Kasemɔ Yehowa ‘Wɔmiishɛɛ Nyɔŋmɔ’ Lɛ
1 Yehowa miisumɔ koni mɛi aná miishɛɛ lɛɛlɛŋ. E-Wiemɔ lɛ haa wɔkwɛɔ jɔɔmɔi ni yɔɔ miishɛɛ ni esaa eto adesai aweku lɛ gbɛ. (Yes. 65:21-25) Esa akɛ mɛi ana akɛ “miishɛɛ Nyɔŋmɔ lɛ anunyam sanekpakpa” ni wɔshiɛɔ wɔtsɔɔ amɛ lɛ haa wɔmii shɛɔ wɔhe. (1 Tim. 1:11, NW) Esa akɛ suɔmɔ ni wɔyɔɔ kɛha anɔkwale lɛ kɛ miishɛɛ diɛŋtsɛ ni wɔyɔɔ yɛ mɛi ni wɔshiɛɔ wɔtsɔɔ amɛ lɛ ahe lɛ aje kpo yɛ gbɛ ni wɔtsɔɔ nɔ wɔkɛ Maŋtsɛyeli lɛ he sanekpakpa lɛ haa amɛ lɛ mli.—Rom. 1:14-16.
2 Eji anɔkwale akɛ, bei komɛi lɛ ewa akɛ wɔɔya nɔ wɔtsu shiɛmɔ nitsumɔ lɛ kɛ miishɛɛ. Yɛ shikpɔŋkukuji komɛi amli lɛ, mɛi fioo pɛ boɔ Maŋtsɛyeli shɛɛ sane lɛ toi. Bei komɛi shɛɔ ni wɔkɛ shihilɛi ni mli wawai kpeɔ yɛ wɔshihilɛ mli. Kɛ́ wɔbaanyɛ wɔya nɔ wɔshiɛ kɛ miishɛɛ lɛ, no lɛ esa akɛ wɔsusu bɔ ni ehe hiaa akɛ mɛi ni yɔɔ wɔshikpɔŋkuku lɛ mli lɛ anu Maŋtsɛyeli lɛ he sanekpakpa lɛ ni wɔshiɛɔ lɛ, ni amɛnu shishi hu lɛ he. (Rom. 10:13, 14, 17) Enɛ nɔjwɛŋmɔ baaye abua wɔ koni wɔya nɔ wɔkɛ miishɛɛ ajaje yiwalaheremɔ he gbɛjianɔ ni Yehowa ejɛ mɔbɔnalɛ mli eto lɛ wɔtsɔɔ mɛi.
3 Wiemɔ Nibii Kpakpai lɛ Ahe Titri: Esa akɛ wɔsusu nɔ ni wɔkɛɔ lɛ hu he. Eyɛ mli akɛ ekolɛ wɔkɛ naagba loo adafitswaa ko ni mɛi miisusu he baaje wɔsanegbaa lɛ shishi moŋ, shi esaaa akɛ wɔgbalaa jwɛŋmɔ kɛyaa nibii ni ehiii lɛ anɔ bɔ ni esaaa. Wɔnitsumɔ ji wɔkɛ “sanekpakpa” ayaha mɛi. (Yes. 52:7; Rom. 10:15) Sanekpakpa nɛɛ kɔɔ shihilɛ kpakpa ni Nyɔŋmɔ ewo shi akɛ ekɛbaaba lɛ he. (2 Pet. 3:13) Akɛni enɛ yɔɔ ojwɛŋmɔ mli hewɔ lɛ, okɛ Ŋmalɛi lɛ atsu nii ‘kɛtsá mɛi ni tsui ekumɔ lɛ.’ (Yes. 61:1, 2) Enɛ feemɔ baaye abua wɔteŋ mɔ fɛɛ mɔ koni eya nɔ ekɛ miishɛɛ ashiɛ ni ehiɛ jwɛŋmɔ kpakpa.
4 Kɛ́ ebalɛ nakai lɛ, no lɛ ekã shi faŋŋ akɛ kɛ́ wɔmiishiɛ lɛ, mɛi baana akɛ wɔyɛ miishɛɛ. Belɛ, nyɛhaa wɔjiea Yehowa ni ji ‘wɔmiishɛɛ Nyɔŋmɔ’ lɛ su lɛ eko kpo yɛ be mli ni wɔshiɛɔ Maŋtsɛyeli lɛ he sanekpakpa lɛ wɔtsɔɔ mɛi ni yɔɔ wɔshikpɔŋkuku lɛ mli lɛ.