Hewalɛ ni Vidioi ni Yeɔ Odase lɛ Náa yɛ Mɛi Anɔ
1 “Wɔbinuu lɛ bɔi vidio lɛ kwɛmɔ dani enyiɛ. Ekwɛɔ lɛ shii abɔ. Kwɛ miishɛɛ sane ni eji akɛ wɔɔná dɛŋdadei ni haa wɔbii lɛ náa suɔmɔ kɛha Yehowa yɛ amɛmli!” Mɛɛ vidio fɔlɔ ni ji Kristofonyo nɛɛ tsɔɔ lɛ? Nɔ ni gbɛi ji Noah—He Walked With God (Noa—Ekɛ Nyɔŋmɔ Nyiɛ) lɛ ni. Nyɛ ko ni ejeee Odasefonyo ni ebinuu ena Noah vidio lɛ yɛ mɔ ko shia lɛ kɛ shika ni shɛɔ dɔlai 90 (₵630,000) maje nitsumɔhe nine lɛ, ni ebi kɛji wɔyɛ vidioi krokomɛi kɛha gbekɛbii. Vidioi ni Yehowa gbɛjianɔtoo lɛ fee lɛ miiná gbekɛbii kɛ onukpai fɛɛ nɔ hewalɛ waa.
2 Yɛ Weku lɛ Mli: Beni Odasefoi aweku ko kwɛ vidio ni ji Jehovah’s Witnesses Stand Firm Against Nazi Assault, (Yehowa Odasefoi Damɔ Shi Shiŋŋ Amɛshi Nazi Tutuamɔ) lɛ, nyɛ lɛ gba akɛ: “Mikɛ gbi muu fɛɛ esusu bɔ ni Yehowa ha gbɔmɛi foji kɛkɛ nyɛ amɛŋmɛ amɛtsui shi yɛ nibii ni ekaaa mli lɛ he! Enɛ hesusumɔ kaiɔ mi bɔ ni mi diɛŋtsɛ minaagbai jeee nɔ ko kwraa kɛji akɛto he lɛ. Vidio lɛ ni wɔkɛ wɔbii lɛ kwɛ lɛ eye ebua amɛ koni amɛna bɔ ni ehe hiaa ni akɛ he afɔ Yehowa nɔ lɛ faŋŋ. Yɛ bɔ ni wɔkɛ amɛ susu he yɛ sɛɛ mli lɛ hewɔ lɛ, wɔye wɔbua wɔbiyei lɛ koni amɛfee mɛi ni awula amɛ jogbaŋŋ koni amɛdamɔ nɔnyɛɛi kɛ yiwaai fɛɛ ni amɛkɛaakpe lɛ naa.”
3 Yɛ Skul: Ákɛ amaniɛbɔɔ ko fã lɛ, Odasefonyo ko ni eye kɛjɛ afii nyɔŋma kɛ etɛ kɛyaa lɛ jie Stand Firm (Damɔ Shi Shiŋŋ) vidio lɛ etsɔɔ eklasbii lɛ. Tsɔɔlɔ lɛ etsɔ hiɛ ewie akɛ esumɔɔɔ Odasefoi lɛ asane. Beni ekwɛ vidio lɛ sɛɛ lɛ, ewie akɛ: “Enɛ etsake bɔ ni misusuɔ Yehowa Odasefoi ahe mihaa lɛ kwraa. Miiwo shi akɛ kɛ́ amɛba mishia lɛ, mabo amɛ toi, ni mikɛ amɛ baaje Biblia lɛ kasemɔ shishi!” Mɛni tsake jwɛŋmɔ ni ehiɛ yɛ wɔhe lɛ? Ekɛɛ akɛ ejɛ wɔ “anɔkwa suɔmɔ kɛ anɔkwayeli” lɛ hewɔ.
4 Yɛ Shiɛmɔ Nitsumɔ lɛ Mli: Nyɛmi yoo ko kɛ yoo ko ni shashao shi akɛ eeehe wolo lɛ kpe, eyɛ mli akɛ eyɛ sanebimɔi ni kɔɔ wɔ kɛ wɔhemɔkɛyelii lɛ ahe moŋ. Nyɛmi yoo lɛ kɛ vidio ni ji Jehovah’s Witnesses—The Organization Behind the Name (Yehowa Odasefoi—Gbɛjianɔtoo ni Yɔɔ Gbɛi lɛ Sɛɛ) lɛ tee eŋɔɔ ni eyajie etsɔɔ yoo lɛ kɛ ewu lɛ. Mɛi enyɔ lɛ fɛɛ ná he miishɛɛ waa ni amɛkpɛlɛ nɔ akɛ amɛbaakase Biblia lɛ. Yɛ odase ni mɔɔ shi jogbaŋŋ ni aye amɛ lɛ hewɔ lɛ, amɛje shishi akɛ amɛaatsake amɛshihilɛ ni ekɛ Nyɔŋmɔ suɔmɔnaa nifeemɔ akpã gbee. Ani okɛ wɔ vidioi lɛ miitsu nii jogbaŋŋ kɛmiimɔ shi?