Ta Ni Abaafã Yɛ Jeŋ Fɛɛ Kɛtswa “Kpɔ̃mɔ Ebɛŋkɛ!” Kpokpaa Wulu Nɔ Kpee Lɛ He Adafi
Asafoŋ Shiɛlɔi Fɛɛ Baaja Kpee lɛ He Adafitswaa Dɛhiɛmɔ Wolo Krɛdɛɛ Ko
1 Abɔi dɛhiɛmɔ wolo krɛdɛɛ ni akɛmiitswa kpokpaa wulu nɔ kpeei ni abaafee yɛ maji aaafee 155 anɔ lɛ ahe adafi lɛ jaa. Aje dɛhiɛmɔ wolo ni abaaja yɛ jeŋ fɛɛ lɛ he tafãa lɛ shishi yɛ maji ni yɔɔ Je lɛ Kooyigbɛ lɛ amli yɛ March afi 2006 mli, ni tafãa nɛɛ baaya nɔ kɛyashi abaafee kpeei lɛ fɛɛ agbe naa yɛ jeŋ fɛɛ.
2 Akɛni bei fioo ni eshwɛ yɛ naagbee gbii lɛ amli lɛ mli wɔyɔɔ lɛ hewɔ lɛ, esa akɛ mɛi ni ajie ato wala lɛ aná kpokpaa wulu nɔ kpeei ni wieɔ kpɔ̃mɔ kɛmiijɛ yiwalɛ je nɛɛ mli lɛ he shiwoo ni Nyɔŋmɔ kɛha lɛ ahe miishɛɛ jogbaŋŋ. Esa akɛ saji ni abaawie he lɛ akanya amɛ ni amɛsusu nibii ni baa lɛ ahe. Bɔni afee ni mɛi akpekpei abɔ anu hiɛnɔkamɔ kɛ miishɛjemɔ shɛɛ sane lɛ, aawo Yehowa Odasefoi asafoi ni fa fe 98,000 lɛ amlibii lɛ hewalɛ koni amɛkɛ ekãa atswa kpokpaa wulu nɔ kpee ni amɛbaaya lɛ he adafi.
3 Abaamaje asafo fɛɛ asafo kpee lɛ he adafitswaa dɛhiɛmɔ wolo lɛ saŋŋ bɔ ni shiɛlɔ fɛɛ shiɛlɔ baaná ekomekomei 50. Kɛ́ eko shwɛ lɛ, abaanyɛ akɛfata gbɛgbalɔi lɛ anɔ̃ lɛ he aha amɛ koni amɛja. Asafo fɛɛ asafo baaje etafãa lɛ shishi kɛ́ eshwɛ otsii etɛ ni amɛbaaya amɛkpee lɛ. Enɛ baaha asafo fɛɛ asafo aná be ni fa kɛtsu eshikpɔŋkuku lɛ mli nii jogbaŋŋ. Esa akɛ asafoi ni tsuɔ shikpɔŋkuku kome mli nii lɛ amli shiɛmɔ nitsumɔ nɔkwɛlɔi lɛ afee ekome bɔni afee ni anyɛ atsu shikpɔŋkuku lɛ mli jogbaŋŋ yɛ gbɛjianɔtoo naa.
4 Aawo wɔ fɛɛ hewalɛ koni kɛ́ ebaahi lɛ, wɔha shiatsɛ fɛɛ shiatsɛ nine ashɛ dɛhiɛmɔ wolo lɛ eko nɔ. Kɛlɛ, kɛ́ wɔyanaaa amɛteŋ mɛi komɛi yɛ shĩa lɛ, wɔbaanyɛ wɔkɛ hiɛshikamɔ ashĩ eko wɔwo amɛshinaai ashishi. Esa akɛ wɔmia wɔhiɛ waa koni wɔja dɛhiɛmɔ woji lɛ fɛɛ yɛ otsii etɛ lɛ mli.
5 Wɔheɔ wɔyeɔ akɛ wɔbaaye mɛi babaoo odase kɛtsɔ ekãa ni wɔkɛbaatswa “Kpɔ̃mɔ Ebɛŋkɛ!” Kpokpaa Wulu Kpee lɛ he adafi taakɛ wɔsusu he lɛ. Wɔsɔlemɔ ji akɛ, Yehowa baaha mɔdɛŋbɔɔ ni nyɛteŋ mɔ fɛɛ mɔ kɛbaawo tafãa ni miiya nɔ yɛ jeŋ fɛɛ nɛɛ mli lɛ awo yibii.