Fó Mɛi Krokomɛi Anɔ̃ Mli—Kɛtsɔ Hiɛ ni Akwɛɔ Jogbaŋŋ lɛ Nɔ
1 Kɛ́ wɔmiiye odase yɛ hei ni mɛi pii yɔɔ kɛ agbɛnɛ hu yɛ shĩa kɛ shĩa lɛ, bei pii lɛ wɔkwɛɔ mɛi lɛ ahiɛ dani wɔjeɔ wɔwiemɔ lɛ shishi. Ekolɛ wɔbaanyɛ wɔyɔse bɔ ni amɛnuɔ amɛŋɔɔ ni wɔba lɛ he amɛhaa kɛ shihilɛ mli ni amɛyɔɔ lɛ po kɛtsɔ amɛhiɛ su nɔ yɛ nakai be kuku ni wɔkɛkwɛɔ amɛhiɛ lɛ mli. Nakai nɔŋŋ amɛ hu amɛbaanyɛ amɛyɔse nibii babaoo yɛ wɔhe. Yoo ko wie saramɔ ni Odasefonyo ko basara lɛ lɛ he akɛ: “Nɔ ni mikaiɔ yɛ ehiɛ ŋmɔlɔŋmɔlɔ su lɛ he ji toiŋjɔlɛ ni eyɔɔ. Enɛ tée mimiishɛɛ shi.” Enɛ ha yoo lɛ bo sanekpakpa lɛ toi.
2 Mɛi krokomɛi ahiɛ ni aaakwɛ lɛ ji gbɛ ni hi jogbaŋŋ ni aaatsɔ nɔ aje odaseyeli shishi yɛ gbɛjegbɛ nɔ odaseyeli mli loo yɛ be mli ni ayeɔ odase yɛ hei ni mɛi pii yɔɔ lɛ. Nyɛmi nuu ko kwɛɔ mɛi ni bɛŋkɛɔ lɛ lɛ ahiɛ tɛ̃ɛ. Kɛ ekwɛ amɛhiɛ lɛ, efeɔ ehiɛ ŋmɔlɔŋmɔlɔ, ni no sɛɛ lɛ ekɛ woji tɛtrɛbii lɛ haa. Akɛni ekɛ gbɛ ni tamɔ nɛkɛ tsuɔ nii hewɔ lɛ, ekɛ mɛi babaoo gbaa sane kɛ miishɛɛ ni ehaa woji babaoo.
3 Yɔsemɔ Bɔ ni Mɛi Krokomɛi Nuɔ Nii Ahe Amɛhaa: Kɛ́ wɔtee nɔ wɔkwɛ mɛi ahiɛ lɛ, ebaaye ebua wɔ koni wɔyɔse bɔ ni amɛnuɔ nii ahe amɛhaa. Ákɛ nɔkwɛmɔnɔ lɛ, kɛ́ ewa kɛha mɔ ko akɛ eeenu wɔ shishi loo ekɛ nɔ ko ni wɔwie lɛ kpãaa gbee lɛ, bei pii lɛ enɛ jeɔ kpo yɛ bɔ ni efeɔ ehiɛ ehaa lɛ mli. Kɛ́ ebɛ dekã loo eená wɔhe mlifu lɛ, wɔbaayɔse enɛ kɛ́ wɔkwɛ bɔ ni ehiɛ su yɔɔ ha. Kɛkɛ lɛ, wɔbaanyɛ wɔdamɔ enɛ nɔ wɔtsake wɔshiɛmɔ wiemɔ lɛ mli loo wɔfo lɛ kuku. Le ni wɔɔle bɔ ni mɛi krokomɛi nuɔ nii ahe amɛhaa lɛ ji gbɛ kpakpa ni wɔɔtsɔ nɔ wɔtsɔɔ akɛ wɔfóɔ amɛnɔ̃ mli.
4 Anɔkwayeli kɛ Shiŋŋfeemɔ: Yɛ hei babaoo lɛ, abuɔ mɔ hiɛ ni akwɛɔ lɛ akɛ eji odaseyeli ni tsɔɔ akɛ nɔ ni mɔ lɛ wieɔ lɛ ji anɔkwale. Beni Yesu kaselɔi lɛ bi lɛ akɛ: “Belɛ namɔ yiwala aaanyɛ ahere mɔ?” lɛ, kadimɔ bɔ ni ehere nɔ eha lɛ. Biblia lɛ bɔɔ amaniɛ akɛ: “Beni Yesu kwɛɔ amɛhiɛ lɛ, ekɛɛ amɛ akɛ: ‘Gbɔmɛi agbɛfaŋ lɛ anyɛŋ enɛ afee, shi Nyɔŋmɔ gbɛfaŋ lɛ abaanyɛ nii fɛɛ afee.’” (Mat. 19:25, 26, NW) Ŋwanejee ko kwraa bɛ he akɛ shiŋŋfeemɔ ni je kpo yɛ Yesu hiɛ lɛ, ha ana akɛ nɔ ni ewieɔ lɛ ji anɔkwale. Nakai nɔŋŋ hu mɛi ahiɛ ni wɔɔkwɛ jogbaŋŋ lɛ baaye ebua wɔ koni wɔkɛ Maŋtsɛyeli shɛɛ sane lɛ aha yɛ anɔkwayeli kɛ shiŋŋfeemɔ mli.—2 Kor. 2:17; 1 Tes. 1:5.