‘Feemɔ nɔ Fɛɛ nɔ Yɛ Sanekpakpa lɛ Hewɔ’
1. Mɛni Maŋtsɛyeli shiɛlɔi shweɔ akɛ amɛfee amɛha mɛi krokomɛi, ni mɛni hewɔ?
1 Bɔfo Paulo nu he akɛ sɔ̃ kã enɔ akɛ ejaje sanekpakpa lɛ etsɔɔ mɛi krokomɛi. (1 Kor. 9:16, 19, 23) Nakai nɔŋŋ hu bɔ ni wɔsusuɔ mɛi anaanɔ hilɛ-kɛhamɔ he lɛ tsirɛɔ wɔ koni wɔyashiɛ sanekpakpa lɛ wɔtsɔɔ amɛ.
2. Mɛɛ tsakemɔi wɔbaasumɔ akɛ wɔfee beni wɔshiɛɔ lɛ, ni mɛni hewɔ?
2 Shiɛmɔ Yɛ Hei ni Mɛi Yɔɔ kɛ Be ni Obaana Amɛ: Wolɛɛnyo ni he esa lɛ eŋmɛɛɛ eyaa lɛ yɛ he fɛɛ he kɛkɛ, shi moŋ eŋmɛɔ yɛ he ni ebaanyɛ ena looi lɛ yɛ, kɛ be mli ni amɛjeɔ kpo. Ákɛ “gbɔmɛi ahe wolɛi” lɛ, ekolɛ ehe baahia ni wɔ hu wɔfee tsakemɔi komɛi koni wɔnine ashɛ mɛi anɔ yɛ wɔshikpɔŋkuku lɛ mli, bɔni afee ni wɔtsui anyɔ wɔ mli yɛ nitsumɔ ni ji “looi srɔtoi fɛɛ” anaabuamɔ lɛ mli. (Mat. 4:19; 13:47) Ani wɔbaanyɛ wɔyanina mɛi lɛ yɛ amɛshiai amli gbɛkɛ beni amɛkpa nitsumɔ aloo wɔye amɛ odase yɛ gbɛjegbɛi lɛ anɔ leebi mra? Oti ni ma Paulo hiɛ ji ní ‘eye sanekpakpa lɛ he odase kɛmɔ shi,’ ni eŋɔ hegbɛi ni sa lɛ kɛfee nakai.—Bɔf. 17:17; 20:20, 24.
3, 4. Mɛɛ gbɛi anɔ wɔbaanyɛ wɔtsake wɔhe wɔwo mɛi ashihilɛ mli beni wɔtsuɔ shiɛmɔ nitsumɔ lɛ, ni mɛni baanyɛ ajɛ mli aba?
3 Tsakemɔ Oshiɛmɔ Wiemɔ lɛ Mli ni Ekɔ Mɛi lɛ Ahe: Bei pii lɛ, wolɛi tsakeɔ gbɛ ni amɛtsɔɔ nɔ amɛshaa loo lɛ mli kɛ́ amɛmiitao amɛshá loo pɔtɛɛ ko. Mɛɛ gbɛ nɔ wɔbaanyɛ wɔtsɔ wɔkɛ Maŋtsɛyeli sanekpakpa lɛ aha mɛi ni yɔɔ wɔshikpɔŋkuku lɛ mli lɛ koni amɛná he miishɛɛ? Esa akɛ wɔkɛ hiɛshikamɔ akpá sane ko ni kɔɔ mɛi babaoo ahe lɛ hiɛ, koni no sɛɛ lɛ wɔbo nɔ ni amɛyɔɔ kɛɛmɔ yɛ he lɛ toi jogbaŋŋ. (Yak. 1:19) Wɔbaanyɛ wɔbi sane ni haa mɔ tsɔɔ ejwɛŋmɔ koni wɔle nɔ ni amɛsusuɔ. (Abɛi 20:5) Enɛ ni wɔɔfee lɛ baaha wɔnyɛ wɔtsake gbɛ̀i anɔ ni wɔtsɔɔ wɔkɛ sanekpakpa lɛ haa lɛ mli bɔni afee ni esa mɛi lɛ ashihilɛi ahe. Paulo tsɔ ehe ‘nɔ fɛɛ nɔ eha mɛi fɛɛ.’ (1 Kor. 9:22) Wɔhe ni wɔɔtsake wɔwo mɛi ashihilɛ mli lɛ ji gbɛ titri ni haa wɔshɛɔ mɛi atsui ahe.
4 Eji miishɛɛ kpele akɛ wɔkɛ mɛi aaaja “nɔ kpakpa ko he sanekpakpa”! (Yes. 52:7) Eba akɛ ‘wɔɔfee nɔ fɛɛ nɔ yɛ sanekpakpa lɛ hewɔ,’ bɔni afee ni wɔnine ashɛ mɛi babaoo nɔ.—1 Kor. 9:23.