Okɛ Ekaa Ajaje Sanekpakpa Lɛ
1 Yɛ yinɔsane mli lɛ, ale anɔkwa Kristofoi yɛ amɛ ekaafeemɔ hewɔ. Bɔfo Petro kɛ Yohane ji enɛ he nɔkwɛmɔ nii titrii. Yɛ amɛ tsuŋwoo kɛ hegbeyeiwoo lɛ fɛɛ sɛɛ lɛ, nɛkɛ bɔfoi nɛɛ kɛ ekaa su ni gbeyeishemɔ bɛ mli tee nɔ amɛwie anɔkwale lɛ. (Bɔfoi 4:18-20, 23, 31b) Paulo hu kɛ ekaa tsu esɔɔmɔ lɛ he nii yɛ shikpɔŋkuku ni mli wa mli eyɛ mli akɛ ekɛ yiwai babaoo kpe.—Bɔfoi 20:20; 2 Kor. 11:23, 28.
2 Te fee tɛŋŋ ni yɛ haomɔi wuji nɛɛ fɛɛ sɛɛ lɛ, bɔfoi lɛ kɛ agbɛnɛ Kristofoi krokomɛi ni ehi shi yɛ yinɔsane be fɛɛ mli lɛ nyɛ amɛtee nɔ amɛkɛ ekaa jaje sanekpakpa lɛ? Bɔfo Paulo haa nakai sanebimɔ lɛ hetoo yɛ 1 Tesalonikabii 2:2, he ni ekɛɔ yɛ akɛ, “Shi moŋ wɔna ekaa yɛ wɔ-Nyɔŋmɔ lɛ mli, ni wɔkɛjaje Nyɔŋmɔ sanekpakpa lɛ wɔtsɔɔ nyɛ yɛ pelemɔ babaoo mli.” Yɛ nakai gbɛ nɔ nɔŋŋ hu Petro kɛ Yohane kɛ agbɛnɛ kaselɔi krokomɛi nyɛ amɛjaje sanekpakpa lɛ yɛ ekaa naa. Beni ajie amɛ kɛjɛ amɛ tsuŋwoo lɛ mli lɛ, Petro kɛ Yohane bɔ amɛnanemɛi kaselɔi lɛ amaniɛ. Amɛtsɔ sɔlemɔ nɔ amɛkpa Yehowa fai ni eha amɛ ekaa kɛ hewalɛ ‘ni amɛya nɔ amɛjaje ewiemɔ lɛ yɛ ekaa naa.’ Nyɔŋmɔ ha nɛkɛ sɔlemɔ nɛɛ hetoo amrɔ nɔŋŋ yɛ be mli ni “mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekaa jaje Nyɔŋmɔ wiemɔ lɛ.”—Bɔfoi 4:29, 31.
Yehowa Mli Hekɛnɔfɔɔ Ni Aaajie Lɛ Kpo
3 Bɔfoi lɛ yɛ hekɛnɔfɔɔ akɛ Yehowa miifi amɛsɛɛ. Shiwoi fɛɛ ni Yehowa kɛha kɛtsɔ e-Wiemɔ lɛ nɔ lɛ miiba mli anɔkwale. Ni Yesu Kristo ema nɔ ni baaba mli lɛ nɔ aduatsɔ. Ani wɔ hu wɔyɛ nɛkɛ hekɛnɔfɔɔ nɛɛ nɔŋŋ ni wɔkɛaajaje sanekpakpa lɛ yɛ ekaa naa? Yɛ be mli ni wɔwieee kɛ lilɛi sɔrɔtoi ni wɔtsaaa helatsɛmɛi hu lɛ, kɛlɛ wɔyɛ odaseyelii babaoo ni tsɔɔ Yehowa sɛɛfimɔ. Kɛ wɔna Biblia gbalɛ mlibaa lɛ, ani enɛ tsirɛɔ wɔ koni wɔkɛ ekaa ajaje Nyɔŋmɔ Maŋtsɛyeli lɛ he sanekpakpa lɛ?
4 Shi ebaakpa gbɛ moŋ akɛ, nɛkɛ shiɛmɔ yɛ ekaa naa nɛɛ kɛ shitee-kɛ-woo baakpe. (Yoh. 15:20) Nakai ji bɔ ni ebalɛ yɛ Yesu kɛ klɛŋklɛŋ afii oha lɛ mli Kristofoi lɛ ahe. Shi enɛ etsiii amɛ gbɛ ni asaŋ ehaaa hewalɛ ni amɛkɛshiɛɔ lɛ nɔ agbɔ. Yɛ anɔkwale mli lɛ, yɛ be babaoo mli lɛ shitee-kɛ-woo ni tamɔ nɛkɛ haa amɛ hegbɛi wuji koni amɛkɛgbɛ Maŋtsɛyeli lɛ he sanekpakpa lɛ amɛshwa. (Bɔfoi 4:3, 8-13a) Akɛni wɔkɛ wɔhe kpɛtɛɔ Nyɔŋmɔ Wiemɔ lɛ he yɛ saji ni he hiaa lɛ ahe akɛ Kristofoi hewɔ lɛ, yɛ bei babaoo mli lɛ atsɛɔ wɔ koni wɔbatsɔɔ wɔ shidaamɔ lɛ mli. Wɔbuɔ bei ni tamɔ nɛkɛ akɛ hegbɛi ni wɔna ni wɔkɛaajaje sanekpakpa lɛ yɛ ekaa naa. Yɛ nakai feemɔ mli lɛ, belɛ wɔmiikase Yesu Kristo kɛ ebɔfoi lɛ.
5 Gbɛgbalɔi awamɔ haa wɔnaa hegbɛi wuji koni wɔkɛjaje sanekpakpa lɛ. Mɛi pii baafee gbɛgbalɔi awalɔi yɛ April kɛ May mli, yɛ be mli ni mɛi krokomɛi hu miito gbɛjianɔ koni amɛfee nakai yɛ nyɔji krokomɛi amli lɛ. Ani shihilɛ mli ni oyɔɔ lɛ baaŋmɛ bo gbɛ ni okɛ ohe awo mli? Kɛ wɔbɔ mɔdɛŋ wɔna gbɛgbalɔi awamɔ nitsumɔ lɛ mli gbɛfaŋnɔ lɛ, wɔjieɔ wɔhe kpo akɛ wɔtamɔ Paulo kɛ Barnaba. Bɔfoi lɛ Asaji 14:3 kɛɔ akɛ “shi amɛtsɛ yɛ jɛi kɛ̃ ni amɛkɛ ekaa wie Nuŋtsɔ [Yehowa] lɛ he.” Kɛji akɛ wɔnyɛ wɔhe be kɛjɛ nitsumɔi krokomɛi amli ni kɛ hooo lɛ wɔkɛ ŋmɛlɛtswai 60 tsu nii yɛ sɔɔmɔ nitsumɔ lɛ mli yɛ nyɔŋ kome mli lɛ, ŋwanejee ko bɛ he akɛ wɔ jɔɔmɔi lɛ baafa babaoo.
6 Ekaa ni wɔɔfee yɛ sɔɔmɔ nitsumɔ lɛ mli lɛ yeɔ buaa titri yɛ be mli ni wɔkɛ woji tɛtrɛbii haa lɛ. Nɔ ni yɔɔ woji tɛtrɛbii lɛ amli ji shɛɛ saji ni hereɔ mɔ yiwala ni damɔ Nyɔŋmɔ Wiemɔ lɛ nɔ. No hewɔ lɛ nyɛkahaa wɔkpaa, shi moŋ wɔshiɛ kɛ ekaa ni wɔkɛkase wɔ Nɔkwɛlɔ, Yesu kɛ ebɔfoi lɛ.