Gbɔmɔtsoŋ Hesaamɔ ni He Tse, ni Sa Yijiemɔ
1. Mɛni hewɔ esa akɛ wɔtsɔ hiɛ wɔsusu wɔhesaamɔ he be ni wɔtoɔ gbɛjianɔ kɛha kpokpaa wulu nɔ kpee lɛ yaa lɛ?
1 “Yehowa Odasefoi ji gbɔmɛi kpakpai diɛŋtsɛ! Nyɛ webii lɛ amli jɔ ni amɛsaa amɛhe jogbaŋŋ, ni amɛjieɔ bulɛ ni mli kwɔ kpo.” Nɛkɛ ji bɔ ni nuu ko ni tsuɔ nii yɛ gbɔiatoohe ko lɛ wie yɛ nyɛmimɛi hii kɛ yei ni tee kpokpaa wulu nɔ kpee ko ni afee nyɛsɛɛ afi lɛ ahe. Gbɔiatoohe nitsulɔ ko hu wie yɛ kpee kroko he akɛ: “Eka shi faŋŋ akɛ nyɛ webii lɛ saa amɛhe koni esa Nyɔŋmɔ hiɛ.” Hɛɛ, mɛi krokomɛi yɔseɔ mɛi ni yaa kpee lɛ. No hewɔ lɛ esa akɛ wɔsaa wɔhe ‘bɔ ni sa sanekpakpa lɛ,’ ni bei pii lɛ, enɛ etsirɛɔ mɛi ni jeee Odasefoi lɛ koni amɛjie wɔyi, ni no haa efeɔ faŋŋ akɛ wɔji Nyɔŋmɔ sɔɔlɔi. (Fil. 1:27) Be ni wɔtoɔ gbɛjianɔ kɛha kpokpaa wulu nɔ kpee lɛ yaa lɛ, esa jogbaŋŋ akɛ wɔɔtsɔ hiɛ wɔsusu wɔgbɔmɔtsoŋ hesaamɔ he.
2. Mɛni hewɔ ewa ákɛ mɔ aaawo atade ni esaa ehe yɛ hetsemɔ mli lɛ?
2 Kaselɔ Yakobo ŋma akɛ: “Nilee ni jɛ ŋwɛi lɛ, tsutsu lɛ ehe tse.” (Yak. 3:17) Hetsemɔ kpo ni wɔɔjie yɛ wɔhesaamɔ mli lɛ baanyɛ afee nɔ ni wa. Satan jeŋ ni ekpɔtɔ lɛ nyɛɔ mɛi anɔ koni amɛkɔ hesaamɔ ni esaaa, ni teeɔ bɔlɛnamɔ henumɔi ashi, ni yɔɔ srɔto, ni ehiii. (1 Yoh. 2:15-17) No hewɔ lɛ, kɛ́ wɔmiikpɛ wɔyiŋ yɛ atadewoo kɛ hesaamɔ he lɛ, esa akɛ wɔbo kɔkɔ ni Biblia lɛ bɔ akɛ “wɔkwa nɔshafeemɔ kɛ je nɛŋ akɔnɔi lɛ, ni wɔkɛ jwɛŋmɔ kpakpa . . . ahi shi yɛ je nɛŋ” lɛ toi. (Tito 2:12) Wɔsumɔŋ kɔkɔɔkɔ akɛ wɔhesaamɔ lɛ aaagba mɛi krokomɛi anaa, kɛ́ amɛji wɔnyɛmimɛi, mɛi ni tsuɔ nii yɛ niyelihei kɛ gbɔiatoohei, loo mɛi krokomɛi jio.—1 Kor. 10:32, 33.
3. Mɛɛ sanebimɔi baaye abua wɔ koni wɔpɛi wɔgbɔmɔtsoŋ hesaamɔ mli wɔkwɛ?
3 Atade ni Sa, ni Yɔɔ Hiŋmɛi Nɔ: Kɛ́ ooto gbɛjianɔ kɛha kpee lɛ, bo diɛŋtsɛ bi ohe akɛ: ‘Ani mitade lɛ sa, loo egbalaa jwɛŋmɔ kɛbaa minɔ bɔ ni esaaa? Ani ejieɔ bulɛ kpo etsɔɔ mɛi krokomɛi ahenumɔi? Ákɛ yoo lɛ, ani miŋwɛi gbɛ atade lɛ kuɛ eba shi tsɔ, loo ehaa mimusu nɔ kãa? Ani mitade lɛ tɛŋɔ migbɔmɔtso loo emɔɔ mi kpɛŋŋ? Ani mitade lɛ he tse ni emli ejeee fu? Ekolɛ atade pɔtɛɛ ko ji nɔ ni eba nɔ, shi ani aŋmɛɔ gbɛ akɛ awo kɛba Maŋtsɛyeli Asa lɛ nɔ? Kɛ́ miyaŋɔ leebi niyenii ni gbɔiatoohe lɛ kɛhaa loo miijɔɔ mihe be ni akpa kpee lɛ, ani mawo atade ni he tse keŋkeŋ ni sa Kristofonyo, loo mawo atade ni ewo muji, ni tsɔɔ akɛ miidi hesaamɔ ni eba nɔ lɛ sɛɛ, ni bɛ hiŋmɛi nɔ, ni ehiii kɛha kpeeyalɔ ni tsɛ tsitsinaa-tsɛɛ nii? Ani atade ni mawo be ni mijɔɔ mihe lɛ baaha efee mi hiɛgbele akɛ maye trukaa odase?’—Rom. 15:2, 31; 1 Tim. 2:9.
4. Mɛɛ gbɛ nɔ mɛi krokomɛi baanyɛ atsɔ aye abua wɔ koni wɔkɛ hetsemɔ asaa wɔhe?
4 Kristofoi ni edara lɛ aŋaawoo ni wɔkɛaatsu nii lɛ baanyɛ aye abua wɔ. Esa akɛ ŋamɛi abi amɛwumɛi ajwɛŋmɔ yɛ bɔ ni mɛi krokomɛi baana amɛ atadei lɛ amɛha lɛ he. Fɔlɔi ni sheɔ Nyɔŋmɔ gbeyei lɛ baanyɛ aye abua amɛbii lɛ yɛ enɛ gbɛfaŋ. Agbɛnɛ hu, nyɛmimɛi yei ni edara ni baa amɛjeŋ jogbaŋŋ lɛ baanyɛ “amɛtsɔɔ oblayei lɛ ni . . . amɛhiɛ akã shi, amɛhe atse” yɛ amɛhesaamɔ mli, “koni akawie Nyɔŋmɔ wiemɔ lɛ he musubɔɔ wiemɔ.” (Tito 2:3-5) Akɛ atadei ni sa, ni yɔɔ hiŋmɛi nɔ lɛ ahe mfonirii ni yeɔ buaa woɔ wɔwoji lɛ amli.
5. Wɔ fɛɛ wɔbaanyɛ wɔjie Yehowa yi be ni afeɔ kpee lɛ yɛ mɛɛ gbɛ nɔ?
5 Jiemɔ Yehowa Yi: Kpokpaa wulu nɔ kpeei haa wɔkɛ mɛi ni haa wiemɔ lɛ fɛɛ náa hegbɛ ni nɔ bɛ kɛjieɔ Yehowa yi. Yɛ anɔkwale mli lɛ, wɔ Kristofoi ajeŋba kɛ wiemɔ baawo ehiɛnyam. Shi nɔ klɛŋklɛŋ ni mɛi yɔseɔ yɛ wɔhe ji wɔtadewoo kɛ wɔhesaamɔ. Nyɛhaa wɔ fɛɛ wɔkɛ gbɔmɔtsoŋ hesaamɔ ni he tse, ni sa yijiemɔ ajiea Yehowa yi.—Lala 148:12, 13.
[Caption on page 6]
Nibii ni Haa Hesaamɔ Feɔ Nɔ ni Sa Yijiemɔ
◼ Nyɔŋmɔ Wiemɔ lɛ
◼ Mɔ diɛŋtsɛ mlipɛimɔ
◼ Mɛi krokomɛi aŋaawoi
◼ Kristofoi awoji