Nyɛkwɛa Bɔ ni Nyɛkɛ Nyɛbe Tsuɔ Nii lɛ Jogbaŋŋ
1. Mɛɛ kaa mɛi ni yɔɔ he fɛɛ he lɛ kɛkpeɔ ŋmɛnɛ?
1 Yɛ wɔbei nɛɛ amli ni aná gbɛ̀i srɔtoi ni atsɔɔ nɔ akɛbáa be kɛ nitsumɔ yi lɛ, etamɔ nɔ ni mɛi babaoo yɛ nibii pii ni amɛbaatsu kɛ be fioo ni amɛkɛaatsu enɛɛmɛi ahe nii. Ani efeɔ kaa kɛhaa bo akɛ ooohiɛ mumɔŋ nifeemɔ gbɛ kpakpa ni ato he gbɛjianɔ lɛ mli? Ani oshweɔ ni kulɛ oyɛ be babaoo kɛha sɔɔmɔ nitsumɔ lɛ? Te wɔɔfee tɛŋŋ wɔkɛ wɔbe atsu nii jogbaŋŋ kɛmɔ shi?—Lala 90:12; Fil. 1:9-11.
2, 3. Mɛɛ kaa tsɔji ni akɛleɔ saji kɛbaa, ni te wɔteŋ mɔ fɛɛ mɔ aaafee tɛŋŋ apɛi lɛ diɛŋtsɛ eshihilɛ mli ekwɛ?
2 Yɔsemɔ Nibii ni Fiteɔ Be: Esa akɛ wɔ fɛɛ wɔpɛi bɔ ni wɔkɛ wɔbe tsuɔ nii wɔhaa lɛ mli yɛ be kɛ bei amli. Biblia lɛ woɔ hewalɛ akɛ: “Nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã he nii, ejaakɛ gbii nɛɛ gbii fɔji ni.” (Efe. 5:15, 16) Susumɔ naagbai ni tsɔji ni akɛleɔ saji amli ni hiɛyaai kɛba lɛ he okwɛ. Eyɛ mli akɛ anyɛɔ akɛ kɔmpiutai kɛ ilɛtrɔnik tsɔji krokomɛi tsuɔ nii yɛ gbɛ ni ja nɔ moŋ, shi amɛbaanyɛ amɛtsɔ tsɔne ni duɔ mɔ kɛji wɔkwɛɛɛ bɔ ni wɔkɛ wɔbe tsuɔ nii lɛ jogbaŋŋ.—1 Kor. 7:29, 31.
3 Esa akɛ wɔteŋ mɔ fɛɛ mɔ abi ehe akɛ: ‘Ani mifiteɔ be kɛkaneɔ loo mikɛ haa E-mail shɛɛsaji ni woɔ mɔ mli la kɛkɛ lɛ ahetoo daa gbi? Ani mifɔɔ tɛlifoŋ tswaa loo mikɛ ilɛtrɔnik shɛɛsaji majeɔ yɛ saji ni he ehiaaa ahe? (1 Tim. 5:13) Ani mikpaa Internet lɛ nɔ kɛkɛ ni yiŋtoo ko bɛ he loo migbeleɔ tɛlivishiŋ nɔ nifeemɔi kɛjɛ he kome kɛyaa he kroko kɛkɛ beni mikwɛɔ lɛ? Ani ilɛtrɔnik nɔ shwɛmɔi ebɔi mibe ni mikɛkaseɔ Nyɔŋmɔ Wiemɔ lɛ hemɔ?’ Nibii ni tamɔ nɛkɛ lɛ asɛɛtiumɔ baanyɛ afite wɔmumɔŋ shidaamɔ.—Abɛi 12:11.
4. Mɛɛ tsakemɔ oblanyo ko fee, ni mɛni hewɔ?
4 Ni Wɔkɛ Be Aaatsu Nii yɛ Nilee Mli: Ilɛtrɔnik tsɔji náa wɔbe kɛ wɔjwɛŋmɔ fɛɛ nɔ hewalɛ. Oblanyo ko ni kɛ ehe wo kɔmpiuta nɔ shwɛmɔi amli waa lɛ kpɛlɛ nɔ akɛ: “Bei komɛi lɛ, kɛji mikɛ mihe wo mli dani mitee shiɛmɔ loo Kristofoi akpee lɛ, ewaa waa diɛŋtsɛ akɛ mijwɛŋmɔ aaahi nibii anɔ. Bei babaoo lɛ mifɔɔ bɔ ni mafee matsu shwɛmɔi lɛ amli naagba ko he nii kɛ́ miku misɛɛ kɛtee shia lɛ he susumɔ. Esa miteemɔŋ nikasemɔ kɛ daa Biblia kanemɔ he waa diɛŋtsɛ. Miishɛɛ ni miyɔɔ yɛ Nyɔŋmɔ sɔɔmɔ mli lɛ bɔi shibaa.” Akɛni eyɔse akɛ ehe miihia ni efee tsakemɔi hewɔ lɛ, ejie shwɛmɔi lɛ fɛɛ kɛjɛ ekɔmpiuta lɛ nɔ. Ekaiɔ akɛ: “Nakai feemɔ wa waa diɛŋtsɛ. Mikɛ mihe kpɛtɛ shwɛmɔi ahe waa fe bɔ ni misusu. Shi miná kunimyeli henumɔ ni mli wa ejaakɛ mile akɛ mifee nakai yɛ mihilɛ-kɛhamɔ hewɔ.”—Mat. 5:29, 30.
5. Te wɔɔfee tɛŋŋ wɔna dekã wɔha mumɔŋ nibii asɛɛtiumɔ, ni mɛɛ gbɛ nɔ nakai feemɔ he baa sɛɛnamɔ kɛhaa wɔ yɛ?
5 Ehe baahia ni okɛ nifeemɔ gbɛ̀i ni tamɔ nɛkɛ atsu nii kɛ́ hei komɛi yɛ ni ehe miihia ni ofee tsakemɔi. Ani obaanyɛ oná dekã ŋmɛlɛtswaa fã daa gbi kɛjɛ nifeemɔi ni he ehiaaa lɛ amli? Nakai be lɛ aaanyɛ afee be ni ebaahe bo ni okɛgbe Biblia muu lɛ fɛɛ kanemɔ naa yɛ afi mli. Mɛɛ mumɔŋ sɛɛnamɔ po eeeji nɛkɛ! (Lala 19:8-12; 119:97-100) Too bei pɔtɛɛ oha Biblia kanemɔ, hesaamɔ kɛha kpeei, kɛ shiɛmɔ nitsumɔ lɛ. (1 Kor. 15:58) Enɛ baaye abua bo ni onyɛ okudɔ nibii ni fiteɔ be lɛ, ni ebaaye ebua bo koni ‘oyoo nii ni ji Nuŋtsɔ lɛ suɔmɔnaa nii lɛ’—Efe. 5:17.