Sanebimɔ he

◼ Te wɔɔfee tɛŋŋ wɔtsu asafoŋ kpeei ashishi nifeemɔi ahe nii yɛ be naa?

Be hoɔ oyayaayai be mli ni wɔkɛ nanemɛi náa nɔ ko kpakpa mli ŋɔɔmɔ. Yɛ yiŋtoo nɛɛ hewɔ lɛ, ebaanyɛ efee nɔ ni wa akɛ aaatsu kpeei ashishi nifeemɔi ahe nii yɛ be ni ato lɛ naa. Mɛni baanyɛ aye abua?

Jee shishi yɛ be naa. Kɛji akɛ asafo muu lɛ fɛɛ babua amɛhe naa lɛ, ebaafee nɔ ni yeɔ ebuaa akɛ aaakɛɛ toibolɔi lɛ koni amɛtara shi yɛ miniti kome loo enyɔ ni eshwɛ dani nifeemɔ lɛ baaje shishi lɛ mli, bɔni afee ni kpee lɛ aje shishi yɛ be ni ato lɛ naa yɛ gbɛjianɔtoo naa. (Jaj. 3:1) Esaaa akɛ ahaa kpeei ni afeɔ yɛ kui bibii amli, tamɔ kpee kɛha shiɛmɔyaa lɛ, kpeɔ sɛɛ kɛ yiŋtoo akɛ akɛmiimɛ mɛi ni ekolɛ amɛbaakpe sɛɛ kɛba lɛ.

Saamɔ ohe jogbaŋŋ. Gbɛ kome ni aaatsɔ nɔ atsu nifeemɔi ahe nii yɛ be naa lɛ ji he ni aaasaa kɛtsɔ hiɛ. Ha yiŋtoo ni yɔɔ nifeemɔ lɛ sɛɛ lɛ ahi ojwɛŋmɔ mli. Kadimɔ otii titri ni yɔɔ mli lɛ, ni oma enɛɛmɛi anɔ mi. Kaawie nibii krokomɛi ni he ehiaaa tsɔ lɛ ahe babaoo. Ha wiemɔ lɛ afee nɔ ni yɔɔ mlɛo. Kɛji akɛ nɔkwɛmɔnii loo sanegbaa fata nifeemɔ lɛ he lɛ, no lɛ tsɔ hiɛ ni osaa ohe. Kɛ ebaahi lɛ, okɛ be ato onifeemɔ lɛ he be mli ni osaa ohe ni ofeɔ kɛ gbeewalɛ lɛ.

Jaramɔ onifeemɔ lɛ mli. Kɛji akɛ onifeemɔ lɛ ji wiemɔ ni ahaa loo toibolɔi kɛ sanegbaa jio, obaana akɛ eji nɔ ni yeɔ ebuaa kɛji akɛ ojara nifeemɔ lɛ mli owo fãi bibii amli. Kpɛɛ oyiŋ yɛ be falɛ ni okɛbaatsu fã fɛɛ fã he nii lɛ he, ni okadi enɛ yɛ onifeemɔ he wolo lɛ naabugbɛ. No sɛɛ lɛ, kwɛmɔ bɔ ni okɛ be lɛ tsuɔ nii ohaa lɛ kpitiokpitio yɛ nifeemɔ be lɛ mli. Yɛ toibolɔi kɛ sanegbaa mli lɛ, kwa hetooi babaoo ni oooŋmɛ gbɛ yɛ nifeemɔ lɛ shishijee mli lɛ he tsɔne, ni baaha okɛ oyaiyeli atsu saji otii titri ni baaje kpo yɛ sɛɛ mli lɛ ahe nii lɛ. Esa akɛ Buu-Mɔɔ nikasemɔ nɔkwɛlɔi lɛ ashi be ni fa bɔ ni sa kɛha akrabatsa ni akɛtiɔ saji amli lɛ he susumɔ yɛ naagbee mli. Esa akɛ amɛkwɛ jogbaŋŋ hu koni amɛkaye kɛbote be ni ato kɛha naagbee lala kɛ sɔlemɔ lɛ mli.

Gbee naa yɛ be naa. Kɛji akɛ kpee ko hiɛ fãi srɔtoi, tamɔ Sɔɔmɔ Kpee lɛ ji lɛ, esa akɛ wielɔ fɛɛ wielɔ hiɛ ahi ehe nɔ yɛ be ni enɔ lɛ jeɔ shishi kɛ be ni egbeɔ naa lɛ he. Mɛni abaanyɛ afee kɛji akɛ kpee lɛ miikpe sɛɛ? Nyɛmimɛi ni baatsu fãi krokomɛi ahe nii lɛ ateŋ mɔ kome loo nɔ ni fe nakai baanyɛ atsu be lɛ he nii kɛtsɔ otii titri ni amɛaagbala jwɛŋmɔ kɛya nɔ, ní amɛwieŋ nibii ni he ehiaaa tsɔ ahe lɛ nɔ. Nyɛmɔ ni akɛfeɔ enɛ lɛ ji tsɔɔlɔ ni he esa lɛ kadimɔnii kome.

Ákɛ toibolɔi lɛ, wɔbaanyɛ wɔye wɔbua nyɛmi ni kwɛɔ nikasemɔ lɛ nɔ lɛ kɛtsɔ wɔ saji ahetoo ni wɔɔha efee kuku ni ekɔ oti lɛ he lɛ nɔ. Belɛ, wɔ fɛɛ wɔbaanyɛ wɔye wɔbua kɛha kpeei ni afeɔ yɛ gbɛ ni “yɔɔ fɛo kɛ gbɛnaa gbɛnaa” lɛ nɔ.—1 Kor. 14:40.