Mɔ Fɛɛ Mɔ Aha Enaanyo Nane Amɔ Shi
1 Bɔfo Paulo bɔ mɔdɛŋ fɛɛ ni ebaanyɛ koni ewo nanemɛi heyelilɔi ahewalɛ. (Bɔf. 14:19-22) Wɔ hu wɔnuɔ he wɔhaa wɔnyɛmimɛi lɛ kɛ́ amɛkɛ naagbai kpe, ni wɔsumɔɔ ni wɔye wɔbua amɛ. Biblia lɛ tsɔɔ akɛ jeee asafoŋ onukpai pɛ esa akɛ amɛnu he amɛha mɛi krokomɛi, shi moŋ wɔ fɛɛ. (Rom. 15:1, 2) Susumɔ gbɛ̀i enyɔ ni wɔbaanyɛ wɔtsɔ nɔ wɔkɛ ŋaawoo ni suɔmɔ yɔɔ mli ni ji: “Nyɛtsɛ́a nyɛtsui nyɛŋmɛa nyɛmli, ni mɔ aha enaanyo nane amɔ shi” lɛ atsu nii lɛ he okwɛ.—1 Tes. 5:11.
2 Yɔsemɔ Mɛi Krokomɛi Ahiamɔ Nii: Nyɔŋmɔ Wiemɔ lɛ bɔɔ amaniɛ akɛ Dorka “eyi obɔ kɛ nitsumɔi kpakpai kɛ ejuji ni efeɔ.” (Bɔf. 9:36, 39) Eyɔse mɛi ni ehia amɛ lɛ, ni ebɔ mɔdɛŋ fɛɛ ni ebaanyɛ ni ekɛye ebua amɛ. Mɛɛ nɔkwɛmɔnɔ kpakpa po efee kɛha wɔ nɛkɛ! Ekolɛ, oyɔse akɛ ehe miihia ni akɛ tsɔne ayawo mɔ ko ni egbɔ lɛ kɛya kpeei. Aloo gbɛgbalɔ ko yɛ ni enáaa mɔ ko ekɛya shiɛmɔ yɛ otsi lɛ mli shwane ko. Kɛ́ oyɔse mɔ ko ni yɔɔ hiamɔ tamɔ nakai ni obɔ mɔdɛŋ oye obua lɛ lɛ, kwɛ bɔ ni no baawo lɛ hewalɛ eha!
3 Mumɔŋ Nibii Ahe Sanegbaai: Wɔbaanyɛ wɔha mɛi krokomɛi anane amɔ shi hu kɛtsɔ wɔwiemɔ nɔ. (Efe. 4:29) Onukpa ko ni yɔɔ niiashikpamɔ lɛ kɛɛ akɛ: “Kɛ́ ootao ni owo mɛi ahewalɛ lɛ, no lɛ okɛ amɛ agba mumɔŋ nibii ahe sane. Kɛ́ ootao oje sanegbaa ni tswaa mɔ emaa shi shishi lɛ, obaanyɛ obi sane ni yɔɔ mlɛo tamɔ, ‘Mɛɛ gbɛ nɔ otsɔ̃ obale anɔkwale lɛ?’” Ná gbekɛbii ni yɔɔ asafo lɛ mli lɛ ahe miishɛɛ diɛŋtsɛ. Tsi obɛŋkɛ mɛi ni amɛnijiaŋ eje wui kɛ mɛi ni amɛhiɛ gboɔ lɛ. (Abɛi 12:25) Kaaha je lɛ hiɛtserɛjiemɔi lɛ ahe sanegbaa miitsĩ mumɔŋ nibii ahe sane ni okɛ nanemɛi heyelilɔi aaagba lɛ naa.—Rom. 1:11, 12.
4 Shi mɛni obaanyɛ owie ni okɛha mɛi anane amɔ shi? Ani okɛ sane oti ko kpe yɛ o-Biblia kanemɔ kɛ ekasemɔ lɛ mli ní waje hiɛsɔɔ ni oyɔɔ kɛha Yehowa lɛ? Ani sane ko ni onu yɛ maŋshiɛmɔ ko loo Buu-Mɔɔ Nikasemɔ ko mli lɛ wo bo hewalɛ? Loo niiashikpamɔ ko ni tswaa mɔ hemɔkɛyeli emaa shi lɛ ta otsuiŋ? Kɛji ohiɛ sɔ anɔkwalei ni he hiaa nɛɛ lɛ, obaaná nɔ ko ni woɔ mɔ hewalɛ ni okɛ mɛi krokomɛi agba he sane be fɛɛ be.—Abɛi 2:1; Luka 6:45.
5 Eba akɛ wɔ fɛɛ wɔbaaha wɔnaanyo nane amɔ shi kɛtsɔ yelikɛbuamɔ ni wɔkɛaaha amɛ, kɛ wɔlilɛi ni wɔkɛaatsu nii yɛ nilee mli lɛ nɔ.—Abɛi 12:18.