Kã He Oshiɛ
1 Wɔyɛ jaramɔ bei amli. Maŋ béi, wiemɔ kui ateŋ tai, adebɔɔ naa osharai, kɛ tsuifãa nibii krokomɛi egbɛ eshwã he fɛɛ he. Sanekpakpa ko he miihia adesai aweku lɛ amrɔ nɛɛ fe bei fɛɛ ni eho. Ni kɛlɛ, shikpilikpii ni mɛi feɔ yɛ mumɔŋ nibii ahe lɛ egbɛ eshwã waa diɛŋtsɛ. Ebaanyɛ efee nɔ ni wa yɛ hei komɛi akɛ wɔɔna mɛi yɛ shia, ni ebaanyɛ efee nɔ ni wa waa po akɛ wɔɔná mɛi ni baabo wɔ toi loo mɛi ni sumɔɔ koni amɛkase Biblia lɛ. Yɛ enɛɛmɛi fɛɛ sɛɛ lɛ, ehe miihia ni wɔkã he wɔshiɛ Nyɔŋmɔ Maŋtsɛyeli ni ato shishi lɛ he sanekpakpa lɛ.—Mat. 24:14.
2 Suɔmɔ Kɛha Gbɔmɛi: Shiɛmɔ ni wɔshiɛɔ lɛ gbalaa jwɛŋmɔ kɛyaa suɔmɔ ni Yehowa yɔɔ kɛha gbɔmɛi lɛ nɔ. “Esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Pet. 3:9; Ezek. 33:11) No hewɔ lɛ, taakɛ Yesu kɛɛ lɛ, ewo akpɔ akɛ, ‘ja ashiɛ sanekpakpa lɛ atsɔɔ jeŋmaji fɛɛ dã.’ (Mar. 13:10) Nyɔŋmɔ fɔ̃ɔ gbɔmɛi anine koni amɛba eŋɔɔ bɔni afee ni amɛjo kojomɔ ni baa Satan je lɛ nɔ lɛ naa foi. (Yoel 3:1, 2, 5; Zef. 2:2, 3) Ani eŋɔɔɔ wɔnaa akɛ Yehowa kɛ hegbɛ ni tamɔ nɛkɛ eha wɔ?—1 Tim. 1:12, 13.
3 Jeŋ muu fɛɛ akɔntaabuu lɛ tsɔɔ akɛ yɛ afi 2004 sɔɔmɔ afi lɛ mli lɛ, afee Biblia mli nikasemɔi aaafee 6,085,387 daa nyɔŋ nɔ, ni abaptisi kaselɔi heei aaafee mɛi 5,000 daa otsi! Nine shɛ mɛi heei ni amɛjɔɔ amɛhe nɔ nɛɛ ateŋ mɛi komɛi anɔ, ejaakɛ Yehowa jɔɔ nitsumɔ ni shiɛlɔi ni bɔ mɔdɛŋ akɛ amɛkɛ mɔ fɛɛ mɔ aaawie yɛ amɛshikpɔŋkukuji amli lɛ tee nɔ amɛtsu lɛ nɔ. Kwɛ bɔ ni enɛ feemɔ kɛ miishɛɛ eba asafoi lɛ amli, ni kwɛ bɔ ni eji hegbɛ ni aná akɛ aaafee Nyɔŋmɔ hefatalɔ nitsulɔ yɛ yiwalaheremɔ nitsumɔ nɛɛ mli!—1 Kor. 3:5, 6, 9.
4 Nyɔŋmɔ Gbɛi lɛ Yijiemɔ: Wɔkãa he wɔshiɛɔ bɔni afee ni wɔkɛ no feemɔ ajie Yehowa yi yɛ faŋŋ mli, ni wɔtsé egbɛi lɛ he yɛ adesai fɛɛ ahiɛ. (Heb. 13:15) Satan elaka “jeŋ muu lɛ fɛɛ” koni amɛhé amɛye akɛ Nyɔŋmɔ nyɛŋ etsu adesai anaagbai lɛ ahe nii, ni ákɛ adesai anɔnaa kɔɔɔ ehe eko, loo ákɛ Nyɔŋmɔ bɛ shihilɛ mli. (Kpoj. 12:9) Wɔtsɔɔ shiɛmɔ ni wɔshiɛɔ lɛ nɔ wɔfãa anɔkwale ni kɔɔ wɔŋwɛi Tsɛ kpeteŋkpele lɛ he lɛ he. Eba akɛ wɔbaaya nɔ wɔjie egbɛi lɛ yi—amrɔ nɛɛ kɛ agbɛnɛ kɛmiiya naanɔ.—Lala 145:1, 2.