Awake! Wolo Krɛdɛɛ ko ní Akɛbaaha yɛ September
1 Mɛi kpotoo náa loofɔji alalai ahe miishɛɛ, ni hulushinyɔɔ hu feɔ amɛ fɛo. Kɛlɛ, mɛi babaoo ekpɛlɛɛɛ nɔ akɛ suɔmɔ Tsɛ ko ni yɔɔ ŋwɛi ni bɔ nibii nɛɛ fɛɛ. Wɔbaaná hegbɛ wɔye Yehowa he odase akɛ lɛ ji Bɔlɔ kɛtsɔ Awake! wolo krɛdɛɛ ko ni wɔbaaja lɛ nɔ. (Yes. 40:28; 43:10) Awake! ni baaje kpo yɛ September lɛ baawie saneyitso titri ni ji “Is There a Creator?” (Ani Bɔlɔ ko Yɛ?) lɛ he.
2 Yɛ Shikpɔŋkuku lɛ Mli: Kɛ́ ebaahi lɛ, too gbɛjianɔ koni daa Hɔɔ lɛ, okɛ asafo lɛ afee ekome yɛ shĩa kɛ shĩa shiɛmɔ nitsumɔ lɛ mli. Kɛlɛ, obaanyɛ okɛ wolo krɛdɛɛ lɛ aha be fɛɛ be yɛ otsi lɛ mli. Mɛi tamɔ tsɔɔlɔi kɛ mɛi fɛɛ ni nitsumɔ kɔɔ wolokasemɔ he lɛ baaná Awake! wolo krɛdɛɛ nɛɛ he miishɛɛ jogbaŋŋ. No hewɔ lɛ, nyɛbaanyɛ nyɛto gbɛjianɔ krɛdɛɛ koni nyɛha mɛi ni tamɔ nakai ni yɔɔ nyɛshikpɔŋkuku lɛ mli lɛ anine ashɛ wolo lɛ eko nɔ.
3 Kɛ́ mɔ ko jie miishɛɛ kpo lɛ, no lɛ shi sanebimɔ ko oha lɛ akɛ kɛ́ oku osɛɛ oba eŋɔɔ ekoŋŋ lɛ, obaaha hetoo. Ákɛ nɔkwɛmɔnɔ lɛ, obaanyɛ obi lɛ nɔ̃ hewɔ ni Bɔlɔ ni yɔɔ suɔmɔ lɛ eŋmɛ gbɛ ni amanehulu efa babaoo nakai lɛ. Kɛkɛ lɛ, kɛ́ otee eŋɔɔ ekoŋŋ lɛ, obaanyɛ okɛ lɛ asusu Biblia Tsɔɔ wolo lɛ yitso 1 loo yitso 11 lɛ he. Kɛ́ oosumɔ hu lɛ, obaanyɛ obi lɛ yiŋtoo ni Bɔlɔ lɛ kɛbɔ shikpɔŋ lɛ, koni kɛ́ otee eŋɔɔ ekoŋŋ lɛ okɛ lɛ asusu wolo lɛ yitso 3 lɛ he.
4 Yɛ Skul: Kɛ́ oyaa skul lɛ, mɛni hewɔ otooo gbɛjianɔ koni okɛ Awake! wolo krɛdɛɛ lɛ ekomɛi ayake otsɔɔlɔi kɛ onanemɛi skulbii lɛ? Ekolɛ, eko ní okɛaafɔ̃ okpɔlɔ lɛ nɔ yɛ skul ní mɛi baana lɛ baaha amɛbibii bo saji yɛ ohemɔkɛyeli lɛ he. Ekolɛ, obaaná hegbɛ okɛ emli saji lɛ atsu nii kɛfã ohemɔkɛyeli lɛ he kɛ́ nyɛmiisusu saji ahe yɛ klas, ni ebaanyɛ eye ebua hu kɛ́ aha bo skul nifeemɔ ákɛ oŋma nɔ ko yɛ saneyitso pɔtɛɛ ko he. “Young People Ask” ni baaje kpo yɛ Awake! krɛdɛɛ lɛ mli lɛ saneyitso ji “How Can I Defend My Belief in Creation?” (Te Mafee Tɛŋŋ Mafã Hemɔkɛyeli ni Miyɔɔ yɛ Adebɔɔ Mli lɛ He?), ni aje gbɛ ato he gbɛjianɔ koni eye ebua bo.
5 Esa akɛ nibii ni Yehowa ebɔ lɛ aha akɛ woo kɛ anunyam aha lɛ. (Kpoj. 4:11) Kɛtsɔ ekãa ni wɔkɛaaja September Awake! lɛ nɔ lɛ, wɔbaanyɛ wɔkɛ woo aha wɔ-Bɔlɔ lɛ ni wɔye wɔbua mɛi krokomɛi hu koni amɛfee nakai.