Jiemɔ Yehowa Yi yɛ Asafo Kpele lɛ Mli
1, 2. Mɛɛ hegbɛ kpokpaa wulu nɔ kpee haa wɔnáa, ni mɛɛ gbɛ̀i anɔ wɔbaanyɛ wɔtsɔ wɔtsu enɛ he nii?
1 Wɔkpokpaa wulu nɔ kpeei ni wɔfeɔ daa afi lɛ haa wɔnáa hegbɛ ni nɔ bɛ ni wɔkɛaajie Yehowa yi. Wɔnuɔ he taakɛ David, ni lá akɛ: “Madao shi yɛ asafo kpele mli, majie oyi yɛ mɛi pii ateŋ” lɛ nu he lɛ. (Lala 35:18) Te wɔɔfee tɛŋŋ wɔná nɔmimaa akɛ wɔ fɛɛ wɔbaajie Yehowa yi yɛ “Nyɔŋmɔ Toi ni Aaabo” Kpokpaa Wulu nɔ Kpee ni kã wɔhiɛ lɛ shishi lɛ?
2 Gbɛ kome ni wɔbaanyɛ wɔtsɔ nɔ wɔfee enɛ ji kɛtsɔ wɔjeŋba nɔ. Mɛi ni kwɛɔ he ko ni ayafee kpee ko yɛ lɛ nɔ lɛ kɛɛ akɛ: “Kpeei ni nyɛbafeɔ yɛ biɛ lɛ hewɔ lɛ, wɔkɛɛ jamɔ kui krokomɛi ni miisumɔ ni akɛ biɛ ahai amɛ lɛ akɛ amɛbakwɛ bɔ ni Yehowa Odasefoi feɔ kpee amɛhaa, ejaakɛ nyɛyɛ gbɛjianɔtoo ni nɔ bɛ.” Wɔteŋ mɔ fɛɛ mɔ baanyɛ atsɔ ehesaamɔ, ekome ni ekɛ mɛi aaafee, kɛ ejeŋba nɔ eha wɔná yijiemɔ wiemɔi ni tamɔ nɛkɛ, nɔ ni sa Nyɔŋmɔ kome too lɛ.—1 Pet. 2:12.
3, 4. Hiɛshikamɔ baaye abua wɔ koni wɔsaa wɔhe yɛ gbɛ ni sa sɔɔlɔi ni ji Kristofoi yɛ kpee lɛ shishi kɛ agbɛnɛ hu kɛ́ akpa kpee lɛ yɛ mɛɛ gbɛ nɔ?
3 Hesaamɔ: Kɛ́ wɔtadewoo kɛ wɔhesaamɔ baaha ajie Yehowa yi lɛ, no lɛ ebiɔ ni wɔhiɛ akã shi. (1 Tim. 2:9) Sɔɔmɔ Skul wolo lɛ baafa 132 lɛ kɛɔ akɛ: “Mɔ ni hiɛ kã shi lɛ kwɛɔ koni ekawo mɛi krokomɛi amli la bɔ ni esaaa, ni ekagbala jwɛŋmɔ kɛmiiba lɛ diɛŋtsɛ enɔ.” Atadei ni bɛ hiŋmɛi nɔ ebu yɛ maji babaoo nɔ. Yei woɔ atadei ni mɔmɔɔ amɛ loo atadei kukuji, loo atadei ni agbá he kɛba ŋwɛi tsɔ, ni enɛ bafeɔ nɔ ni bɛ hiŋmɛi nɔ, titri lɛ kɛ́ amɛta shi. Shi Yehowa hiɛ sɔɔ mɔdɛŋ ni wɔbɔɔ koni wɔdamɔ enajiaŋ jogbaŋŋ lɛ. (Bɔf. 15:14) Eyɛ mli akɛ ekolɛ abaafee kpee lɛ yɛ tsu ko ni ahai mli loo yɛ agbo naa moŋ, shi henaabuamɔ nɛɛ bafeɔ ‘wɔsafo kpele’ yɛ gbii etɛ ni akɛbaafee kpee lɛ mli. No hewɔ lɛ, kɛ́ wɔmiiya ni wɔyabua wɔhe naa yɛ Yehowa hiɛ lɛ, esa akɛ wɔkɛ bulɛ asaa wɔhe akɛ mɛi ni miiya amɛyadamɔ Mɔ ni nɔ kwɔ fe fɛɛ yɛ shikpɔŋ lɛ nɔ lɛ hiɛ. (1 Kron. 29:11) Enɛ baaha wɔkwa hesaamɔi ni yɛ anɔkwale mli lɛ wɔkɛyaŋ asafoŋ kpeei ashishi lɛ, tamɔ trɔzai loo trɔza kɛ enɔ kootu ni nyɛmimɛi yei lɛ aaawo nɛkɛ.
4 Ehe miihia hu ni wɔkwɛ bɔ ni wɔsaa wɔhe wɔhaa gbi fɛɛ gbi kɛ́ akpa kpee lɛ hu jogbaŋŋ. Eyɛ mli akɛ kɛ́ wɔyaahere kɔɔyɔɔ loo wɔyaaye nii yɛ niyelihe ko lɛ, ekolɛ wɔbaasumɔ ni wɔwo atadei ni baaha wɔhe ajɔ wɔ jogbaŋŋ moŋ, shi ehe miihia ni loloolo lɛ wɔtadewoo kɛ wɔhesaamɔ lɛ afee nɔ ni sa mɛi ni “tsɔɔ amɛhe akɛ Nyɔŋmɔ jálɔi lɛ.” (1 Tim. 2:10) Jeee atade ni eba nɔ yɛ je lɛ mli lɛ nɔ adamɔɔ anaa akɛ atade ko sa. (1 Yoh. 2:16, 17) Atadei ni sa, ni akɛ hiɛ ni gboɔ nɔ woɔ, ní esa jogbaŋŋ akɛ hii kɛ yei awo yɛ hei srɔtoi lɛ ahe mfonirii yɛ wɔ-Kristofoi awoji lɛ amli. Wɔtsitsinaa tsɛɛ nii lɛ ni wɔtsɛɔ yɛ maŋ ni afeɔ kpee lɛ yɛ mli lɛ kaiɔ mɛi akɛ wɔji sɔɔlɔi Kristofoi be fɛɛ be.—2 Kor. 6:3, 4.
5, 6. Mɛɛ gbɛ nɔ wɔbaanyɛ wɔtsɔ wɔjie bulɛ kpo wɔtsɔɔ Yehowa mumɔŋ okpɔlɔ lɛ?
5 Ná Bulɛ Oha Yehowa Okpɔlɔ Lɛ: Jeŋ muu fɛɛ Nuŋtsɔ Maŋtsɛ lɛ eŋmɛ wɔ okpɔlɔ. (Yes. 25:6; 1 Kor. 10:21) Kɛ́ wɔhiɛ sɔɔ Yehowa mumɔŋ okpɔlɔ lɛ nɔ nii ni wɔɔye lɛ jogbaŋŋ lɛ, no lɛ wɔbaaha efee oti ni ma wɔhiɛ akɛ wɔbaaya gbii etɛ ni akɛbaafee kpee lɛ fɛɛ. Ani oto gbɛjianɔ kɛha wɔɔhe kɛ tsɔne, ni obi onitsumɔtsɛ lɛ gbɛ? Ani oto be ni fa bɔ ni sa kɛha gbɛjianɔtoo kɛ gbɛfaa koni obashɛ kpee lɛ shishi mra bɔ ni sa ní otao he ni obaata, ní okɛ onyɛmimɛi lɛ agba sane, koni ofata amɛhe kɛjie Yehowa yi kɛtsɔ lala kɛ sɔlemɔ ni akɛbaaje shishi lɛ nɔ?—Lala 147:1.
6 Bulɛ ni wɔyɔɔ kɛha Yehowa okpɔlɔ lɛ baatsirɛ wɔ koni wɔbo wiemɔi lɛ atoi jogbaŋŋ, ni wɔkwa wiemɔi ni he bɛ sɛɛnamɔ ni wɔkɛ mɛi aaawie, niyeli, loo ni wɔɔkpa shi be ni kpee lɛ miiya nɔ. Yehowa miitsɔ tsulɔ anɔkwafo kɛ nilelɔ lɛ nɔ ekɛ mumɔŋ niyenii ni he hiaa wɔ amrɔ nɛɛ lɛ miiha wɔ. (Mat. 24:45) Esaaa akɛ enɛ eko ŋmɛɛɔ wɔteŋ mɔ ko. Esa akɛ fɔlɔi kɛ amɛbii lɛ atara shi ni amɛye amɛbua amɛ ní amɛná kpee lɛ he sɛɛ jogbaŋŋ.—5 Mose 31:12.
7. Mɛni abiɔ akɛ wɔfee yɛ wɔshwane niyenii lɛ he, ni mɛni hewɔ?
7 Aabi ni wɔkɛ shwane niyenii aba moŋ fe nɔ ni wɔbaashi kpee lɛ shishi kɛyahe niyenii, aiskrim loo nu ni mli ejɔ yɛ nihɔɔlɔi lɛ aŋɔɔ kɛ́ akpa leebi kpee lɛ. Esa yijiemɔ jogbaŋŋ akɛ nyɛsɛɛ afi lɛ kpeeyalɔi lɛ ateŋ mɛi pii kɛ gbɛtsɔɔmɔ nɛɛ tsu nii jogbaŋŋ. Kwɛ bɔ ni ebaafee nɔ ni hi jogbaŋŋ akɛ wɔ fɛɛ, ní wɔbii lɛ hu fata he lɛ, aaafee nakai nɔŋŋ afi nɛɛ hu! (Heb. 13:17) Gbɛjianɔtoo nɛɛ haa wɔnáa hegbɛ ni hi koni wɔkɛ wɔnyɛmimɛi lɛ agba saji ni woɔ mɔ hewalɛ, ni ehaa ekomefeemɔ kɛ toiŋjɔlɛ ni woɔ Yehowa hiɛ nyam lɛ hiɔ agba lɛ shishi.—Lala 133:1.
8, 9. Mɛɛ hegbɛ kroko ni akɛjieɔ Yehowa yi kpee lɛ haa wɔnáa?
8 Trukaa Odaseyeli: Kɛ́ wɔmiiya he ni afeɔ kpee lɛ yɛ loo wɔmiishi jɛmɛ lɛ, wɔnáa hegbɛi babaoo ni baaha wɔkɛ wɔnaabu ajie Yehowa yi. (Heb. 13:15) Kɛ́ wɔmiiye nii yɛ niyelihe ko loo wɔkɛ mɛi ni tsuɔ nii yɛ gbɔiatoohe lɛ miigba sane po lɛ, nyɛhaa wɔtaoɔ gbɛ̀i ni wɔɔtsɔ nɔ wɔye odase. Kpee lɛ baaha mumɔŋ jwetrii pii ayi wɔjwɛŋmɔ kɛ wɔtsuii amli. Nyɛhaa wɔkɛ mɛi ni wɔkɛkpeɔ trukaa lɛ agbaa nibii kpakpai nɛɛ ahe sane.—1 Pet. 3:15.
9 Wɔkɛ miishɛɛ babaoo miikpa hegbɛ nɛɛ gbɛ koni wɔjie Yehowa yi yɛ “gwabɔi amli!” (Lala 26:12) Eba akɛ wɔɔfee ekome kɛjie Yehowa yi yɛ “Nyɔŋmɔ Toi ni Aaabo” Kpokpaa Wulu nɔ Kpee lɛ shishi.
[Akrabatsa ni yɔɔ baafa 5]
Kpokpaa Wulu nɔ Kpee lɛ He Kaimɔi
◼ Nifeemɔ Bei: Kpee lɛ baaje shishi leebi 9:30 gbii etɛ lɛ fɛɛ. Minitii fioo dani kpee lɛ baaje shishi lɛ, sɛinɔtalɔ lɛ baata wiemɔ kpoku lɛ nɔ, ni abaatswa Maŋtsɛyeli lalai yɛ nakai beaŋ. Esa akɛ wɔ fɛɛ wɔtara shi yɛ nɛkɛ be nɛɛ mli, bɔni afee ni kpee lɛ aje shishi yɛ bulɛ gbɛ nɔ. Abaakpa Sohaa kɛ Hɔɔ kpee lɛ gbɛkɛ 5:05, ni abaakpa Hɔgbaa nɔ̃ lɛ gbɛkɛ 4:10.
◼ Tsɔji Amaamɔhei: Akɛni bei pii lɛ hei ni akɛ tsɔji mamɔɔ lɛ edaaa hewɔ lɛ, esa akɛ mɛi ni yɔɔ kar lɛ ayafata mɛi krokomɛi ahe yɛ amɛ kar lɛ mli bɔ ni amɛaanyɛ, moŋ fe nɔ ni mɔ kome loo mɛi enyɔ pɛ kɛ kar aaaba.
◼ Sɛ̃i ni Ashĩɔ Ahaa Mɛi: Obaanyɛ oshi sɛ̃i oha mɛi ni okɛ amɛ tá kar kome mli loo mɛi ni okɛyɔɔ shĩa kome mli.
◼ Woji Akpojiemɔ: Nyɔŋmɔ Wiemɔ lɛ woɔ wɔ hewalɛ koni ‘wɔfee wɔnii fɛɛ yɛ suɔmɔ mli.’ (1 Kor. 16:14) Kɛ́ ajie wolo ko kpo yɛ kpee lɛ shishi lɛ, suɔmɔ kɛ bɔ ni wɔsusuɔ mɛi krokomɛi ahe lɛ haŋ wɔjo foi, wɔfee gidigidi loo wɔtsirɛ mɛi koni wɔyaje liamɔ ni ato lɛ hiɛ kɛyaŋɔ wolo lɛ eko. Kɛ́ akɛ lala kɛ sɔlemɔ emuko kpee lɛ naa lɛ, esaaa akɛ mɔ ko mɔ ko shiɔ he ni eta lɛ kɛyatoɔ liamɔ kɛha wolo lɛ eko ŋɔɔ. Kɛ́ asɔle agbe naa lɛ, esa akɛ mɔ fɛɛ mɔ anyiɛ yɛ gbɛjianɔtoo naa kɛyaŋɔ wolo lɛ eko. Henɔyeli kɛ tsuishitoo ni tamɔ nɛkɛ ni wɔkɛaatsu nii lɛ baaye odase akɛ wɔji Kristofoi ni edara yɛ mumɔŋ, ni etsɔɔ akɛ wɔyɛ suɔmɔ kɛha wɔnyɛmimɛi lɛ.—Yoh. 13:35.
◼ Oniatsumɔi: Afiteɔ shika babaoo kɛtoɔ kpokpaa wulu nɔ kpeei ahe gbɛjianɔ. Wɔbaanyɛ wɔjie hiɛsɔɔ kpo kɛtsɔ wɔtsui mli ni wɔɔjɛ wɔtsu onia yɛ wɔ-Maŋtsɛyeli Asa lɛ nɔ loo yɛ kpee lɛ shishi kɛfi jeŋ muu fɛɛ nitsumɔ lɛ sɛɛ lɛ nɔ. Esa akɛ aŋma “Watch Tower Convention” yɛ tsɛk fɛɛ ni aŋmaa ní akɛye abua kpee lɛ feemɔ lɛ nɔ.
◼ Ní Aaata Shi Kutuu akɛ Weku: Esa akɛ fɔlɔi kɛ amɛbii lɛ atara shi beni kpee lɛ yaa nɔ lɛ moŋ fe nɔ ni amɛaaŋmɛ gbekɛbii lɛ, ní oblahii kɛ oblayei bibii fata he lɛ agbɛ ni amɛkɛ gbekɛbii krokomɛi ayatara shi. Fɔlɔi ni hiɛ yɔɔ amɛhe nɔ lɛ baasumɔ ni amɛkwɛ koni amɛbii lɛ abo wiemɔi lɛ atoi ni amɛŋmala saji komɛi amɛshwie shi.
◼ Shwane Niyenii: Ofainɛ ni okɛ shwane niyenii aba moŋ fe nɔ ni oooshi he ni afeɔ kpee lɛ yɛ lɛ kɛyahe niyenii kɛ́ akpa leebi kpee lɛ. Abaanyɛ akɛwo nɔ ko bibioo ni akɛ nibii ni mli ejɔ woɔ mli ní abaanyɛ akɛwo sɛi lɛ shishi lɛ mli. Akɛ nibii agboi ni akɛ mɛi babaoo aniyenii woɔ mli, glase nibii ni jwaraa, kɛ dãai ni wa akaba he ni afeɔ kpee lɛ yɛ lɛ.
◼ Wiemɔi ni Amɔmɔɔ: Esaaa ákɛ akɛ tsɔne ni akɛmɔmɔɔ wiemɔ ko tsáa kpãa ni sarawa hewalɛ loo wiemɔ tsɔɔ mli lɛ yɛ he ni abaafee kpee lɛ yɛ lɛ, shi abaanyɛ akɛ tsɔji nɛɛ atsu nii yɛ gbɛ ni gbaŋ mɛi krokomɛi anaa pɛ nɔ.
◼ Mfonirishamɔ: Aŋkroaŋkroi komɛi shaa mfonirii ni sɛɛ mli lɛ amɛhɔɔ amɛhaa mɛi ni eba kpee lɛ. Akɛni wɔsumɔɔɔ ni wɔkɛ jarayeli saji baa teokrase henaabuamɔi ashishi hewɔ lɛ, esaaa akɛ wɔshaa mfoniri ní wɔheɔ shika. Esaaa akɛ wɔfɔ̃ɔ mɛi ni shaa mfoniri ni amɛheɔ shika lɛ anine ní amɛbasha wɔ mfoniri.—w84 7/1 bf. 25; kwɛmɔ Ato Wɔhe Gbɛjianɔ lɛ baafa 142, kuku 3 lɛ hu.
◼ Tsɔji Bibii ni akɛ Shɛɛ Haa yɛ nɔ (Pagers) kɛ Tɛlifoŋ ni Kpãa Bɛ Sɛɛ: Esa akɛ ato enɛ he gbɛjianɔ bɔ ni haŋ egbala mɛi ajwɛŋmɔ.
◼ Osharai kɛ Helai ni Mɔɔ Mɔ Trukaa: Ofainɛ kɛ́ hewalɛnamɔ he naagba ko te shi trukaa lɛ, ha mɛi ni kwɛɔ shitaramɔ nɔ lɛ ateŋ mɔ ni bɛŋkɛ bo lɛ ale enɛ, ni ebaawó First Aid Department lɛ toi nɔ amrɔ nɔŋŋ koni mɛi ni he esa ni mɔɔ helai anaa lɛ akwɛ akɛ shihilɛ lɛ yɛ hiɛdɔɔ lo, ní amɛkɛ yelikɛbuamɔ aha.
◼ Gbɔiatoohei kɛ Wɔɔhei Krokomɛi: (1) Kaaha mɛi ni fa fe bɔ ni akpaa gbɛ lɛ miiwɔ otsu lɛ mli. (2) Kɛ́ osumɔɔɔ ni oyawɔɔ gbɔiatoohe lɛ dɔŋŋ lɛ, ha gbɔiatoohe lɛ nɔkwɛlɔi lɛ ale enɛ amrɔ nɔŋŋ. (3) Kaahoo niyenii yɛ tsũi ni ahooo niyenii yɛ mli lɛ amli. (4) Kɛ nibii ní akɛhaa gbɔi ni batoɔ gbɔiatoohe lɛ akatsu nii yɛ gbɛ ni ejaaa nɔ. (5) Jiemɔ mumɔ lɛ yibii lɛ akpo yɛ bɔ ni okɛ mɛi ni tsuɔ nii yɛ gbɔiatoohe lɛ yeɔ haa lɛ mli, titri lɛ yɛ be mli ni aŋmalaa gbɛi kɛha be ni akɛbaa gbɔiatoohe lɛ loo akɛshiɔ jɛmɛ beni dekã bɛ jɛmɛ kwraa lɛ.