He-kɛ-afɔleshaa Su Haa Anáa Jɔɔmɔi
1. Yehowa jɔɔ David kɛ Nehemia yɛ amɛhe ni amɛkɛ ha kɛha nitsumɔ lɛ yɛ mɛɛ gbɛ nɔ?
1 Beni Goliat bɔ Israel tabilɔi lɛ ahora lɛ, kulɛ esa akɛ asraafoi lɛ ateŋ mɔ ko kɛ ehe aha koni ekɛ lɛ awu, shi amɛfeee nakai. Shi oblanyo fioo ko ni ji tookwɛlɔ, ní atsɔko lɛ bɔ ni awuɔ ta ahaa lɛ moŋ ji mɔ ni kɛ ehe ha. (1 Sam. 17:32) Beni Yudafoi lɛ ku amɛsɛɛ kɛjɛ nomŋɔɔ mli kɛtee Yerusalem lɛ, amɛyatswaaa maŋ lɛ gbogboi lɛ amɛmaaa shi, shi Persia maŋtsɛ lɛ dãawolɔ ko moŋ kɛ ehe ha ni eshi hegbɛ kpele ni eyɔɔ yɛ maŋtsɛ we lɛ ni efa gbɛ kɛtee Yerusalem koni eyato nitsumɔ lɛ he gbɛjianɔ. (Neh. 2:5) Yehowa jɔɔ hii enyɔ nɛɛ, ni ji David kɛ Nehemia yɛ su ni amɛjie lɛ kpo lɛ hewɔ.—1 Sam. 17:45, 50; Neh. 6:15, 16.
2. Mɛni hewɔ esa akɛ Kristofoi ajie he-kɛ-afɔleshaa su kpo?
2 Ŋmɛnɛ lɛ, mɛi bɛ he-kɛ-afɔleshaa su yɛ je lɛŋ. Mɛi bɛ deka kwraa yɛ “naagbee gbii” nɛɛ amli, ni mɛi babaoo ji “hesuɔlɔi.” (2 Tim. 3:1, 2) Ewaaa kwraa akɛ mɔ kɛ ebe fɛɛ aaatsu lɛ diɛŋtsɛ etaomɔ nii ahe nii, ní eku ehi efɔ̃ hegbɛi ni baaha ekɛ ehe aha kɛye abua mɛi ni yelikɛbuamɔ he hiaa amɛ lɛ. Shi ákɛ Kristofoi lɛ, wɔsumɔɔ ni wɔkase Yesu, mɔ ni ŋɔɔ hegbɛ kɛyeɔ ebuaa mɛi krokomɛi lɛ. (Yoh. 5:5-9; 13:12-15; 1 Pet. 2:21) Mɛɛ gbɛ nɔ wɔɔtsɔ wɔjie he-kɛ-afɔleshaa su kpo, ni mɛɛ jɔɔmɔi enɛ baaha wɔná?
3. He ni akɛhaa haa asafoŋ kpeei yeɔ omanye yɛ mɛɛ gbɛ nɔ?
3 Kɛye Abua Wɔnyɛmimɛi Lɛ: Wɔbaanyɛ wɔkɛ “mumɔŋ duromɔ keenii” aha mɛi krokomɛi kɛtsɔ hegbɛ ni wɔɔŋɔ kɛha saji ahetoo yɛ kpeei ashishi nifeemɔi ni abiɔ ni toibolɔi lɛ kɛ amɛhe awo mli lɛ mli. (Rom. 1:11) Sane hetoohamɔ woɔ Yehowa hiɛ nyam, ehaa anɔkwale lɛ hiɔ wɔjwɛŋmɔ kɛ wɔtsui mli daa, ni ehaa wɔnáa kpee lɛ he miishɛɛ. (Lala 26:12) Wɔbaanyɛ wɔkɛ wɔhe aha hu yɛ Teokrase Sɔɔmɔ Skul lɛ mli kɛye mɔ ko najiaŋ kɛ́ ehe bahia. Enɛ baaha wɔhe asa jogbaŋŋ kɛha nitsɔɔmɔ.
4. Mɛɛ gbɛ̀i krokomɛi anɔ wɔbaanyɛ wɔtsɔ wɔjie he-kɛ-afɔleshaa su kpo?
4 Nyɛmimɛi hii baanyɛ ajie he-kɛ-afɔleshaa su kpo kɛtsɔ mɔdɛŋ ni amɛaabɔ koni amɛhe asa kɛha gbɛnaa nii ahe nitsumɔ yɛ asafo lɛ mli lɛ nɔ. (Yes. 32:2; 1 Tim. 3:1) Wɔ fɛɛ wɔbaanyɛ wɔkɛ wɔhe aha kɛha nitsumɔi srɔtoi ni atsuɔ yɛ kpeei bibii kɛ kpeei wuji ashishi lɛ kɛye abua ni kpeei nɛɛ aya nɔ jogbaŋŋ. Kɛ́ wɔkɛ wɔhe ha ni wɔkɛ nɔkwɛlɔ gbɛfalɔ lɛ atsu nii yɛ shiɛmɔ nitsumɔ lɛ mli loo wɔhoo nii wɔha lɛ lɛ, enɛ baaha ‘ashɛje wɔ kɛ lɛ fɛɛ mii.’ (Rom. 1:12) Kɛ́ wɔye wɔbua awusãi, okulafoi, helatsɛmɛi kɛ mɛi ni egbɔjɔ yɛ gbɔmɔtsoŋ, nyɛmɛi ni hiɛ bii bibii, kɛ mɛi krokomɛi ni yɔɔ asafo lɛ mli lɛ kɛtsu amɛhiamɔ nii ahe nii lɛ, ehaa wɔnáa miishɛɛ kɛ Yehowa hiɛ duromɔ.—Abɛi 19:17; Bɔf. 20:35.
5. Mɛɛ nibii ni kɔɔ Maŋtsɛyeli Asa lɛ he ebiɔ ni wɔjɛ wɔsuɔmɔ mli wɔkɛ wɔhe aha kɛha ehe nitsumɔ?
5 Gbɛ kroko ni wɔɔtsɔ nɔ wɔkɛ wɔbe kɛ wɔhewalɛ aha ji ni wɔye wɔbua kɛsaa Maŋtsɛyeli Asa lɛ nɔ. Kɛfata he lɛ, akɛni mɛi babaoo miiba anɔkwale lɛ mli hewɔ lɛ, ehe miihia ni aná Maŋtsɛyeli Asai heei kɛ mɛi ni kɛ amɛhe baaha kɛha Asai nɛɛ amaamɔ. Wu kɛ ŋa ko kɛ amɛhe ha ni amɛye amɛbua Maŋtsɛyeli Asa Tsumaa kuu ni yɔɔ he ni amɛyɔɔ lɛ eyɛ mli akɛ amɛbɛ tsumaa he hesaai ko kwraa moŋ. Be ni be shwie mli lɛ, atsɔse gbalashihilɛ mli hefatalɔi nɛɛ ni amrɔ nɛɛ amɛyeɔ amɛbuaa kɛtswaa ŋtayai. Yoo lɛ kɛɛ akɛ: “Mɛi krokomɛi ni wɔkɛfeɔ ekome kɛtsuɔ nii lɛ eha wɔná nanemɛi pii. Kɛ́ wɔtsu wɔgbi lɛ mli nii wɔgbe naa lɛ, wɔnuɔ he akɛ etɔ wɔ waa shi wɔtsui nyɔɔ wɔmli.”
6. Mɛni hewɔ shiɛmɔ nitsumɔ lɛ ji nitsumɔ ni he hiaa fe fɛɛ ni wɔbaanyɛ wɔkɛ wɔhe aha kɛtsu lɛ?
6 Kɛtsɔ Shiɛmɔ Nɔ: Maŋtsɛyeli shiɛmɔ nitsumɔ lɛ ji nitsumɔ ni he hiaa fe fɛɛ ni wɔbaanyɛ wɔkɛ wɔhe aha kɛtsu. Kɛ́ aye abua mɛi ni amɛnu Biblia lɛ shishi ni amɛkɛ emli ŋaawoi lɛ tsu nii lɛ, ehaa amɛnáa yiŋtoo yɛ shihilɛ mli, kɛ ekãa ni akɛyeɔ sui gbohii anɔ. Amɛkaseɔ wɔsɛɛ be he hiɛnɔkamɔ ni haa mɔ náa miishɛɛ ni Biblia lɛ kɛhaa lɛ. Kɛ́ wɔkɛ mɛi kase Biblia lɛ, no tsɔɔ akɛ wɔkɛ wɔhe eha kɛmiitsu nitsumɔ ko ni yɔɔ miishɛɛ ni baaha mɛi aná naanɔ jɔɔmɔi. (Yoh. 17:3; 1 Tim. 4:16) Ekolɛ wɔshihilɛ baaŋmɛ wɔ gbɛ ni wɔtsu babaoo yɛ shiɛmɔ nitsumɔ lɛ mli kɛtsɔ wɔhe ni wɔkɛaawo gbɛgbalɔi awamɔ loo daa gbɛgbamɔ nitsumɔ lɛ mli, hei ni shiɛlɔi ahe hiaa waa yɛ ni wɔɔfã kɛya loo wiemɔ kroko ni wɔɔkase lɛ nɔ.
7. Mɛni hewɔ he-kɛ-afɔleshaa su he hiaa waa ŋmɛnɛ lɛ?
7 Maŋtsɛ David gba akɛ kɛ́ Mesia lɛ bɔi nɔyeli lɛ, Nyɔŋmɔ webii lɛ ‘aaaba yɛ amɛsuɔmɔ naa.’ (Lala 110:3) Akɛni Yehowa miiha mɛi ni esa akɛ amɛbafata ewebii lɛ ahe lɛ miiba esafo lɛ mli oyayaayai hewɔ lɛ, nitsumɔ babaoo yɛ ni wɔbaanyɛ wɔkɛ wɔhe aha kɛtsu. (Yes. 60:22) Ani okɛɛ akɛ: “Naa mi, tsũ mi!”? (Yes. 6:8) Yɛ anɔkwale mli lɛ, kɛ wɔjie he-kɛ-afɔleshaa su kpo lɛ, wɔbaasa Yehowa hiɛ ni wɔbaana jɔɔmɔi babaoo.