Kã He Oshiɛ!
1 Nyɔŋmɔ suɔmɔnaa nii ji ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Yɛ yiŋtoo nɛɛ hewɔ lɛ, ekɛ sanekpakpa lɛ he shiɛmɔ nitsumɔ eha wɔ. (Mat. 24:14) Kɛ wɔhiɛ sɔ nɔ hewɔ ni esa akɛ wɔkã he wɔshiɛ lɛ, nijiaŋwujee fɛɛ loo nɔ fɛɛ nɔ ni baanyɛ agbala wɔjwɛŋmɔ ni bajeɔ wɔgbɛ nɔ lɛ etsiŋ wɔnaa.
2 Mɛni Hewɔ Esa akɛ Okã He? Nibii babaoo yɛ ni gbalaa mɔ jwɛŋmɔ yɛ je lɛ mli ni haa gbɔmɛi ahiɛ kpaa nɔ ni wɔkɛɔ amɛ lɛ nɔ aloo amɛbuŋ lɛ akɛ eji hiɛdɔɔ sane. No hewɔ lɛ, esa akɛ wɔya nɔ wɔkai amɛ Nyɔŋmɔ yiwalaheremɔ he shɛɛ sane lɛ. (Mat. 24:38, 39) Kɛfata he lɛ, bɔ ni gbɔmɛi awala shihilɛi amli yɔɔ ha lɛ miitsake be fɛɛ be. Je lɛŋ shihilɛi po baanyɛ atsake kwraa amrɔ nɔŋŋ. (1 Kor. 7:31) Ekolɛ wɔ́, wɔsɛɛ otsi, aloo wɔsɛɛ nyɔŋ lɛ nɔ lɛ, mɛi ni wɔshiɛɔ wɔtsɔɔ amɛ lɛ kɛ naagbai heei loo amɛhe saji baakpe ni baaha amɛkɛ hiɛdɔɔ asusu sanekpakpa ni wɔkɛyahaa amɛ lɛ ahe waa. Ani odaaa shi akɛ Odasefonyo ni jaje anɔkwale lɛ etsɔɔ bo lɛ kã he aahu?
3 Nyɔŋmɔ Mɔbɔnalɛ lɛ ni Aaakase: Yehowa kɛ tsuishitoo eŋmɛ gbɛ koni be ashwie mli dani ekɛ kojomɔ aba mɛi fɔ̃ji lɛ anɔ. Kɛtsɔ wɔnɔ lɛ, etee nɔ ebi mɛi ni hiɛ tsui ni ja lɛ koni amɛba eŋɔɔ ní ahere amɛ yiwala. (2 Pet. 3:9) Wɔbaaye lá yi sɔ̃ kɛ́ wɔjajeee Nyɔŋmɔ mɔbɔnalɛ shɛɛ sane lɛ wɔtsɔɔɔ gbɔmɛi lɛ ní wɔbɔ amɛ kɔkɔ yɛ kojomɔ ni Nyɔŋmɔ kɛbaa mɛi fɛɛ ni tsiii amɛhe kɛjɛɛɛ amɛgbɛi fɔ̃ji lɛ anɔ lɛ he lɛ. (Ezek. 33:1-11) Eyɛ mli akɛ jeee be fɛɛ be akɛ miishɛɛ hereɔ wɔshiɛmɔ lɛ nɔ moŋ, shi esaaa akɛ wɔgbɔjɔɔ wɔnijiaŋ kɔkɔɔkɔ yɛ mɔdɛŋ fɛɛ ni wɔbɔɔ koni wɔye wɔbua anɔkwafoi lɛ ni amɛhiɛ asɔ Nyɔŋmɔ mɔbɔnalɛ kpeteŋkpele lɛ mli.—Bɔf. 20:26, 27; Rom. 12:11.
4 Koni Wɔtsɔɔ Suɔmɔ ni Wɔyɔɔ: Yehowa Nyɔŋmɔ ji mɔ ni kɛ famɔ tsɔ Yesu Kristo nɔ ekɛha akɛ ashiɛ sanekpakpa lɛ yɛ shikpɔŋ lɛ fɛɛ nɔ. (Mat. 28:19, 20) Kɛ gbɔmɛi sumɔɔɔ ni amɛboɔ toi po lɛ, wɔyɛ hegbɛ ni wɔkɛaatsɔɔ suɔmɔ kɛ hetuu-kɛhamɔ ni wɔyɔɔ kɛha Nyɔŋmɔ kɛtsɔ nɔ ni ja ni wɔɔya nɔ wɔfee lɛ nɔ.—1 Yoh. 5:3.
5 Eba akɛ wɔɔtswa wɔfai shi akɛ wɔɔkã he wɔshiɛ! Nyɛhaa wɔkɛ ekãa afea enɛ yɛ be mli ni ekã he eji Yehowa “walaheremɔ gbi” lolo lɛ.—2 Kor. 6:2.