Awake! Wolo Krɛdɛɛ ní Akɛbaaha yɛ November Mli!
1 Mɛi babaoo biɔ saji yɛ sɛɛnamɔ ni yɔɔ Biblia lɛ he lɛ he. Kɛ́ gbɔmɛi ni ŋma lɛ, te fee tɛŋŋ ni atsɛɔ lɛ Nyɔŋmɔ Wiemɔ lɛ? Mɛni hewɔ esa akɛ mikɛ mihe afɔ̃ Biblia lɛ nɔ koni ekudɔ minaji faamɔi lɛ? Kɛ́ mikɛ mibe kɛ mihewalɛ kane Biblia lɛ ni mikase hu lɛ, mɛɛ sɛɛ maná? Mɛɛ Biblia shishitsɔɔmɔ esa akɛ mikɛtsu nii? Enɛɛmɛi ji sanebimɔi ní aha hetoo yɛ November Awake! wolo krɛdɛɛ ni yitso ji “Can You Trust the Bible?” (Ani Obaanyɛ Ohe Biblia lɛ Oye?) lɛ mli lɛ ekomɛi.
2 Wɔbaasumɔ ni wɔja Awake! wolo krɛdɛɛ nɛɛ babaoo yɛ wɔshikpɔŋkuku lɛ mli. Kɛ́ ebaahi lɛ, okɛ asafo lɛ afee ekome yɛ shĩa kɛ shĩa shiɛmɔ nitsumɔ lɛ mli daa Hɔɔ yɛ November mli. Okɛ Awake! wolo tɛtrɛɛ nɛɛ aha owekumɛi, okutsoŋbii, onanemɛi nitsulɔi, otsɔɔlɔi, onanemɛi skulbii, kɛ mɛi ní okuɔ osɛɛ oyasaraa amɛ lɛ. Hiɛmɔ eko beni otee nihemɔ kɛ beni ofaa gbɛ. Onukpai lɛ eshɛ bɔ ni fa kɛha asafo lɛ jaa.
3 Jee Biblia Mli Nikasemɔ Shishi: Kɛ́ okɛ wolo tɛtrɛɛ nɛɛ ha mɔ ko lɛ, obaanyɛ oto gbɛjianɔ kɛha Biblia mli nikasemɔ dani omu sanegbaa lɛ naa. Ákɛ nɔkwɛmɔnɔ lɛ, obaanyɛ okɛɛ akɛ, “Be kroko lɛ, masumɔ ni matsɔɔ bo hetoo ni Biblia lɛ kɛhaa yɛ sanebimɔ ni ji, ‘Mɛni ji Nyɔŋmɔ yiŋtoo kɛha shikpɔŋ lɛ?’ he.” No sɛɛ lɛ, okɛ Biblia lɛ Tsɔɔ wolo lɛ aya, ni okɛ baafa 4-5 lɛ atsɔɔ shiatsɛ lɛ, aloo okɛ lɛ asusu yitso 3 kuku 1-3 lɛ he. Obaanyɛ okɛɛ hu akɛ, “Be kroko lɛ, masumɔ ni wɔsusu Biblia gbalɛ ko ni miina emlibaa ŋmɛnɛ lɛ he.” Kɛ́ oku osɛɛ otee lɛ, gbelemɔ yitso 9 ni yɔɔ wolo lɛ mli lɛ ní okɛ lɛ asusu kuku 1-3 lɛ he. Aloo obaanyɛ okɛɛ shiatsɛ lɛ akɛ: “Ewa kɛha mɛi babaoo akɛ amɛaanu nɔ ni amɛkaneɔ yɛ Biblia lɛ mli lɛ shishi. Be kroko lɛ, masumɔ ni matsɔɔ bo bɔ ni ooofee onu Biblia lɛ shishi jogbaŋŋ.” Kɛ́ oku osɛɛ otee lɛ, okɛ Biblia lɛ Tsɔɔ wolo lɛ aha lɛ, ní ofee nikasemɔ lɛ he nɔkwɛmɔnɔ otsɔɔ lɛ.
4 Biblia lɛ mli pɛ abaana “ŋmalɛi krɔŋkrɔŋi” ni baanyɛ aha wɔle nii “kɛya yiwalaheremɔ mli” yɛ. (2 Tim. 3:15) No hewɔ lɛ, esa akɛ wɔteŋ mɔ fɛɛ mɔ kɛ ekãa aja nɛkɛ Awake! wolo krɛdɛɛ nɛɛ eko, bɔni afee ni eha mɛi aná hemɔkɛyeli yɛ Biblia lɛ mli!