Oyelikɛbuamɔ He Miihia
1 “Wɔmiida nyɛ shi yɛ nibii fɛɛ ni nyɛfeɔ nyɛhaa wɔ lɛ he. Wɔnáa nyɛnitsumɔ lɛ he sɛɛ waa diɛŋtsɛ.” Wiemɔ nɛɛ tsɔɔ bɔ ni wɔhiɛ sɔɔ wɔ onukpai kɛ asafoŋ sɔɔlɔi lɛ waa diɛŋtsɛ. Akɛni Nyɔŋmɔ gbɛjianɔtoo lɛ miiya nɔ eeshwere hewɔ lɛ, ehe miihia ni aná hii ni edara yɛ mumɔŋ daa koni amɛsɔmɔ yɛ asafoi aaafee 100, 000 ni yɔɔ jeŋ fɛɛ lɛ amli. Kɛji akɛ oji nyɛminuu ni abaptisi lɛ lɛ, oyelikɛbuamɔ he miihia.
2 ‘Ehe ni Oooshɛ’: Te ooofee tɛŋŋ oshɛ sɔɔmɔ hegbɛi krokomɛi ahe lɛ? (1 Tim. 3:1) Klɛŋklɛŋ lɛ, kɛtsɔ nɔkwɛmɔnɔ kpakpa ni ooofee yɛ oshihilɛ gbɛ̀i fɛɛ amli lɛ nɔ. (1 Tim. 4:12; Tito 2:6-8; 1 Pet. 5:3) Okɛ ohe awo shiɛmɔ nitsumɔ lɛ mli jogbaŋŋ kɛmɔ shi, ni oye obua mɛi krokomɛi ni amɛhu amɛfee nakai nɔŋŋ. (2 Tim. 4:5) Ná nanemɛi heyelilɔi lɛ ahilɛ-kɛ-hamɔ he miishɛɛ. (Rom. 12:13) Feemɔ mɔ ni kɛ mɔdɛŋbɔɔ kaseɔ Nyɔŋmɔ Wiemɔ lɛ jogbaŋŋ, ni oná ‘nitsɔɔmɔ mli hesaa.’ (Tito 1:9; 1 Tim. 4:13) Okɛ mɔdɛŋbɔɔ atsu nitsumɔi ni onukpai lɛ kɛwo odɛŋ lɛ ahe nii jogbaŋŋ. (1 Tim. 3:10) Kɛ́ weku yitso ji bo lɛ, ‘ye owe nɔ jogbaŋŋ.’—1 Tim. 3:4, 5, 12.
3 Ákɛ aaasɔmɔ yɛ sɔɔmɔ hegbɛ ko mli lɛ biɔ nitsumɔ babaoo, ni enɛ biɔ ni aná he-kɛ-afɔleshaa mumɔ. (1 Tim. 5:17) No hewɔ lɛ, be mli ni otaoɔ akɛ osɔmɔ lɛ, gbalamɔ ojwɛŋmɔ kɛya mɛi krokomɛi ni okɛ heshibaa aaasɔmɔ amɛ lɛ nɔ. (Mat. 20:25-28; Yoh. 13:3-5, 12-17) Jwɛŋmɔ Timoteo su ni ená lɛ nɔ, ni obɔ mɔdɛŋ ni okase lɛ. (Fil. 2:20-22) Taakɛ eji yɛ Timoteo gbɛfaŋ lɛ, ha ojeŋba kpakpa lɛ ajie oyi kɛná sɔɔmɔ hegbɛi. (Bɔf. 16:1, 2) Be mli ni onáa mumɔŋ sui ni he hiaa kɛha sɔɔmɔ hegbɛi krokomɛi ahe nitsumɔ, ni okɛ ŋaawoo fɛɛ ŋaawoo ni akɛhaa bo koni oya ohiɛ lɛ tsuɔ nii lɛ, ‘mɛi fɛɛ baana oshweremɔ lɛ faŋŋ.’—1 Tim. 4:15.
4 Fɔlɔi, Nyɛtsɔsea Gbekɛbii lɛ Koni Amɛye Amɛbua: Gbekɛbii baanyɛ akase bɔ ni ayeɔ abuaa kɛjɛ amɛgbekɛbiiashi. Nyɛtsɔsea amɛ ni amɛfee toiboo yɛ kpeei ashishi, ni amɛshiɛ, ni amɛjie jeŋba kpakpa kpo yɛ Maŋtsɛyeli Asa lɛ nɔ kɛ yɛ skul. Nyɛtsɔa amɛ ni amɛsɔmɔ mɛi krokomɛi, amɛfee nibii tamɔ Maŋtsɛyeli Asa lɛ nɔ saamɔ, yelikɛbuamɔ ni amɛkɛaaha mɛi ni egbɔlɔ lɛ, kɛ ekrokomɛi ni fata he. Nyɛhaa amɛnáa miishɛɛ ni jɛɔ nɔhamɔ mli kɛbaa lɛ eko. (Bɔf. 20:35) Tsɔsemɔ nɛɛ baanyɛ aye abua amɛ ni amɛtsɔmɔ gbɛgbalɔi, asafoŋ sɔɔlɔi kɛ onukpai wɔsɛɛ.