Fã 3—Ní Wɔɔfee Biblia Mli Nikasemɔi ni Yaa Hiɛ
Ŋmalɛi lɛ ní Akɛaatsu Nii Jogbaŋŋ
1. Mɛni hewɔ esa akɛ wɔma Ŋmalɛi lɛ anɔ mi be ni wɔfeɔ Biblia mli nikasemɔi lɛ?
1 Yiŋtoo hewɔ ni wɔfeɔ Biblia mli nikasemɔ lɛ ji ni wɔye wɔbua gbɔmɛi koni amɛnu tsɔɔmɔi ni yɔɔ Nyɔŋmɔ Wiemɔ lɛ mli lɛ ashishi, ni amɛkpɛlɛ nɔ ni amɛkɛtsu nii yɛ amɛshihilɛi amli, ni ‘wɔfee amɛ kaselɔi.’ (Mat. 28:19, 20; 1 Tes. 2:13) No hewɔ lɛ, esa akɛ nikasemɔ lɛ adamɔ Ŋmalɛi lɛ anɔ. Shishijee mli lɛ, ekolɛ ebaafee nɔ ni yeɔ kɛbuaa akɛ aaatsɔɔ nikaselɔi lɛ bɔ ni amɛaafee amɛna ŋmalɛi pɔtɛɛ komɛi yɛ amɛ diɛŋtsɛ amɛ Biblia lɛ mli. Shi mɛɛ gbɛ nɔ wɔbaanyɛ wɔtsɔ wɔkɛ Ŋmalɛi lɛ aye abua mɛi nɛɛ koni amɛya amɛhiɛ yɛ mumɔŋ?
2. Mɛɛ gbɛ nɔ wɔtsɔɔ wɔhalaa Biblia ŋmalɛi ni esa akɛ wɔkane ni wɔwie he lɛ?
2 Halamɔ Ŋmalɛi ni Obaakane: Kɛ́ oosaa ohe lɛ, taomɔ bɔ ni ŋmalɛ fɛɛ ŋmalɛ ni atsɛ yisɛɛ yɛ nikasemɔ lɛ mli shi aŋmalako amɛmli wiemɔi lɛ kɔɔ oti ni asusuɔ he lɛ he, ni ohala amɛteŋ nɔ ni nyɛbaakane ni nyɛsusu he yɛ nikasemɔ lɛ mli. Bei pii lɛ ehi akɛ wɔɔkane Ŋmalɛi ni wɔhemɔkɛyeli lɛ damɔ nɔ lɛ. Ekolɛ ehe ebahiaŋ ni akane ŋmalɛi komɛi ni kɛ shishinumɔ ko fataa oti lɛ he lɛ. Gbalamɔ ojwɛŋmɔ kɛya nikaselɔ fɛɛ nikaselɔ hiamɔ nii kɛ shihilɛ mli ni eyɔɔ lɛ nɔ.
3. Mɛni ji sɛɛnamɔ ni yɔɔ sanebimɔi kɛ nitsumɔ he, ni mɛɛ gbɛ nɔ wɔɔtsɔ wɔfee enɛ?
3 Okɛ Sanebimɔi Atsu Nii: Yɛ nɔ najiaŋ ni ooogbála Biblia ŋmalɛi amli oha nikaselɔ lɛ, ha ni lɛ egbála mli etsɔɔ bo. Obaanyɛ okɛ hesaa abi lɛ saji ni okɛkanya lɛ ni efee enɛ. Kɛ́ eji ŋmalɛ ko ni eshishinumɔ yɔɔ faŋŋ lɛ, obaanyɛ obi lɛ ni etsɔɔ bɔ ni ŋmalɛ lɛ fiɔ nɔ ni atsɔɔ yɛ kuku lɛ mli lɛ sɛɛ ehaa lɛ mli pɛ. Yɛ shihilɛi komɛi amli lɛ, ekolɛ ehe baahia ni abi nikaselɔ lɛ sane pɔtɛɛ ko, loo abi lɛ saji srɔtoi ni baaha emu sane naa yɛ gbɛ ni ja nɔ. Kɛ́ ehe miihia ni akɛ niiamlitsɔɔmɔ krokomɛi agbe yi lɛ, no lɛ abaanyɛ afee enɛ yɛ nikaselɔ lɛ hetoohamɔ lɛ sɛɛ.
4. Te esa akɛ wɔtsɔɔ ŋmalɛi ni wɔkaneɔ lɛ amli wɔha tɛŋŋ?
4 Ha Efee Mlɛo: Bei pii lɛ gãimlibi kome pɛ he hiaa gãitsɛ̃lɔ koni ekɛtsɛ̃ nɔ ni etaoɔ lɛ. Nakai nɔŋŋ hu wiemɔi babaoo he ehiaaa tsɔɔlɔ ko ni he esa lɛ koni ekɛma oti ko nɔ mi. Ebaanyɛ etsɔɔ saji amli yɛ gbɛ ni yɔɔ mlɛo, ni mli ka shi faŋŋ, ni ja hu nɔ. Ekolɛ ehe baahia ni bei komɛi lɛ otao nibii amli yɛ Kristofoi awoji amli koni onu ŋmalɛ ko shishi ni ogbála mli yɛ gbɛ ni ja nɔ. (2 Tim. 2:15) Shi kaabɔ mɔdɛŋ akɛ ooogbála otii fɛɛ ni yɔɔ ŋmalɛ ni yɔɔ nikasemɔ lɛ mli lɛ mli. Tsɔɔmɔ nɔ ni baaha oti ni asusuɔ he lɛ mli afee faŋŋ lɛ pɛ mli.
5, 6. Wɔbaanyɛ wɔye wɔbua nikaselɔi koni amɛkɛ Nyɔŋmɔ Wiemɔ lɛ atsu nii yɛ amɛshihilɛ mli yɛ mɛɛ gbɛ nɔ, shi mɛni esa akɛ wɔkwa efeemɔ?
5 Tsɔɔmɔ Bɔ ni Abaafee Akɛtsu Nii: Kɛ́ ehe miihia lɛ, ye obua nikaselɔ lɛ koni ena bɔ ni Biblia ŋmalɛi lɛ kɔɔ lɛ diɛŋtsɛ ehe. Ákɛ nɔkwɛmɔnɔ lɛ, kɛ okɛ nikaselɔ ko ni ebɔiko Kristofoi akpeei baa lɛ miisusu Hebribii 10:24, 25 lɛ he lɛ, obaanyɛ okɛ lɛ agba kpeei ni wɔfeɔ lɛ ekome he sane koni ofɔ̃ lɛ nine koni eba. Shi kaaha enu he akɛ aanyɛ enɔ. Ha Nyɔŋmɔ Wiemɔ lɛ akanya lɛ ni efee nɔ ni baaha esa Yehowa hiɛ.—Heb. 4:12.
6 Be ni wɔtsuɔ nitsumɔ ni akɛwo wɔdɛŋ akɛ wɔfee kaselɔi lɛ he nii lɛ, eba akɛ wɔkɛ Ŋmalɛi lɛ aaatsu nii jogbaŋŋ ni ‘wɔkɛha adamɔ hemɔkɛyeli nɔ afee toiboo.’—Rom. 16:26.