Nyɛmimɛi Hii Bibii, Ani Nyɛmiibɔ Mɔdɛŋ ni Nyɛhe Asa?
1. Mɛɛ be esa akɛ nyɛminuu fioo ko abɔi gbɛtsɔɔmɔ ni yɔɔ 1 Timoteo 3:1 lɛ kɛnitsumɔ?
1 ‘Kɛ́ mɔ ko miibɔ mɔdɛŋ ni ehe asa lɛ, eetao nitsumɔ kpakpa.’ (1 Tim. 3:1) Nakai wiemɔi ni jɛ mumɔŋ lɛ woɔ nyɛmimɛi hii hewalɛ ni amɛbɔ mɔdɛŋ ni amɛhe asa kɛha sɔɔmɔ hegbɛi yɛ asafo lɛ mli. Ani esa akɛ oda dani ofee nakai? Yɛ anɔkwale mli lɛ, kɛ́ obɔi enɛ he mɔdɛŋbɔɔ beni odako kwraa lɛ ehi waa diɛŋtsɛ. Nakai feemɔ baaha oná tsɔsemɔ, ni oha ana akɛ osa mɔ ni baanyɛ asɔmɔ akɛ asafoŋ sɔɔlɔ kɛji oda. (1 Tim. 3:10) Kɛ́ oji nyɛminuu fioo ni abaptisi bo lɛ, te ooofee tɛŋŋ oha ohe asa lɛ?
2. Mɛɛ gbɛ nɔ mɔ ko baanyɛ atsɔ aná hekɛ-afɔleshaa mumɔ ni etsu he nii?
2 Hekɛ-afɔleshaa: Kaimɔ akɛ oobɔ mɔdɛŋ ni ohe asa kɛha nitsumɔ kpakpa, shi jeee ni oná gbɛ́i. No hewɔ lɛ, ná he miishɛɛ akɛ obaaye obua onyɛmimɛi hii kɛ yei lɛ. Gbɛ kome ni obaatsɔ nɔ ofee enɛ ji ni obaajwɛŋ nɔkwɛmɔnɔ fɛfɛo ni Yesu fee lɛ nɔ. (Mat. 20:28; Yoh. 4:6, 7; 13:4, 5) Bi Yehowa ni eye ebua bo ni oná mɛi krokomɛi ahe miishɛɛ. (1 Kor. 10:24) Ani obaanyɛ oye obua mɛi ni edara loo mɛi ni naaa hewalɛ ni yɔɔ nyɛsafo lɛ mli lɛ? Kɛ́ aatao mɛi ni amɛhu Maŋtsɛyeli Asa lɛ hewɔŋ, asaa Asa lɛ nɔ hei ni ewa kɛha shiɛlɔi krokomɛi akɛ amɛbaashɛ lɛ, loo atsu nibii krokomɛi kɛkura jɛmɛ lɛ, ani okɛ ohe haa? Ani obaanyɛ okɛ ohe aha kɛtsu Teokrase Sɔɔmɔ Skul lɛ mli nifeemɔ ko he nii kɛ́ mɔ ni baafee lɛ nyɛɛɛ ebafee? Kɛ́ okɛ ohe ha kɛye obua mɛi krokomɛi lɛ obaaná miishɛɛ.—Bɔf. 20:35.
3. Te mumɔŋ dalɛ he hiaa ha tɛŋŋ, ni mɛɛ gbɛ nɔ mɔ ko baanyɛ atsɔ ada yɛ mumɔŋ?
3 Mumɔŋ Dalɛ: Kɛ́ asafoŋ sɔɔlɔ ko eda yɛ mumɔŋ lɛ, ehi kwraa fe ni eeená hesai krɛdɛi loo duromɔ keenii komɛi. Mɔ ni eda yɛ mumɔŋ lɛ bɔɔ mɔdɛŋ ni ekwɛ nii taakɛ Yehowa kɛ Yesu kwɛɔ nii lɛ. (1 Kor. 2:15, 16) Ejieɔ “mumɔ lɛ yibii” lɛ akpo. (Gal. 5:22, 23) Eji shiɛlɔ ni yɔɔ ekãa ni kɛ Maŋtsɛyeli lɛ he nibii lɛ yeɔ klɛŋklɛŋ gbɛhe. (Mat. 6:33) Obaanyɛ oná mumɔŋ sui kɛ́ oto gbɛjianɔ ni ofee aŋkro nikasemɔ daa. Nɔ ni fata enɛ he ji Biblia lɛ ni obaakane daa, Buu-Mɔɔ kɛ Awake! lɛ ni oookane eko fɛɛ eko, kɛ ohe ni obaasaa kɛha asafoŋ kpeei ni oya hu lɛ. (Lala 1:1, 2; Heb. 10:24, 25) Beni Paulo woɔ Timoteo hewalɛ ni eya ehiɛ yɛ mumɔŋ lɛ, eŋma akɛ: ‘Ohiɛ ahi onitsɔɔmɔ lɛ nɔ.’ (1 Tim. 4:15, 16) No hewɔ lɛ, bɔɔ mɔdɛŋ waa ni otsu nifeemɔ ni akɛhaa bo yɛ Teokrase Sɔɔmɔ Skul lɛ mli lɛ he nii jogbaŋŋ. Tsɔ hiɛ osaa ohe kɛha shiɛmɔ ni okɛ ohe awo mli daa. Okɛ mumɔŋ otii tamɔ gbɛgbamɔ nitsumɔ lɛ, Betel sɔɔmɔ, loo Biblia Skul Kɛha Nyɛmimɛi Hii Oshijafoi lɛ eko ni obaaya lɛ ama ohiɛ ni obɔ mɔdɛŋ ni oshɛ he. Mumɔŋ dalɛ baaye abua bo ni ‘ojo oblahiiaŋ sɛɛdii lɛ naa foi.’—2 Tim. 2:22.
4. Mɛɛ sɛɛnamɔ yɔɔ hekɛnɔfɔɔ kɛ anɔkwayeli he?
4 Hekɛnɔfɔɔ kɛ Anɔkwayeli: Akɛni nyɛmimɛi ni ahala ni amɛjara niyenii amɛha Kristofoi ni ehia amɛ yɛ klɛŋklɛŋ afii oha lɛ mli lɛ ji mɛi ni “yɔɔ gbɛ́i kpakpa” hewɔ lɛ, eka shi faŋŋ akɛ ayɛ hekɛnɔfɔɔ yɛ amɛmli ni ale hu akɛ amɛbaaye anɔkwa, no hewɔ lɛ bɔfoi lɛ atsui yeee akɛ abaatsu nitsumɔ lɛ. Enɛ ha bɔfoi lɛ nyɛ amɛkɛ amɛjwɛŋmɔ ma nitsumɔi krokomɛi ni he hiaa waa lɛ anɔ. (Bɔf. 6:1-4) No hewɔ lɛ, kɛ́ aha bo nifeemɔ ko yɛ asafo lɛ mli lɛ, bɔɔ mɔdɛŋ ni otsu he nii kɛmɔ shi. Kasemɔ Noa, mɔ ni nyiɛ gbɛtsɔɔmɔi ni akɛha lɛ ni ekɛkpɛ adeka lɛ sɛɛ pɛpɛɛpɛ lɛ. (1 Mose 6:22) Kɛ́ wɔye anɔkwa lɛ, Yehowa hiɛ sɔɔ ni etsɔɔ hu akɛ wɔda yɛ mumɔŋ.—1 Kor. 4:2; kwɛmɔ akrabatsa ni ji “Sɛɛnamɔi ni Yɔɔ Tsɔsemɔ He.”
5. Mɛni hewɔ esa akɛ nyɛmimɛi hii bibii abɔ mɔdɛŋ ni amɛhe asa lɛ?
5 Taakɛ agba afɔ̃ shi lɛ, Yehowa eha aabua mɛi anaa oyayaayai. (Yes. 60:22) Kɛ́ aja mli lɛ, abaptisiɔ mɛi 250,000 daa afi. Akɛni mɛi hee babaoo miiba anɔkwale lɛ mli hewɔ lɛ, ehe miihia ni aná hii ni edara yɛ mumɔŋ koni amɛtsu asafoŋ sɔ̃i ahe nii. Amrɔ nɛɛ ji be ni ehe miihia ni atsu babaoo yɛ Yehowa sɔɔmɔ mli fe be fɛɛ ni eho. (1 Kor. 15:58) Nyɛmimɛi hii bibii, ani nyɛmiibɔ mɔdɛŋ ni nyɛhe asa? Kɛ́ nakai ni lɛ, nyɛmiitao nitsumɔ kpakpa lɛɛlɛŋ!
[Wiemɔ ni akɔ ni akɛmiitsu nii ni yɔɔ baafa 2]
Akɛni mɛi hee babaoo miiba anɔkwale lɛ mli hewɔ lɛ, ehe miihia ni aná hii ni edara yɛ mumɔŋ koni amɛtsu asafoŋ sɔ̃i ahe nii
[Akrabatsa ni yɔɔ baafa 3]
Sɛɛnamɔi ni Yɔɔ Tsɔsemɔ He
Nyɛmimɛi hii bibii ni he esa lɛ náa he sɛɛ kɛ́ onukpai lɛ kɛ nitsumɔ wo amɛdɛŋ ni amɛtsɔse amɛ lɛ. Be ko beni akpa asafoŋ kpee lɛ, kpokpaa nɔkwɛlɔ ko kɛ shiɛlɔ ko ta wiemɔ kpoku lɛ nɔ ni eewo lɛ hewalɛ. Ena gbekɛ nuu fioo ko damɔ he ko ni bɛŋkɛ amɛ, no hewɔ lɛ ebi lɛ kɛ́ eemɛ ni ekɛ lɛ awie. Nyɛminuu fioo lɛ kɛɛ lɛ akɛ nitsumɔ ni akɛwo edɛŋ ji ni esaa wiemɔ kpoku lɛ nɔ be fɛɛ be kɛ́ akpa kpee. Efɔlɔi miitao ni amɛya shĩa, shi eetao ebɛɛ egbe naa dani eya. Kpokpaa nɔkwɛlɔ lɛ ná he miishɛɛ ni eshi kpoku lɛ nɔ. Ewie akɛ: “Nakai asafo lɛ mli onukpai lɛ tsɔseɔ nyɛmimɛi hii bibii lɛ be fɛɛ be kɛtsɔ asafoŋ nitsumɔi ni amɛkɛwoɔ amɛdɛŋ lɛ nɔ. Enɛ hewɔ lɛ, amɛfɔɔ nyɛmimɛi hii bibii ayijiemɔ koni amɛsɔmɔ akɛ asafoŋ sɔɔlɔi kɛ́ miyasɔmɔ amɛsafo lɛ.”