Gbɛtsɔɔmɔi Kɛha Mɛi ni Tsuɔ Sɔɔmɔ Kpee lɛ Fãi Srɔtoi lɛ Ahe Nii

Kɛjɛ Wɔ Maŋtsɛyeli Sɔɔmɔ nɛɛ nɔ kɛyaa lɛ, akɛ wiemɔi ni shishinumɔ waaa baatsu nii yɛ Sɔɔmɔ Kpee he gbɛjianɔtoo lɛ mli. Gbɛtsɔɔmɔi kɛ kaimɔi ni nyiɛ sɛɛ nɛɛ kɛ saji krokomɛi baafata sane ni yitso ji “Bɔ ni Wɔɔfee Wɔsaa Wɔhe Kɛha Sɔɔmɔ Kpee Lɛ” ni yɔɔ May 2009 Wɔ Maŋtsɛyeli Sɔɔmɔ lɛ mli lɛ he, ni ebaaha emli saji lɛ ashishinumɔ afee faŋŋ.

◼ Wiemɔ: Enɛ ji wiemɔ ni abaadamɔ sane ko ni atsɔɔ akɛ akɛtsu nii lɛ nɔ aha ní toibolɔi kɛ amɛhe wooo mli. Esa akɛ wielɔ lɛ agbala jwɛŋmɔ kɛya sane lɛ mli otii ni he baaba sɛɛnamɔ jogbaŋŋ kɛha asafo lɛ nɔ, moŋ fe nɔ ni eeewie sane muu lɛ fɛɛ he kɛkɛ.

◼ Sanebimɔi kɛ Hetoi: Taakɛ afeɔ Buu-Mɔɔ Nikasemɔ lɛ, akɛ sane kuku baakpa fã nɛɛ hiɛ ni abaamu naa kɛ sane kuku, ni abaabi saji yɛ kukuji lɛ eko fɛɛ eko he. Esaaa akɛ mɔ ni baakwɛ nɔ lɛ wieɔ babaoo. Abaanyɛ akane emli ŋmalɛi otii lɛ bɔ ni be baaŋmɛ gbɛ. Esaaa akɛ akaneɔ kukuji lɛ amli, ja akɛ gbɛtsɔɔmɔ eha akɛ afee nakai.

◼ Sanegbaa: Enɛ ji wiemɔ, shi abaaha toibolɔi kɛ amɛhe awo mli yɛ hei komɛi. Ejeee wiemɔ sɔŋŋ, ni asaŋ ejeee sanebimɔi kɛ hetoi sɔŋŋ.

◼ Nɔkwɛmɔnii kɛ Sanebimɔi: Kɛ́ akɛ gbɛtsɔɔmɔ ha akɛ afee nɔkwɛmɔnɔ lɛ, no lɛ, esa akɛ nyɛmi nuu ni baatsu fã nɛɛ he nii lɛ aha afee nɔkwɛmɔnɔ; esaaa akɛ lɛ diɛŋtsɛ efeɔ nɔkwɛmɔnɔ lɛ. Esa akɛ mɛi ni ebaahala ni amɛfee nɔkwɛmɔnɔ lɛ afee mɛi ni baanyɛ afee lɛ jogbaŋŋ, ni agbɛnɛ hu amɛbaa amɛjeŋ jogbaŋŋ akɛ Kristofoi, ni kɛ́ eeehi lɛ, esa akɛ etsɔ hiɛ kwraa ni ekɛ amɛ ato he gbɛjianɔ. Efeŋ nɔ ni sa ákɛ akɛ shiɛlɔi hei ni bɛ niiashikpamɔi baatsu nii kɛfee nɔkwɛmɔnɔ koni akɛha amɛná hegbɛ kɛba wiemɔ kpoku lɛ nɔ kɛkɛ, eyɛ mli moŋ akɛ abaanyɛ akɛ amɛteŋ mɛi komɛi atsu nii akɛ shĩatsɛmɛi. Esaaa akɛ shiɛlɔi ni feɔ nɔkwɛmɔnɔ lɛ tsɔɔ amɛsɛɛ amɛhaa toibolɔi lɛ. Esa akɛ aha mɛi ni abaabibii amɛ saji lɛ aya wiemɔ kpoku lɛ nɔ ni amɛjɛ jɛmɛ amɛha sanebimɔi lɛ ahetoo, shi esaaa akɛ amɛtaraa toibolɔi lɛ ateŋ amɛfeɔ nakai. Esa akɛ afee nɔkwɛmɔnii kɛ sanebimɔi lɛ akwɛ dã. Kɛ́ aye be fe nine yɛ kpee lɛ shishi, ni no hewɔ lɛ esa akɛ nyɛmi nuu ni eshɛ enɔ lɛ afo efã lɛ nɔ kuku lɛ, esaaa akɛ ejieɔ nɔkwɛmɔnii loo sanebimɔi lɛ kɛjɛɔ enifeemɔ lɛ mli. Esa akɛ asafoŋ sɔɔlɔi abi onukpai akuu lɛ saji ahe gbɛjianɔtolɔ lɛ loo onukpa kroko dani ehala mɛi ni ekɛbaatsu nii lɛ.

Kɛji akɛ gbɛtsɔɔmɔi pɔtɛɛ komɛi ha yɛ Sɔɔmɔ Kpee lɛ fã krɛdɛɛ ko he lɛ, esa akɛ anyiɛ sɛɛ pɛpɛɛpɛ. Kɛ́ nyɛmimɛi hii lɛ tsu Sɔɔmɔ Kpee lɛ fãi srɔtoi lɛ ahe nii taakɛ atsɔɔ kɛtsɔ hiɛ lɛ, ebaaha afee Sɔɔmɔ Kpee lɛ yɛ gbɛ ni “yɔɔ fɛo kɛ gbɛnaa gbɛnaa” nɔ.—1 Kor. 14:40.