Sanebimɔ He

◼ Mɛni ji gbɛ ni hi fe fɛɛ ni abaanyɛ atsɔ nɔ atsu onia kɛye abua nyɛmimɛi ni ehia amɛ yɛ maji krokomɛi anɔ lɛ?

Bei komɛi lɛ wɔnuɔ ni yiwaa, oshara, loo shihilɛi amli naagbai krokomɛi eha nyɛmimɛi ni yɔɔ maŋ kroko mli lɛ eyaje hiamɔ shihilɛ mli. Enɛ etsirɛ nyɛmimɛi komɛi ni amɛkɛ shika emaje nitsumɔhe niji ni yɔɔ maji nɛɛ amli lɛ tɛ̃ɛ, ni amɛbiɔ ni akɛ shika lɛ aha mɔ aŋkro ko, asafo pɔtɛɛ ko, loo ni akɛtsu tsumaa nitsumɔ pɔtɛɛ ko he nii.—2 Kor. 8:1-4.

Eyɛ mli akɛ nanemɛi heyelilɔi ahe susumɔ ni suɔmɔ yɔɔ mli nɛɛ sa moŋ, shi bei komɛi lɛ hiamɔi ni esa akɛ atsu he nii amrɔ nɔŋŋ yɛ ni fe nɔ ni yɔɔ mɔ ni kɛ shika lɛ ha lɛ jwɛŋmɔ mli lɛ. Yɛ shihilɛ komɛi amli lɛ, atsu hiamɔ hewɔ ni akɛ shika lɛ majeɔ lɛ he nii momo. Yɛ anɔkwale mli lɛ, wɔbaanyɛ wɔná nɔmimaa akɛ kɛ́ mɔ ko kɛ shika maje nitsumɔhe nine lɛ kɛha jeŋ muu fɛɛ nitsumɔ lɛ, Maŋtsɛyeli Asa Tsumaa Fotro lɛ, loo kɛha oshara be mli yelikɛbuamɔ lɛ, akɛ nakai shika lɛ baatsu nii taakɛ mɔ ni kɛha lɛ etsɔɔ lɛ.

Atsɔse nyɛmimɛi ni yɔɔ nitsumɔhe niji lɛ fɛɛ jogbaŋŋ koni amɛtsu hiamɔ nii ni baa trukaa lɛ ahe nii. Yɛ saji fɛɛ amli lɛ, nitsumɔhe nine lɛ bɔɔ Nɔyeli Kuu lɛ amaniɛ. Kɛ́ yelikɛbuamɔ he miihia lolo lɛ, Nɔyeli Kuu lɛ baanyɛ abi nitsumɔhe niji ni bɛŋkɛ lɛ koni amɛye amɛbua loo Nɔyeli Kuu lɛ baanyɛ ekɛ shika amaje kɛjɛ nitsumɔhe yitso lɛ.—2 Kor. 8:14, 15.

Enɛ hewɔ lɛ, esa akɛ okɛ oniai ni otsuɔ kɛha jeŋ muu fɛɛ nitsumɔ lɛ, tsumaa nitsumɔi yɛ maji krokomɛi anɔ, loo kɛha oshara be mli yelikɛbuamɔi lɛ fɛɛ amaje nitsumɔhe nine ni yɔɔ maŋ ni oyɔɔ mli lɛ tɛ̃ɛ loo kɛtsɔ asafo lɛ nɔ. Kɛtsɔ nɛkɛ gbɛ nɔ lɛ, “tsulɔ anɔkwafo kɛ nilelɔ” lɛ tsɔɔ gbɛjianɔ ni Nɔyeli Kuu lɛ eto lɛ nɔ ni amɛtsuɔ jeŋ muu fɛɛ nyɛmifeemɔ lɛ hiamɔ nii ahe nii gbɛnaa gbɛnaa.—Mat. 24:45-47; 1 Kor. 14:33, 40.