Bɔ ni Weku Mli Bii Feɔ Ekome Koni Amɛná Mli Gbɛfaŋnɔ Kɛmɔ Shi—Yɛ Biblia Mli Nikasemɔ Mli
1 Anɔkwale lɛ haa shishinumɔ diɛŋtsɛ kɛ yiŋtoo kpakpa baa weku shihilɛ mli, shi omanye ni aaaye yɛ Yehowa sɔɔmɔ mli lɛ baaa trukaa. Ebiɔ be kɛ mɔdɛŋbɔɔ dani anyɛɔ atswaa shia ni he wa yɛ mumɔŋ lɛ amaa shi. Ehe miihia waa ni weku lɛ mli bii atsu nii yɛ ekomefeemɔ mli koni ashɛ oti nɛɛ he. Sane ni ajara mli awo fãi etɛ mli lɛ mli klɛŋklɛŋ nɔ̃ nɛɛ baagbala jwɛŋmɔ kɛya bɔ ni wekui baanyɛ afee ekome yɛ nikasemɔ sui kpakpai ni amɛaana lɛ mli.
2 Kɛtsɔ Biblia lɛ Kanemɔ Daa Gbi lɛ Nɔ: Abɛi 24:5 kɛɔ akɛ, “gbɔmɔ ni le nii lɛ, ehewalɛ fa.” Nilee ni anaa kɛjɛɔ Nyɔŋmɔ Wiemɔ lɛ ni akaneɔ daa gbi lɛ mli lɛ haa gbɔmɔ naa mligbɛ hewalɛ ko ni he hiaa koni ekɛte shi ewo Satan tutuamɔi ni baanyɛ aye emumɔŋ shidaamɔ awui lɛ. (Lala 1:1, 2) Ani nyɛfeɔ ekome akɛ weku kɛkaneɔ Biblia lɛ? Akɛ “Biblia Kanemɔ He Gbɛjianɔtoo ni Fata He” kɛha otsi fɛɛ otsi yɛ afi lɛ mli lɛ ewo Teokrase Sɔɔmɔ Skul He Gbɛjianɔtoo lɛ mli. Ekɛ nitsumɔ biɔ ni weku lɛ afite minitii fioo ni shɛɔ nyɔŋma daa gbi kɛkane. Nyɛhalaa be ni sa, tamɔ be mli ni aaye leebi niyenii, beni aye gbɛkɛ niyenii agbe naa, aloo dani aaabote saa mli, koni akane Biblia lɛ, ni asusu gbi lɛ ŋmalɛ ni yɔɔ Ŋmalɛi lɛ Amli ni Wɔɔkwɛ lɛ mli lɛ he. Nyɛhaa enɛ afea nyɛweku lɛ daa gbi nifeemɔ lɛ fã.
3 Kɛtsɔ Kutuu ni Nyɛaafee Kɛkase Nii Daa Otsi lɛ Nɔ: Esa akɛ weku Biblia mli nikasemɔ lɛ afee nɔ ni maa weku lɛ otsi lɛ mli nibii lɛ anɔ mi. Esa akɛ emli bii lɛ ateŋ mɔ fɛɛ mɔ afi sɛɛ kɛtsɔ ehe ni ekɛaawo nikasemɔ lɛ mli kɛ ekãa lɛ nɔ. Weku yitso lɛ baasumɔ ni eha weku lɛ hiamɔ nii ahi ejwɛŋmɔ mli yɛ be mli ni ehalaa nii ni esa akɛ akase lɛ, kɛ gbi, be, kɛ nikasemɔ lɛ sɛɛkɛlɛ. Nyɛhaa weku nikasemɔ lɛ afea nɔ ni he hiaa fe fɛɛ yɛ otsi lɛ nifeemɔi lɛ amli. Nyɛkahaa nibii ni he ehiaaa tsɔ miifite lɛ.—Fil. 1:10, 11.
4 Tsɛ ko ni afɔɔ lɛ tɛlifoŋ tswaa yɛ nitsumɔi ahewɔ lɛ gbeɔ tɛlifoŋ lɛ yɛ be mli ni weku nikasemɔ lɛ yaa nɔ lɛ. Kɛ mɛi ba shia lɛ koni etsu nii eha amɛ lɛ, ehaa amɛbafataa amɛhe yɛ nikasemɔ lɛ mli aloo amɛmɛɔ aahu kɛyashiɔ agbeɔ nikasemɔ lɛ naa. Tsɛ lɛ tswa efai shi akɛ, ehaŋ nɔ ko nɔ ko afite weku nikasemɔ lɛ. Enɛ ha ebii lɛ nu shishi waa diɛŋtsɛ, ni yɛ enitsumɔ lɛ hu gbɛfaŋ lɛ, eye omanye babaoo.
5 Kwɛ bɔ ni eyɔɔ miishɛɛ kɛ́ weku lɛ mli bii fee ekome yɛ mumɔŋ nitsumɔi amli! Mɔdɛŋ ni wɔɔbɔ yɛ anɔkwale mli, koni wɔkɛ wɔhe awo weku Biblia mli nikasemɔ mli kɛmɔ shi lɛ kɛ Yehowa jɔɔmɔ baa.—Lala 1:3.