Yehowa Yeɔ Ebuaa Mɛi ni Kɛ Amɛhiɛ Fɔ̃ɔ Enɔ Lɛ
1 Mɛi pii buɔ shika, hewalɛ, kɛ nyɛmɔi ni adesai yɔɔ lɛ akɛ nibii titri ni haa mɔ yeɔ omanye. (Lala 12:5; 33:16, 17; 49:7) Kɛlɛ, mɛi ni sheɔ Yehowa gbeyei ni amɛkɛ amɛhiɛ fɔ̃ɔ enɔ lɛ yɛ nɔmimaa ni Biblia lɛ kɛhaa akɛ, “lɛ ji amɛ buamɔ kɛ amɛtsɛŋ.” (Lala 115:11) Nyɛhaa wɔsusua hei enyɔ ni esa akɛ wɔtsɔɔ akɛ wɔkɛ wɔhiɛ fɔ̃ɔ Yehowa nɔ lɛ he wɔkwɛa.
2 Ákɛ Sɔɔlɔi Kristofoi: Esa akɛ wɔkɛ wɔhe afɔ̃ wɔ-Nyɔŋmɔ lɛ nɔ be fɛɛ be ni wɔɔha wiemɔ yɛ asafo lɛ mli loo ni wɔɔtsɔɔ nii yɛ shiɛmɔ nitsumɔ lɛ mli. Susumɔ Yesu nɔkwɛmɔnɔ lɛ he okwɛ. Eyɛ mli akɛ eji Nyɔŋmɔ Bi moŋ, shi ekɛ ehe efɔ̃ɔɔ lɛ diɛŋtsɛ enilee loo enyɛmɔi anɔ, shi moŋ ekɛ ehe fɔ̃ eŋwɛi Tsɛ lɛ nɔ kwraa. (Yoh. 12:49; 14:10) Belɛ, kwɛ bɔ ni esa jogbaŋŋ akɛ wɔ hu wɔɔfee nakai nɔŋŋ! (Abɛi 3:5-7) Yehowa yelikɛbuamɔ pɛ nɔ wɔbaanyɛ wɔtsɔ ni wɔkɛ wɔmɔdɛŋbɔi ni shɛɛɛ he ko lɛ awo ehiɛ nyam ni ehe aba sɛɛnamɔ kɛha mɛi krokomɛi.—Lala 127:1, 2.
3 Wɔtsɔɔ sɔlemɔ ni wɔsɔleɔ kɛha Yehowa gbɛtsɔɔmɔi kɛ emumɔ krɔŋkrɔŋ lɛ yelikɛbuamɔ nɔ wɔtsɔɔ akɛ wɔkɛ wɔhe fɔ̃ɔ enɔ. (Lala 105:4; Luka 11:13) Kɛfata he lɛ, wɔtsɔɔ akɛ wɔkɛ wɔhiɛ fɔ̃ɔ Nyɔŋmɔ nɔ kɛtsɔ wɔtsɔɔmɔi lɛ ni wɔhaa edamɔɔ e-Wiemɔ, ni ji Biblia lɛ nɔ lɛ nɔ. Shɛɛ sane ni yɔɔ Biblia lɛ mli lɛ yɛ hewalɛ ni ekɛkanyaa adesai atsuii ni ekɛtsakeɔ amɛshihilɛ. (Heb. 4:12) Kɛ́ ‘wɔjɛ hewalɛ ni Nyɔŋmɔ duroɔ lɛ mli wɔsɔmɔ’ lɛ, ewoɔ Yehowa hiɛ nyam.—1 Pet. 4:11.
4 Naagbai Ahe Nitsumɔ: Esa akɛ wɔbi Yehowa dɛŋ yelikɛbuamɔ hu be mli ni wɔkɛ nɔnyɛɛi kɛ naagbai miikpe. (Lala 46:2) Ákɛ nɔkwɛmɔnɔ lɛ, ekolɛ nitsumɔtsɛ ko ekpɛlɛŋ ni wɔfo nitsumɔ mli bɔni afee ni wɔnyɛ wɔya kpokpaa nɔ kpee ko, loo ekolɛ wɔkɛ shihilɛ ko ni kaa mɔ baakpe yɛ wɔweku shihilɛ mli. Wɔtsɔɔ akɛ wɔkɛ wɔhiɛ fɔ̃ɔ Yehowa nɔ kɛtsɔ sɔlemɔ ni wɔjɛɔ wɔtsuiŋ fɛɛ wɔsɔleɔ wɔhaa lɛ kɛ gbɛtsɔɔmɔi ni ekɛhaa kɛtsɔ e-Wiemɔ lɛ kɛ egbɛjianɔtoo lɛ nɔ ni wɔkɛtsuɔ nii lɛ nɔ. (Lala 62:9; 119:143, 173) Yehowa yeɔ ebuaa etsuji yɛ amɛshihilɛi amli yɛ enɛ ni amɛfeɔ lɛ hewɔ.—Lala 37:5; 118:13, 16.
5 Yehowa diɛŋtsɛ maa nɔ mi ehaa wɔ akɛ: “Ajɔɔ gbɔmɔ ní ŋɔɔ ehiɛ efɔ̃ɔ Yehowa nɔ, ní Yehowa ji ehiɛnɔkamɔ lɛ!” (Yer. 17:7) Eba akɛ wɔɔtsɔɔ yɛ wɔnifeemɔi fɛɛ amli akɛ wɔkɛ wɔhiɛ fɔ̃ɔ enɔ!—Lala 146:5.