Weku Be He Gbɛjianɔtoo—Weku Nikasemɔ
1 Ákɛ fɔlɔ ni ji Kristofonyo lɛ, nikeenii ni hi fe fɛɛ ni obaanyɛ okɛha obii lɛ ji ni oha amɛná suɔmɔ kɛha Yehowa. Be ni hi jogbaŋŋ ní obaanyɛ okɛtsu enɛ he nii ji “beni ota shi yɛ oshia” kɛha daa otsi weku Biblia mli nikasemɔ lɛ. (5 Mose 6:5-7) Kɛji akɛ ohefatalɔ lɛ ji heyelilɔ jio, oyɛ shia ni jamɔ egbála mli lɛ mli jio, loo oji fɔlɔ mɔ kome mɔ jio lɛ, obaanyɛ otsɔ weku nikasemɔ ni okɛ obii lɛ aaafee daa lɛ nɔ oye obua obii lɛ koni amɛtsi kɛbɛŋkɛ bo kɛ Yehowa.
2 Ní Aaaje Nikasemɔ lɛ Shishi: Nɔ ni esa akɛ ofee klɛŋklɛŋ ji ni nyɛfɔ nikasemɔ akɛ weku. Kɛ́ obɛ nɔmimaa yɛ be ni esa akɛ akɛfee nikasemɔ lɛ he lɛ, mɛni hewɔ okɛ oweku lɛ susuuu he? (Abɛi 15:22) Kɛji akɛ oyɛ bii ni darako lɛ, ekolɛ obaanyɛ ofee nikasemɔi ni sɛɛ kɛlɛɛɛ yɛ bei srɔtoi amli yɛ otsi lɛ mli fɛɛ. Taomɔ be he gbɛjianɔtoo ni baahi fe fɛɛ kɛha oweku lɛ. Ŋmaa be pɔtɛɛ kɛha nikasemɔ lɛ yɛ oweku be he gbɛjianɔtoo lɛ mli, ni oŋmɔ oyiŋ kpɔ akɛ okɛbaatsu nii.
3 Mɛni nyɛbaanyɛ nyɛkase? Wekui komɛi kaseɔ nɔ ni abaakase yɛ Asafo Woloŋ Nikasemɔ loo Buu-Mɔɔ Nikasemɔ lɛ shishi lɛ. Wekui krokomɛi hu kaseɔ saji ni aŋma titri kɛha oblahii kɛ oblayei lɛ. Tsɛ ko ni yɔɔ binuu kɛ biyoo fioo lɛ wie akɛ: “Nɔ̃ kome ni haa wɔnikasemɔ lɛ feɔ nɔ ni yɔɔ miishɛɛ waa kɛha gbekɛbii lɛ yɛ otsi lɛ mli ji akɛ, wɔkɛ nibii ni yɔɔ Mi-Wolo ni Gbaa Biblia Mli Saji lɛ mli lɛ feɔ drama. Hewalɛ babaoo ni enáa yɛ amɛnɔ, kɛ shishinumɔ ni jɛɔ mli kɛbaa lɛ he hiaa kwraa fe kukuji abɔ ni akaseɔ.”
4 Nyɛfea Nikasemɔ lɛ Daa Otsi: Esa akɛ afee weku nikasemɔ lɛ daa, ní efee nɔ ni weku mlibii lɛ fɛɛ kɛ miishɛɛ baakpa lɛ gbɛ. Kɛ́ shihilɛi komɛi ba, ni ekolɛ ehe bahia ni atsu nomɛi ahe nii lɛ, esaaa akɛ afeɔ kpɛŋŋ yɛ gbi kɛ be ni akɛfeɔ nikasemɔ lɛ he. Ekolɛ bei komɛi hu baashɛ ni ehe baahia ni atsake nɔ ni akaseɔ lɛ. Shi esaaa akɛ tsakemɔ ko ni ehe hiaa ni afee lɛ haa afoɔ weku nikasemɔ be he gbɛjianɔtoo lɛ mli bei kakadaŋŋ. Biyoo ko ni yɔɔ shia ko mli lɛ wie akɛ: “Kɛ́ ehe bahia koni atsake be ni wɔkɛbaakase nii lɛ, Ataa ŋmaa be hee lɛ ni ekɛkpɛtɛɔ he ni mɔ fɛɛ mɔ baanyɛ ana, bɔni afee ni wɔ fɛɛ wɔle be ni akɛbaafee nikasemɔ lɛ.” Mɔdɛŋ ni tamɔ nɛkɛ ni abɔɔ koni afee weku nikasemɔ lɛ daa lɛ sa yijiemɔ waa! Be mli ni oyaa nɔ otsɔseɔ obii lɛ “yɛ Nuŋtsɔ lɛ tsɔsemɔ kɛ ŋaawoo lɛ mli” lɛ, okɛtsɔɔ akɛ oyɛ suɔmɔ kɛha amɛ kɛ oŋwɛi Tsɛ lɛ.—Efe. 6:4.