Okɛ Woji Tɛtrɛbii ní Yeɔ Anɔkwale lɛ He Odase lɛ Aha
1. Mɛɛ yiŋtoo he nii Buu-Mɔɔ kɛ Awake! lɛ tsuɔ?
1 Buu-Mɔɔ—Eetswa Yehowa Maŋtsɛyeli He Adafi kɛ ehefatalɔ Awake! lɛ kã he amɛji woji titrii ni akɛtsuɔ Maŋtsɛyeli jajemɔ kɛ kaselɔfeemɔ nitsumɔ lɛ he nii. (Mat. 24:14; 28:19, 20) Wɔnáa he miishɛɛ ákɛ wɔkɛ woji tɛtrɛbii nɛɛ ni yɔɔ amɛbe naa lɛ baaha daa beni wɔtsuɔ wɔ-Maŋtsɛyeli sɔɔmɔ lɛ fãi srɔtoi lɛ ahe nii lɛ.
2. Mɛɛ tsakemɔi afee yɛ Buu-Mɔɔ kɛ Awake! lɛ he, ni mɛni hewɔ?
2 Yɛ afii ni eho lɛ amli lɛ, atsake woji tɛtrɛbii lɛ adaramɔ kɛ nibii ni yɔɔ mli lɛ, kɛ agbɛnɛ hu gbɛ̀i anɔ ni wɔtsɔɔ ni wɔkɛhaa lɛ. Yiŋtoo hewɔ ni afee tsakemɔi nɛɛ ji koni mɛi anyã he waa ni anyɛ akɛtsu nii kɛmɔ shi, bɔni afee ni Maŋtsɛyeli shɛɛ sane lɛ ashɛ ‘gbɔmɛi srɔtoi fɛɛ’ atsui he, ni ‘ahere amɛyiwala, ni amɛshɛ anɔkwale lɛ lee mli.’—1 Tim. 2:4.
3. Te abaanyɛ akɛ woji tɛtrɛbii lɛ atsu nii yɛ shiɛmɔ nitsumɔ lɛ mli aha tɛŋŋ?
3 Kɛjɛ January afi 2006 kɛbaa nɛɛ, wɔná hesaa yɛ bɔ ni wɔkɛ shiɛmɔ wiemɔi srɔtoi ni kɔɔ Awake! ni baa nyɔɔŋ fɛɛ nyɔɔŋ nɔ lɛ he lɛ tsuɔ nii wɔhaa lɛ mli. Agbɛnɛ wɔkɛ Buu-Mɔɔ Eetswa Yehowa Maŋtsɛyeli He Adafi lɛ ekome pɛ baaha yɛ wɔshiɛmɔ nitsumɔ lɛ mli, ni wɔkɛ shiɛmɔ wiemɔi srɔtoi ni kɔɔ nɔ ni wɔkɛbaaha lɛ he lɛ baatsu nii. Akɛ shiɛmɔ wiemɔi ni kɔɔ wolo tɛtrɛɛ lɛ ni wɔkɛhaa lɛ eko fɛɛ eko he lɛ woɔ Wɔ Maŋtsɛyeli Sɔɔmɔ lɛ naagbee baafa lɛ. Bei pii lɛ shiɛmɔ wiemɔi nɛɛ wieɔ shishijee saji ni yɔɔ wolo tɛtrɛɛ lɛ mli lɛ ateŋ ekome he, shi bei komɛi hu lɛ ewieɔ saji krokomɛi ni yɔɔ wolo tɛtrɛɛ lɛ mli ni mɛi pii baanya he lɛ ahe. Wɔbaanyɛ wɔkɛ shiɛmɔ wiemɔi ni akala lɛ atsu nii jogbaŋŋ kɛ́ wɔle sane ni ewieɔ he lɛ jogbaŋŋ, ní wɔkɛ wɔ diɛŋtsɛ wɔwiemɔi tsu nii ni ekɔ bɔ ni baahi aha wɔshikpɔŋkuku lɛ he.
4. Mɛni hewɔ ekolɛ sɛɛnamɔ baahi he akɛ okɛ bo diɛŋtsɛ ohiɛkpamɔ wiemɔ baatsu nii moŋ fe ni okɛ nɔ ni akɛwo Wɔ Maŋtsɛyeli Sɔɔmɔ lɛ mli lɛ aaatsu nii lɛ?
4 Eyɛ mli ákɛ akɛ shiɛmɔ wiemɔi enyɔ woɔ Wɔ Maŋtsɛyeli Sɔɔmɔ lɛ mli kɛha woji tɛtrɛbii lɛ eko fɛɛ eko moŋ, shi obaanyɛ okɛ shiɛmɔ wiemɔ kroko kwraa atsu nii. Yiŋtoo kome hewɔ ni abaanyɛ afee nakai lɛ ji akɛ, ekolɛ mɛi ni yɔɔ nyɛshikpɔŋkuku lɛ mli lɛ baanya saneyitso kroko ni yɔɔ mli lɛ he waa. Aloo ekolɛ onuɔ he akɛ obaanyɛ okɛ shiɛmɔ wiemɔ ko ni mɔɔ shi waa atsu nii kɛ́ oowie sane ko ni onyaa he waa lɛ he.
5. Dani okɛ hiɛkpamɔ wiemɔ ko baasaa ohe kɛha wolo tɛtrɛɛ ni okɛbaaha lɛ, mɛni esa akɛ ofee?
5 Bɔ ni Obaato Ohiɛkpamɔ Wiemɔ lɛ He Gbɛjianɔ: Klɛŋklɛŋ kwraa lɛ, esa akɛ ole sane ni otaoɔ ni okɛtsu nii lɛ jogbaŋŋ. Ekolɛ jeee be fɛɛ be obaanyɛ ole saji fɛɛ ni yɔɔ wolo tɛtrɛɛ ni otaoɔ okɛtsu nii lɛ mli dani okɛbɔi hamɔ yɛ shiɛmɔ nitsumɔ lɛ mli. Shi esa akɛ ojie miishɛɛ kɛ anɔkwayeli kpo yɛ saji ni ohala akɛ okɛbaatsu nii lɛ ahe. Dani obaanyɛ ofee nakai lɛ, ja ole sane ni owieɔ he lɛ jogbaŋŋ.
6. Mɛɛ gbɛ nɔ wɔbaanyɛ wɔtsɔ wɔto wɔ diɛŋtsɛ wɔ hiɛkpamɔ wiemɔi ahe gbɛjianɔ?
6 Agbɛnɛ lɛ, okɛ hiɛkpamɔ wiemɔi srɔtoi atsu nii. Obaanyɛ okɛ sanebimɔ ko ni kɔɔ sane ni otaoɔ owie he ní baanyɛ atee miishɛɛ shi lɛ atsu nii ni okɛje sanegbaa shishi. Okɛ hewalɛ ni Nyɔŋmɔ Wiemɔ lɛ yɔɔ lɛ atsu nii be fɛɛ be ni okɛshɛ mɛi atsui he. (Heb. 4:12) Halamɔ ŋmalɛ ni sa ni kɔɔ sane ni owieɔ he lɛ he, kɛ eeehi lɛ efee ŋmalɛ ko ni atsɛ yisɛɛ loo aŋmala emli wiemɔi lɛ yɛ saneyitso ni okɛtsuɔ nii lɛ mli. Ha ŋmalɛ lɛ akɔ sane lɛ he.
7. Mɛɛ gbɛ nɔ wɔbaanyɛ wɔya wɔhiɛ yɛ bɔ ni wɔkɛ wɔshiɛmɔ wiemɔi lɛ tsuɔ nii wɔhaa lɛ mli?
7 Hegbɛ Fɛɛ Hegbɛ ni Oooná: Kɛ́ hiɛkpamɔ wiemɔ baafee nɔ ni mɔɔ shi jogbaŋŋ lɛ, esa akɛ afɔ kɛ nitsumɔ. Fatamɔ asafo lɛ he kɛha woji tɛtrɛbii lɛ kɛ odaseyeli daa Hɔɔ. Okɛ woji tɛtrɛbii lɛ aha mɛi ni ehe woji krokomɛi be ko ni eho lɛ. Okɛ woji tɛtrɛbii lɛ aha mɛi ni okɛkaseɔ Biblia lɛ kɛ mɛi krokomɛi ni obaana amɛ yɛ shĩa be mli ni ofeɔ sɛɛkuu-kɛsaramɔ lɛ. Ekolɛ obaanyɛ okɛ woji tɛtrɛbii lɛ eko aha mɛi ni okɛwieɔ kɛ́ otee nihemɔ, beni oofã gbɛ, loo beni omɛɔ yɛ heni mɛi mɛɔ yɛ koni datrɛfonyo abakwɛ amɛ lɛ. Bɔɔ mɔdɛŋ akɛ obaaya ohiɛ yɛ bɔ ni okɛ shiɛmɔ wiemɔi lɛ tsuɔ nii ohaa lɛ mli yɛ nyɔɔŋ lɛ mli fɛɛ.
8. Mɛɛ gbɛ̀i anɔ Buu-Mɔɔ kɛ Awake! woji tɛtrɛbii lɛ feɔ woji ni nɔ bɛ?
8 Buu-Mɔɔ kɛ Awake! woji tɛtrɛbii lɛ anɔ bɛ. Amɛjieɔ Yehowa yi akɛ jeŋ muu fɛɛ Maŋtsɛ. (Bɔf. 4:24) Amɛkɛ Nyɔŋmɔ Maŋtsɛyeli lɛ he sanekpakpa lɛ shɛjeɔ mɛi amii, ni amɛhaa mɛi náa hemɔkɛyeli yɛ Yesu Kristo mli. (Mat. 24:14; Bɔf. 10:43) Kɛfata he lɛ, amɛwieɔ nibii ni yaa nɔ yɛ je lɛ mli ni haa Biblia gbalɛi baa mli lɛ ahe. (Mat. 25:13) Ye obua mɛi ni yɔɔ oshikpɔŋkuku lɛ mli lɛ ni amɛná woji nɛɛ ahe sɛɛ kɛtsɔ ohe ni ooosaa koni okɛ hegbɛ fɛɛ hegbɛ ni oooná lɛ atsu nii ní okɛ woji tɛtrɛbii lɛ aha amɛ lɛ nɔ!
9. Te wɔbaafee tɛŋŋ wɔto gbɛjianɔ kɛha sɛɛkuu-kɛsaramɔ?
9 Kɛ́ onyɛ okɛ woji tɛtrɛbii lɛ eko ha, aloo okɛ mɔ ko gba Biblia mli sane ko ni yɔɔ miishɛɛ po lɛ, feemɔ klalo akɛ obaabi lɛ sane ko aloo obaashi sane ko ni haa mɔ susuɔ nii ahe oha lɛ koni no agbele gbɛ kɛha sɛɛkuu-kɛsaramɔ kɛ Biblia mli sanegbaa kroko. Kɛ́ wɔkɛ ekãa du anɔkwale wui lɛ, wɔbaanyɛ wɔná nɔmimaa akɛ Yehowa baagbele mɛi ni miisumɔ ní amɛle lɛ ni amɛsɔmɔ lɛ hu lɛ atsui koni amɛnyɛ amɛfee nakai.—1 Kor. 3:6.