Ani Obi lɛ Baanyɛ Akpɛ Eyiŋ Tamɔ Mɔ ko ni Eda?
1. Mɛɛ shidaamɔ oblahii kɛ oblayei ni ji Odasefoi lɛ ekɔ yɛ lá kɛ nitsumɔ he? Okɛ nɔkwɛmɔnɔ aha.
1 Ebaakpɛ eyiŋ tamɔ mɔ ko ni eda, yɛ mɛni he? Yɛ lá ní agbalaa awoɔ mɔ mli lɛ he. Taakɛ nikasemɔ ni ji “Walk as Instructed by Jehovah” (Nyiɛmɔ yɛ Bɔ ni Yehowa Etsɔɔ lɛ Naa) ni je kpo yɛ June 15, afi 1991 The Watchtower lɛ mli lɛ tsɔɔ lɛ, Yehowa Odasefoi abii lɛ kɛ shiŋŋfeemɔ etsɔɔ saji amli faŋŋ akɛ toiboo ni amɛsumɔɔ akɛ amɛfee amɛha Nyɔŋmɔ mla ni kɔɔ lá he lɛ he hiaa amɛ taakɛ ehe hiaa amɛfɔlɔi lɛ pɛpɛɛpɛ. Ani aakpa enɛ gbɛ kɛmiijɛ obi ni yɛ mla naa lɛ edako lɛ dɛŋ?
2. Mɛɛ shishitoo mla saneyelihe ko kɛtsu nii yɛ gbekɛ ko ni kpoo akɛ eeehe lá lɛ gbɛfaŋ, ni mɛni fɔlɔi ni ji Kristofoi kɛ amɛbii bibii lɛ kaseɔ yɛ enɛ mli?
2 Mɛni Mla lɛ Kɛɔ Yɛ He? Yɛ United States lɛ, saneyelihe wulu fe fɛɛ ní ebu atɛŋ yɛ hegbɛ ni gbekɛ ni eda, shi yɛ mla naa lɛ abuɔ lɛ akɛ edako lɛ yɔɔ ni ekɛaakpoo lá ni agbalaa awoɔ mɔ mli lɛ he ji Illinois Supreme Court. Beni saneyelihe nɛɛ saa ekwɛɔ nyɛmiyoo ko ni eye afii 17 lɛ sane mli ekoŋŋ lɛ, ekɛɛ akɛ: “Kɛ́ ayɛ odaseyeli ni yɔɔ faŋŋ ni tsɔɔ mɔ yiŋ akɛ gbekɛ lɛ eda bɔ ni sa, ni enuɔ nɔ ni baajɛ enifeemɔi lɛ amli aba lɛ shishi, [ni] ekpɛɔ eyiŋ tamɔ mɔ ko ni eda lɛ, no lɛ maŋ lɛ mla lɛ fiɔ yiŋ ni gbekɛ ni abuɔ lɛ yɛ mla naa akɛ edako lɛ ekpɛ lɛ sɛɛ akɛ eyɛ hegbɛ akɛ ekpɛlɛɔ tsofafeemɔ mli tsamɔ ni akɛhaa lɛ lɛ nɔ loo ekpoɔ enɛ.” Enɛ hewɔ lɛ, kɛji akɛ datrɛfoi loo maŋ onukpai miitao amɛna kɛji akɛ gbekɛ ko eda bɔ ni eeenyɛ ekpɛ yiŋ eha lɛ diɛŋtsɛ ehe lɛ, ekolɛ amɛbaabi helatsɛ lɛ koni lɛ diɛŋtsɛ etsɔɔ nɔ hewɔ ni esumɔɔɔ ni ahaa lɛ lá lɛ mli. Ehe baahia ni gbekɛ lɛ anu bɔ ni hela ni yeɔ lɛ lɛ yɔɔ hiɛdɔɔ ha, kɛ nɔ ni baajɛ gbɛ ni ehala akɛ atsɔ nɔ atsa lɛ lɛ mli aba lɛ shishi, ní ekɛ shiŋŋfeemɔ atsɔɔ ejamɔŋ hemɔkɛyeli yɛ Nyɔŋmɔ mla ni kɔɔ lá he lɛ mli faŋŋ.
3. Mɛɛ sanebimɔi esa akɛ fɔlɔi kɛ hiɛdɔɔ asusu he, ni mɛni hewɔ?
3 Mɛni Obi lɛ Baakɛɛ? Ani obii lɛ esaa amɛhe jogbaŋŋ koni amɛ diɛŋtsɛ amɛgbála sane nɛɛ mli? Ani amɛkɛ amɛtsui fɛɛ heɔ yeɔ akɛ Nyɔŋmɔ famɔ ji akɛ ‘ahi lá’? (Bɔf. 15:29; 21:25) Ani amɛbaanyɛ amɛjɛ Ŋmalɛi lɛ amli amɛtsɔɔ amɛhemɔkɛyeli lɛ mli? Kɛ́ datrɛfoi kɛɛ akɛ gbekɛ lɛ wala ebaje oshara mli lɛ, ani gbekɛ lɛ baanyɛ ekɛ ekãa afã eyiŋ ni ekpɛ yɛ lá he ni etsakeee lɛ he kɛji akɛ efɔlɔi bɛ jɛmɛ po? Akɛni ‘be kɛ nibii ni aleee ní baa trukaa ninaa wɔ fɛɛ’ hewɔ lɛ, mɛɛ gbɛ nɔ obaatsɔ osaa obii lɛ kɛha amɛnɔkwayeli lɛ he kaa fɛɛ kaa ni baanyɛ aba trukaa lɛ?—Jaj. 9:11; Efe. 6:4.
4, 5. (a) Mɛɛ sɔ̃ kã fɔlɔi anɔ, ni mɛɛ gbɛ nɔ amɛbaanyɛ amɛtsɔ amɛtsu he nii? (b) Mɛɛ saji yɔɔ ni baaye abua fɔlɔi?
4 Fɔlɔi, Mɛni Nyɛbaanyɛ Nyɛfee? Sɔ̃ kã nyɛnɔ akɛ nyɛtsɔɔ nyɛbii lɛ Nyɔŋmɔ mla ni kɔɔ lá he lɛ. (2 Tim. 3:14, 15) Atsɔɔ enɛ mli faŋŋ yɛ Reasoning wolo lɛ baafa 70-74. Nyɛkɛ nyɛwekui lɛ akasea enɛ jogbaŋŋ. Nyɛhaa nyɛbii lɛ kɛ saneyitso ni ji “If Someone Says—” (Kɛ́ Mɔ ko Kɛɛ Akɛ—) ni yɔɔ baafa 74-76 lɛ afea nɔkwɛmɔnii atsɔa nyɛ, koni no aha amɛhe asa kɛtsɔɔ nɔ ni amɛheɔ amɛyeɔ kɛ nɔ hewɔ ni amɛheɔ amɛyeɔ lɛ mli. (1 Pet. 3:15) Saji krokomɛi ni ato he gbɛjianɔ ni akɛtsɔse wɔ yɛ lá sane lɛ he lɛ ekomɛi yɛ How Can Blood Save Your Life? wolo bibioo lɛ kɛ June 15 afi 2004 Buu-Mɔɔ lɛ baafa 14-24 lɛ mli. Kɛfata he lɛ, vidio srɔtoi ni ji Transfusion-Alternative Health Care—Meeting Patient Needs and Rights kɛ No Blood—Medicine Meets the Challenge, ní amrɔ nɛɛ eyɔɔ DVD ni hiɛ saneyitso akɛ Transfusion Alternatives—Documentary Series lɛ nɔ lɛ kɛ saji ni tsɔɔ mɔ yiŋ ni haa aleɔ nɔ hewɔ ni tsofa kɛ opireshɛn ni afeɔ ni akɛ lá tsuuu nii yɛ mli lɛ ji nɔ ni hi jogbaŋŋ ni jwɛŋmɔ hu yɔɔ mli lɛ haa. Ani okɛ oweku lɛ ekwɛ vidioi nɛɛ nyɛsɛɛ nɛɛ ni nyɛsusu he?
5 Ye obua obii lɛ koni ‘amɛyoo Nyɔŋmɔ suɔmɔnaa nii kpakpai ni sa ehiɛ ni hi kɛwula shi’ ni kɔɔ lá he lɛ. Kɛkɛ lɛ amɛbaanyɛ amɛkpɛ amɛyiŋ tamɔ mɛi ni edara, ni Yehowa baajɔɔ nakai yiŋkpɛi lɛ anɔ.—Rom. 12:2.