Okɛ Nibii ni Anaa Atsu Nii ní Okɛtsɔɔ Nii
1. Yehowa kɛ nibii ni anaa tsu nii ni ekɛtsɔɔ eblema tsuji lɛ anii yɛ mɛɛ gbɛ nɔ, ni mɛni jɛ mli kɛba?
1 Yehowa kɛ ninaai kɛ lamɔi tsu nii yɛ bei komɛi amli koni ekɛ saji ni he hiaa aha eblema tsuji lɛ. Susumɔ Ezekiel ninaa ni kɔɔ Yehowa ŋwɛi shwiili lɛ he lɛ he okwɛ. (Ezek. 1:1-28) Susumɔ bɔ ni Daniel nu he eha beni akɛ gbalɛ ni tsɔɔ bɔ ni jeŋ hewalɛi lɛ eko baanyiɛ eko sɛɛ kɛba lɛ ha lɛ yɛ lamɔ mli lɛ hu he okwɛ. (Dan. 7:1-15, 28) Ni kpojiemɔi ni taa mɔ tsuiŋ ni kɔɔ nibii ni baaya nɔ yɛ “Nuŋtsɔ lɛ gbi lɛ” nɔ lɛ ahe ní ‘akɛbatsɔɔ’ bɔfo Yohane lɛ hu? (Kpoj. 1:1, 10) Yehowa tsɔ nii ni anaa diɛŋtsɛ yɛ faŋŋ mli kɛ nifeemɔ ni yɔɔ hewalɛ nɔ etsɔɔ amɛ nii, ni enɛ haaa amɛhiɛ akpa nii ni etsɔɔ amɛ lɛ nɔ kɔkɔɔkɔ.
2. Mɛɛ nibii ni anaa wɔbaanyɛ wɔkɛtsu nii kɛtsɔɔ mɛi krokomɛi Biblia mli anɔkwalei lɛ?
2 Kɛji akɛ wɔmiisumɔ ni wɔtsɔɔ mɛi krokomɛi Biblia mli anɔkwalei lɛ ní amɛhiɛ akakpa nɔ oya nɔŋŋ lɛ, no lɛ wɔ hu wɔbaanyɛ wɔkɛ wɔvidioi srɔtoi lɛ atsu nii ní wɔkɛtsɔɔ amɛ nii. Wɔvidioi lɛ wieɔ saji srɔtoi babaoo he, ni amɛhaa anáa hekɛnɔfɔɔ yɛ Biblia lɛ kɛ Yehowa asafo lɛ mli, ni agbɛnɛ hu amɛhaa anáa shishitoo mlai ni haa ayaa hiɛ yɛ Kristofoi ashihilɛ mli. Susumɔi gbɛ̀i komɛi ni wɔbaanyɛ wɔtsɔ nɔ wɔkɛ wɔvidioi srɔtoi lɛ atsɔɔ nii lɛ he okwɛ. Nɔ ni nyiɛ sɛɛ nɛɛ ji vidioi srɔtoi lɛ ekomɛi ni wɔbaanyɛ wɔkɛtsu nii.
3. Mɛni obaanyɛ okɛtsu nii ni okɛgbala Biblia mli nikaselɔ ko jwɛŋmɔ kɛba asafo lɛ nɔ?
3 Yɛ Shiɛmɔ Nitsumɔ lɛ Mli: Ani ogbaa Biblia mli nikaselɔ ko wɔjeŋ muu fɛɛ Kristofoi anyɛmimɛi akuu lɛ he sane? Jiemɔ vidio ni ji Our Whole Association of Brothers lɛ otsɔɔ lɛ, ní okɛha ena wɔjeŋ muu fɛɛ Kristofoi anyɛmimɛi akuu lɛ. Okɛ vidio lɛ ama lɛ koni eyakwɛ dani nyɛfee nyɛnikasemɔ ni baanyiɛ sɛɛ lɛ, loo okɛ lɛ fɛɛ afee ekome kɛkwɛ beni nyɛbaafee nikasemɔ ni baanyiɛ sɛɛ lɛ. No sɛɛ lɛ nyɛsusua sanebimɔi ni akɛtĩɔ mli ni yɔɔ June 2002 Wɔ Maŋtsɛyeli Sɔɔmɔ lɛ mli lɛ he.
4. Mɛɛ nitsɔɔmɔ dɛŋdadei oblahii kɛ oblayei ni ji Odasefoi lɛ baanyɛ amɛkɛtsu nii yɛ skul?
4 Oblahii kɛ oblayei, nyɛbaanyɛ nyɛkɛ nyɛtsɔɔlɔ lɛ asusu he akɛ nyɛbaasumɔ ni nyɛjie vidio ni ji Jehovah’s Witnesses Stand Firm Against Nazi Assault loo Faithful Under Trials—Jehovah’s Witnesses in the Soviet Union lɛ nyɛtsɔɔ nyɛklasbii lɛ. Nyɛkɛa tsɔɔlɔ lɛ akɛ nyɛbaasumɔ ni nyɛto sanebimɔi ahe gbɛjianɔ ni nyɛkɛ nyɛklasbii lɛ asusu he, ni nyɛkɛ sanebimɔi ni yɔɔ June 2001 loo February 2003 Wɔ Maŋtsɛyeli Sɔɔmɔ lɛ mli ní baasa kɛha nyɛklasbii lɛ atsua nii.
5. Mɛni fɔlɔi baanyɛ amɛkɛtsu nii yɛ amɛweku nikasemɔi lɛ amli?
5 Weku lɛ Mli Bii kɛ Nanemɛi: Fɔlɔi, aaafee bei enyiɛ nɛ ní nyɛkɛ nyɛbii lɛ kwɛ vidio ni ji Young People Ask—How Can I Make Real Friends? lɛ kɛjɛ beni ajie lɛ kpo nɛɛ? Mɛni hewɔ nyɛkwɛɛɛ shikome ekoŋŋ yɛ nyɛweku nikasemɔ ni baanyiɛ sɛɛ lɛ mli? Akɛ sanebimɔi ni baanyɛ aha sanegbaa afee nɔ ni yɔɔ miishɛɛ waa lɛ eha yɛ April 2002 Wɔ Maŋtsɛyeli Sɔɔmɔ lɛ mli.
6. Mɛɛ gbɛ nɔ obaanyɛ otsɔ oto bei ni woɔ mɔ hewalɛ he gbɛjianɔ oha okɛ onanemɛi lɛ?
6 Ani oyɛ nanemɛi yɛ asafo lɛ mli ní obaasumɔ ni ofɔ̃ amɛ nine kɛba oshĩa? Ekome ni nyɛaafee kɛkwɛ vidio ni ji Respect Jehovah’s Authority lɛ gbɛkɛ ko lɛ baawo nyɛ hewalɛ, titri lɛ kɛji nyɛkɛ sanebimɔi ni yɔɔ September 2004 Wɔ Maŋtsɛyeli Sɔɔmɔ lɛ mli lɛ tsu nii kɛgba nibii ni nyɛkase kɛjɛ vidio lɛ mli lɛ ahe sane lɛ.
7. Mɛɛ hegbɛi krokomɛi yɔɔ ni obaanyɛ otsɔ nɔ okɛ wɔvidioi lɛ atsu nii?
7 Hegbɛi Krokomɛi: Mɛɛ gbɛ̀i krokomɛi obaanyɛ otsɔ nɔ okɛ wɔvidioi srɔtoi 20 lɛ atsu nii? Ani amɛteŋ ekome loo enyɔ ni ooojie otsɔɔ mɔ ko ni okuɔ osɛɛ oyasaraa lɛ yɛ shiɛmɔ nitsumɔ lɛ mli daa lɛ baaye abua lɛ ni eya ehiɛ yɛ mumɔŋ? Ani obaanyɛ oto gbɛjianɔ ni oyajie vidioi srɔtoi lɛ yɛ nitsumɔhe ko loo yɛ he ko ni akwɛɔ mɛi ni egbɔlɔ yɛ jɛmɛ lɛ? Ani vidioi srɔtoi lɛ baanyɛ aye abua owekumɛi, okutsoŋbii, kɛ onanemɛi ni jeee Odasefoi ji amɛ lɛ ní amɛná wɔhe jwɛŋmɔ ni ja? Wɔvidioi srɔtoi lɛ ji nibii ni anaa ní náa mɛi anɔ hewalɛ, ní tsɔɔ mɛi anii jogbaŋŋ diɛŋtsɛ. Okɛtsu nii ni okɛtsɔɔ mɛi anii.