Vidio ko ni Tsɔɔ Tsofafeemɔ Mli Nifeemɔ ko ni He Hiaa Waa lɛ Mli

Mlalelɔi kɛ helatsamɔ he nitsulɔi miiya nɔ amɛmiigbala amɛjwɛŋmɔ kɛmiiya helatsɛmɛi ajamɔŋ hemɔkɛyelii kɛ hegbɛi ni helatsɛmɛi lɛ yɔɔ yɛ tsofafeemɔ mli lɛ anɔ. Enɛ eha aná tsofafeemɔi kɛ helatsamɔ mli hesaai heei ní Yehowa Odasefoi baanyɛ aná he sɛɛ. (Bɔf. 15:28, 29) Enɛ ji nɔ ni vidio ni ji Transfusion-Alternative Health Care—Meeting Patient Needs and Rights (Tsofafeemɔ ni Akɛyeɔ Lá ni Agbalaa Awoɔ Mɔ Mli lɛ Najiaŋ—Helatsɛ lɛ Hiamɔ Nii kɛ Hegbɛi ni Aaatsu He Nii) lɛ gbalaa jwɛŋmɔ kɛyaa nɔ. Kwɛmɔ vidio lɛ, ni no sɛɛ lɛ otĩ nibii ni okase lɛ amli.—Kadimɔ: Akɛni opireshɛnfeemɔ he mfonirii fioo komɛi yɛ vidio lɛ mli hewɔ lɛ, esa akɛ fɔlɔi kɛ hiɛshikamɔ atsu nii kɛji amɛkɛ gbekɛbii ni darako miikwɛ vidio lɛ.

(1) Mɛni hewɔ tsofafeemɔ he nitsulɔi komɛi esaa amɛmiikwɛ lá ni agbalaa awoɔ mɔ mli lɛ mli ekoŋŋ lɛ? (2) Tsĩi opireshɛn srɔtoi etɛ ni yɔɔ hwanyaŋŋ ni abaanyɛ afee ni akɛ lá ni agbalaa awoɔ mɔ mli tsuuu nii yɛ mli lɛ atã. (3) Yɛ je lɛŋ fɛɛ lɛ, datrɛfoi kɛ opireshɛnfeelɔi enyiɛ etsɔɔ akɛ amɛmiisumɔ ni amɛtsá helatsɛmɛi, ní amɛkɛ lá tsuuu nii? Mɛni hewɔ amɛsumɔɔ akɛ amɛfee nakai lɛ? (4) Mɛni niiamlipɛimɔ ni afee nyɛsɛɛ nɛɛ yɛ helatsamɔhei lɛ ejie lɛ kpo yɛ lá kɛ nitsumɔ he? (5) Mɛɛ tsofafeemɔŋ osharai yɔɔ lá ni agbalaa awoɔ mɔ mli lɛ he? (6) Mɛɛ sɛɛnamɔi datrɛfoi babaoo ni he esa lɛ etsɔɔ akɛ eyɔɔ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ he? (7) Mɛni haa mɔ lá nɔ gbɔ́ɔ? Nɛgbɛ ji he ni adesai agbɔmɔtso lɛ baanyɛ akpee naa kɛyashi? Mɛni abaanyɛ afee kɛtsu lá ni nɔ egbɔ lɛ he nii? (8) Mɛɛ gbɛ nɔ abaanyɛ atsɔ ni aha walayibii tsuji afalɛ ni yɔɔ helatsɛ ko gbɔmɔtso mli lɛ aya hiɛ? (9) Mɛɛ ŋaa gbɛ̀i akɛtsuɔ nii koni lá pii akaho kɛ́ aafee opireshɛn? (10) Ani abaanyɛ akɛ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ atsu gbekɛbii bibii loo mɛi ni eyɔɔ oshara akɛ abaafee amɛ opireshɛn lɛ ahe nii? (11) Mɛni ji helatsamɔ mli sui kpakpai ahe shishitoo mlai ni fe fɛɛ lɛ ateŋ ekome? (12) Mɛni hewɔ ehe hiaa ni Kristofoi atsɔ hiɛ amɛkpɛ amɛyiŋ yɛ tsofafeemɔ ni akɛ lá tsuuu nii yɛ mli lɛ he lɛ? Mɛɛ gbɛ nɔ wɔɔtsɔ wɔfee enɛ?

Mɔ fɛɛ mɔ baadamɔ ehenilee ni Biblia lɛ etsɔse lɛ lɛ nɔ ekpɛ eyiŋ yɛ tsofafeemɔ gbɛ̀i komɛi ni je kpo yɛ vidio lɛ mli lɛ ateŋ nɔ ni ebaakpɛlɛ nɔ lɛ he. Ani okpɛ oyiŋ yɛ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ mli nɔ ni obaasumɔ ni akɛtsu nii aha bo diɛŋtsɛ kɛ obii lɛ he? Esa akɛ oha owekumɛi ni jeee Odasefoi lɛ hu ale oyiŋ ni okpɛ lɛ kɛ yiŋtoi ahewɔ ni okpɛ oyiŋ nakai lɛ hu he sane fitsofitso.—Kwɛmɔ “Sanebimɔi ni Jɛ Kanelɔi Adɛŋ” ni yɔɔ June 15 afi 2004, kɛ October 15 afi 2000 Buu-Mɔɔ srɔtoi lɛ amli lɛ.