Sanekpakpa lɛ ní Wɔkɛaaha Mɛi Fɛɛ ni Wɔnine Baanyɛ Ashɛ Amɛnɔ
1. Mɛni mra be mli Kristofoi lɛ fee bɔni afee ni amɛkɛ sanekpakpa lɛ aha mɛi fɛɛ ni amɛnine baanyɛ ashɛ amɛnɔ lɛ?
1 Yesu mra be mli kaselɔi lɛ kɛ mɔdɛŋbɔɔ shiɛ Maŋtsɛyeli lɛ he shɛɛ sane lɛ amɛtsɔɔ mɛi. Amɛkɛ gbɛ̀i ni mɔɔ shi jogbaŋŋ tsu nii kɛshiɛ amɛtsɔɔ mɛi fɛɛ ni amɛnine nyɛ shɛ amɛnɔ lɛ. Biblia ŋmalɔi ni ji Kristofoi lɛ ŋmala amɛwoji ni jɛ mumɔŋ lɛ yɛ Hela wiemɔ ni mɛi babaoo nuɔ ní no mli lɛ no nɔŋŋ ji wiemɔ titri ni maji ni yɔɔ Roma Nɔyeli lɛ shishi lɛ kɛtsuɔ nii lɛ mli. Kɛfata he lɛ, shiɛlɔi ni yɔɔ ekãa ni hi shi kɛjɛ afi 100 Ŋ.B. afii lɛ amli kɛmɔ afi 200 Ŋ.B. afii lɛ amli lɛ ji mɛi klɛŋklɛŋ ni kɛ Biblia wolokpo ni ji codex lɛ tsu nii, ni ŋmalɛi ataomɔ yɛ wolokpo nɛɛ mli yɛ mlɛo kwraa fe bɔ ni eji yɛ woji ni akɛ niji ŋmala ní akotaa lɛ amli.
2, 3. (a) Mɛɛ gbɛ nɔ Yesaia 60:16 lɛ náa emlibaa ŋmɛnɛ? (b) Akɛ tsɔnei miitsu nii koni akɛha anɔkwa jamɔ ashwere yɛ mɛɛ gbɛ nɔ?
2 Tsɔnei ni Akɛtsuɔ He Nii: Yehowa tsɔ gbalɔ Yesaia nɔ egba akɛ: “Ooonu jeŋmaji afufɔ.” (Yes. 60:16) Odaseyeli ni tsɔɔ akɛ gbalɛ nɛɛ eba mli ŋmɛnɛ ji akɛ, Yehowa tsuji kɛ jeŋmaji lɛ anibii ni he yɔɔ sɛɛnamɔ waa lɛ miitsu nii koni amɛkɛha shiɛmɔ nitsumɔ lɛ aya hiɛ. Ákɛ nɔkwɛmɔnɔ lɛ, Biblia Kaselɔi lɛ bɔi “Photo-Drama of Creation” sini lɛ jiemɔ kɛjɛ afi 1914 kɛbaa, ni yɛ no beaŋ lɛ afeko sinii ni mɛi ni yɔɔ mli lɛ nyɛɔ amɛtsiɔ amɛhe ní amɛwieɔ hu. Sini ni heɔ ŋmɛlɛtswai kpaanyɔ ní mɛi ni yɔɔ mli lɛ nyɛɔ amɛtsiɔ amɛhe ní anuɔ amɛgbee hu, ní mfonirii srɔtoi yɔɔ mli lɛ ye bua ni anyɛ aye mɛi akpekpei abɔ odase jogbaŋŋ.
3 Nyɔŋmɔ webii lɛ kɛ tsɔnei ni nyɛɔ ekalaa woji babaoo yɛ be kukuoo mli kɛ tsɔnei krokomɛi ni akɛ kɔmpiuta kudɔɔ amɛ lɛ tsuɔ nii kɛfeɔ Biblia kɛ Biblia kasemɔ he woji yɛ wiemɔi ohai abɔ amli. Akɛ gbɛfãa gbɛ̀i srɔtoi ni yɔɔ oya tsuɔ nii koni akɛ Biblia he woji aya shikpɔŋ lɛ nɔ hei ni yɔɔ shɔŋŋ, ni akɛyahaa mɛi ni yɔɔ maji 235 anɔ. Yehowa kɛ emumɔ lɛ ekanya etsuji bɔni afee ni amɛkɛ tsɔnei nɛɛ atsu nii jogbaŋŋ kɛmɔ shi, ni enɛ eha mɛi babaoo anine miishɛ Biblia mli anɔkwalei lɛ anɔ ŋmɛnɛ fe bei fɛɛ ni eho.
4. Mɛɛ tsakemɔi mɛi komɛi efee yɛ amɛshihilɛi amli bɔni afee ni amɛnyɛ amɛkɛ sanekpakpa lɛ ayaha mɛi babaoo?
4 Tsakemɔi ni Mɛi Feɔ: Awoɔ anɔkwa jálɔi hewalɛ ni amɛfee tsakemɔi yɛ amɛshihilɛi amli ákɛ aŋkroaŋkroi bɔni afee ni amɛnyɛ amɛkɛ sanekpakpa lɛ ayaha mɛi babaoo. Mɛi pii eha amɛshihilɛ efee nɔ ni yɔɔ mlɛo koni no aha amɛnyɛ amɛkɛ amɛhe awo shiɛmɔ nitsumɔ lɛ mli babaoo. Mɛi komɛi efã kɛtee koni amɛyasɔmɔ yɛ hei ni Maŋtsɛyeli jajelɔi pii bɛ jɛmɛ. Mɛi krokomɛi hu ekase maŋsɛɛ wiemɔ, ni enɛ eha amɛlɛɛ amɛshiɛmɔ nitsumɔ lɛ mli.
5, 6. Mɛni abaanyɛ afee koni nine anyɛ ashɛ mɛi babaoo anɔ yɛ shikpɔŋkuku lɛ mli?
5 Kɛfata he lɛ, shiɛmɔ ni wɔɔshiɛ yɛ bei amli ni mɛi lɛ yɔɔ shia, kɛ agbɛnɛ yɛ hei ni abaanyɛ ana mɛi lɛ yɛ lɛ hu baaha wɔnyɛ wɔkɛ sanekpakpa lɛ ayaha mɛi babaoo. Kɛji ofɔɔɔ mɛi ni yɔɔ oshikpɔŋkuku lɛ mli lɛ namɔ yɛ shia beni otee shiɛmɔ leebi loo shwane lɛ, ani obaanyɛ otsake be ni okɛyaa shiɛmɔ lɛ koni oya lɛ gbɛkɛnaashi? Ani ayɛ hei ni mɛi fɔɔ jɛmɛ baa ní abaanyɛ aye odase yɛ jɛmɛ? Ani oka tɛlifoŋ nɔ odaseyeli kɛ shikpɔŋkuku ni nitsumɔhei yɔɔ jɛmɛ lɛ mli nitsumɔ okwɛ pɛŋ? Ani otaoɔ gbɛ̀i anɔ ni oootsɔ oye trukaa odase?
6 Kwɛ hegbɛ ni wɔná akɛ wɔɔná Yehowa gbɛi kɛ e-Maŋtsɛyeli lɛ he odase ni ayeɔ yɛ gbɛ ni da nɔ lɛ mli gbɛfaŋnɔ! Eba akɛ wɔɔya nɔ wɔkɛ Nyɔŋmɔ Wiemɔ lɛ mli anɔkwalei ni haa anáa wala lɛ aha mɛi fɛɛ ni wɔnine baanyɛ ashɛ amɛnɔ.—Mat. 28:19, 20.