Ani Ootsi Ooto?

Mɛni atsiɔ atoɔ? Durable power of attorney (DPA) wolo lɛ ni akɛha Odasefoi ní abaptisi amɛ lɛ anɔ niŋmalamɔ. Akɛni ‘oleee wɔ sane’ hewɔ lɛ, ehe miihia ni okpɛ oyiŋ kɛtsɔ hiɛ, ní oŋmala helatsamɔ gbɛ̀i ni obaasumɔ ni akɛtsu nii aha bo kɛ́ oshara ba lɛ oshwie shi. (Yak. 4:14; Bɔf. 15:28, 29) Afee vidio ni ji Transfusion-Alternative Health Care—Meeting Patient Needs and Rights lɛ ni akɛye abua bo. Kwɛmɔ video lɛ, ni okɛ sɔlemɔ asusu sanebimɔi ni nyiɛ sɛɛ nɛɛ ahe kɛkwɛ nɔ ni okase.—Kadimɔ: Akɛni opireshɛnfeemɔ he mfonirii fioo komɛi yɛ vidio nɛɛ mli hewɔ lɛ, esa akɛ fɔlɔi kɛ hiɛshikamɔ atsu nii beni amɛkɛ gbekɛbii kwɛɔ vidio nɛɛ.

(1) Mɛni hewɔ tsofafeemɔ he nitsulɔi komɛi esaa amɛmiikwɛ lá ni agbalaa awoɔ mɔ mli lɛ mli ekoŋŋ lɛ? (2) Tsĩi opireshɛn srɔtoi etɛ ni yɔɔ hwanyaŋŋ ni anyɛ afee ni akɛ lá ni agbalaa awoɔ mɔ mli tsuuu nii yɛ mli lɛ atã. (3) Yɛ je lɛŋ fɛɛ lɛ, datrɛfoi kɛ opireshɛnfeelɔi enyiɛ etsɔɔ akɛ amɛmiisumɔ ni amɛtsá helatsɛmɛi ní amɛkɛ lá tsuuu nii? Mɛni hewɔ amɛsumɔɔ akɛ amɛfee nakai lɛ? (4) Mɛni niiamlipɛimɔ ni afee nyɛsɛɛ nɛɛ yɛ helatsamɔhei lɛ ejie lɛ kpo yɛ lá kɛ nitsumɔ he? (5) Mɛɛ tsofafeemɔŋ osharai yɔɔ lá ni agbalaa awoɔ mɔ mli lɛ he? (6) Mɛɛ sɛɛnamɔi datrɛfoi babaoo ni he esa lɛ etsɔɔ akɛ eyɔɔ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ he? (7) Mɛni haa mɔ lá nɔ gbɔɔ? Nɛgbɛ ji he ni adesa gbɔmɔtso lɛ baanyɛ akpee naa kɛyashi? Mɛni abaanyɛ afee kɛtsu lá ni nɔ egbɔ́ lɛ he nii? (8) Mɛɛ gbɛ nɔ abaanyɛ atsɔ ni aha walayibii tsuji afalɛ ni yɔɔ helatsɛ ko gbɔmɔtso mli lɛ aya hiɛ? (9) Mɛɛ ŋaa gbɛ̀i akɛtsuɔ nii koni lá pii akaho kɛ́ aafee opireshɛn? (10) Ani abaanyɛ akɛ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ atsu gbekɛbii bibii loo mɛi ni eyɔɔ oshara akɛ abaafee amɛ opireshɛn lɛ ahe nii? (11) Mɛni ji helatsamɔ mli sui kpakpai ahe shishitoo mlai ni fe fɛɛ lɛ ateŋ ekome? (12) Mɛni hewɔ ehe hiaa ni Kristofoi atsɔ hiɛ amɛkpɛ amɛyiŋ yɛ tsofafeemɔ ni akɛ lá tsuuu nii yɛ mli lɛ he lɛ? Mɛɛ gbɛ nɔ wɔɔtsɔ wɔfee enɛ?

Mɔ fɛɛ mɔ baadamɔ ehenilee ni Biblia lɛ etsɔse lɛ nɔ ekpɛ eyiŋ yɛ tsofafeemɔ gbɛ̀i komɛi ni je kpo yɛ vidio lɛ mli lɛ ateŋ nɔ ni ebaakpɛlɛ nɔ lɛ he. Ani okpɛ oyiŋ yɛ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ mli nɔ ni obaasumɔ ni akɛtsu nii aha bo diɛŋtsɛ kɛ obii lɛ he? Kɛha saji nɛɛ ahesusumɔ fitsofitso lɛ, kanemɔ “Nyɔŋmɔ Suɔmɔ” wolo lɛ yitso 7, kɛ woji krokomɛi ni atsɛ yisɛɛ yɛ nakai yitso lɛ mli lɛ. Agbɛnɛ hu kwɛmɔ sane ni ji “Te Mibuɔ Nibii ni Anáa Kɛjɛɔ Nibii Titrii Ejwɛ ni Feɔ Lá kɛ Helatsamɔ Nifeemɔi ni akɛ Mi Diɛŋtsɛ Milá Baatsu Nii yɛ Mli lɛ Mihaa Tɛŋŋ?” ni yɔɔ nɔ ni aŋma ahɔ December 2006 Wɔ Maŋtsɛyeli Sɔɔmɔ lɛ mli lɛ mli. Naagbee lɛ, bɔɔ mɔdɛŋ ni oŋmala nibii ni obaasumɔ lɛ owo o-DPA wolo lɛ nɔ jogbaŋŋ. Esa akɛ oha ogbɔmɔtsoŋ hewalɛnamɔ najiaŋdamɔlɔi kɛ owekumɛi ni amɛjeee Odasefoi lɛ ale oyiŋ ni okpɛ lɛ he sane fitsofitso.

[Akrabatsa ni yɔɔ baafa 3]

• Ani okpɛ oyiŋ yɛ tsofafeemɔ ni akɛyeɔ lá ni agbalaa awoɔ mɔ mli lɛ najiaŋ lɛ mli nɔ ni obaasumɔ ni akɛtsu nii aha bo diɛŋtsɛ kɛ obii lɛ he?

• Yɛ oshara ni baanyɛ aba trukaa lɛ hewɔ lɛ, ani ohiɛɔ o-DPA wolo ni oŋmala nɔ nii lɛ yɛ ohe be fɛɛ be?