeemɔi kɛ Nibii ni Gbalaa Mɔ Jwɛŋmɔ ni Wɔɔwu Wɔshi: Mumɔŋ tsɔnei ni esa akɛ wɔbu wɔhe kɛjɛ he lɛ ateŋ ekome ji “daaŋ ŋmaa he haomɔi.” (Luka 21:34) Yɛ shikpɔji komɛi anɔ lɛ, ohia, nitsumɔ ni bɛ, kɛ nibii ajara ni wa haa ebafeɔ nɔ ni wa waa akɛ abaaná shihilɛ mli hiamɔ nibii. Yɛ shikpɔji krokomɛi anɔ lɛ, heloonaa nibii anaabuamɔ ji nɔ ko ni yaa nɔ waa diɛŋtsɛ. Kɛji akɛ heloonaa nibii ahe susumɔ bɔi wɔjwɛŋmɔ mlibotemɔ babaoo lɛ, no lɛ fiofio lɛ, wɔjwɛŋmɔ jeɔ Maŋtsɛyeli lɛ he nibii ni yɔɔ diɛŋtsɛ lɛ anɔ. (Mat. 6:19-24, 31-33) Kristofoi akpeei yeɔ ebuaa wɔ ni wɔjwɛŋmɔ hiɔ nɔ be fɛɛ be. Ani okɛfee oti ni ma ohiɛ akɛ obaaya kpee fɛɛ kpee?—Heb. 10:24, 25.
3 Nibii ni gbalaa mɔ jwɛŋmɔ ni baanyɛ aŋɔ wɔbe ni jara wa yɛ gbɛ ni waaa nɔ lɛ eyi je lɛŋ obɔ̃ ŋmɛnɛ. Kɔmpiuta ni akɛtsuɔ nii baanyɛ afee tsɔne kɛha mɔ ko kɛji akɛ eyeɔ be babaoo kɛtaoɔ nibii yɛ Internet lɛ nɔ, ekaneɔ E-mail ni eŋmalaa eko kɛmajeɔ, loo ekɛ ehe woɔ kɔmpiuta nɔ shwɛmɔi amli. Abaanyɛ aye be ni fa babaoo yɛ tɛlivishiŋ, sinii, hiɛtserɛjiemɔi, je lɛŋ woji akanemɔ, kɛ kpɔiaŋgbɔlemɔ nifeemɔi ahe, ní wɔnáŋ be kɛ gbɔmɔtsoŋ hewalɛ ni fa kɛhaŋ mumɔŋ nibii asɛɛtiumɔ. Yɛ be mli ni hiɛtserɛjiemɔ kɛ hejɔɔmɔ baanyɛ ekɛ tsuiwoo ni hiɔ shi be fioo ko aba lɛ, teemɔŋ Biblia nikasemɔ kɛ weku Biblia mli nikasemɔ kɛ sɛɛnamɔi ni hiɔ shi daa baa. (1 Tim. 4:7, 8) Ani oheɔ be kɛjwɛŋɔ Nyɔŋmɔ Wiemɔ lɛ nɔ daa gbi?—Efe. 5:15-17.
4 Kwɛ bɔ ni wɔbaanyɛ wɔda shi babaoo akɛ Yehowa asafo lɛ eto mumɔŋ tsɔsemɔ he gbɛjianɔ bɔni afee ni eye ebua wɔ ni ‘wɔnyɛ nii ni baaba nɛɛ fɛɛ mli wɔje, ní wɔnyɛ gbɔmɔ bi lɛ hiɛ wɔdamɔ’! (Luka 21:36) Eba akɛ wɔkɛ nɛkɛ mumɔŋ gbɛjianɔtoi nɛɛ fɛɛ baatsu nii yɛ gbɛ kpakpa nɔ ni ‘wɔsaa wɔhe wɔto’ bɔni afee ni wɔhemɔkɛyeli lɛ afee “yijiemɔ kɛ woo kɛ anunyam yɛ Yesu Kristo kpojiemɔ lɛ mli.”—1 Pet. 1:7.