Beni Wɔyanaaa Mɛi yɛ Shĩa
1. Mɛɛ naagba wɔkɛfɔɔ kpee yɛ shĩa kɛ shĩa shiɛmɔ nitsumɔ lɛ mli?
1 Yɛ hei pii lɛ, ewa akɛ aaana mɛi yɛ shĩa, ni enɛ miiya nɔ eewo wu. Yɛ “jaramɔ bei” nɛɛ amli lɛ, mɛi babaoo kɛ be babaoo tsuɔ nii koni amɛná amɛdaaŋ ŋmaa kɛkɛ. (2 Tim. 3:1) Ekolɛ mɛi komɛi shiɔ shĩa koni amɛyahe nii loo amɛyajie amɛhiɛtserɛ. Mɛɛ gbɛ nɔ wɔɔtsɔ wɔshiɛ sanekpakpa lɛ wɔha mɛi nɛɛ?
2. Mɛɛ gbɛ nɔ wɔɔtsɔ wɔkwɛ koni nine ashɛ mɛi ni wɔyanaaa amɛ yɛ shĩa lɛ anɔ?
2 Ŋmalamɔ Amɛhe Saji Oshwie Shi Jogbaŋŋ: Nɔ klɛŋklɛŋ ni esa akɛ ofee ji ni oŋmala na ni oyanaaa mɔ lɛ yɛ shĩa lɛ he saji oshwie shi. Enɛ he bahiaa waa kɛ́ ofɔɔ oshikpɔŋkuku lɛ mli nitsumɔ. Ani oŋmaa gbɛjegbɛ lɛ gbɛi, shikpɔŋkuku lɛ nɔmba, ogbɛi kɛ gbi ni otee jɛmɛ lɛ ofɔɔ shi? Obaanyɛ oshi gbɛ kɛha saji krokomɛi aŋmalamɔ beni bo loo shiɛlɔ kroko miiya eyadi mɛi ni bɛ shĩa lɛ asɛɛ. Kɛ́ otsu oshikpɔŋkuku lɛ mli nii ogbe naa lɛ, bɔɔ mɔdɛŋ ni okɛ wolo loo saji ni oŋmala lɛ aha mɔ ni baatsu shikpɔŋkuku lɛ mli nii lɛ, ja lɛ ekɛɛ oyadi mɛi ni bɛ shĩa lɛ asɛɛ. Ŋmalamɔ mɛi ni oyana amɛ ni yɔɔ wiemɔ lɛ he miishɛɛ ni obaaku osɛɛ oyasara amɛ lɛ ahe saji yɛ wolo lɛ ekroko nɔ.
3. Mɛɛ ŋaawoi komɛi kɛ nitsumɔ baaha wɔnine ashɛ mɛi ni bɛ shĩa lɛ anɔ?
3 Kaa Be Kroko Okwɛ: Ekolɛ mɛi ni wɔyanaaa amɛ yɛ shĩa yɛ otsi lɛ mli lɛ ateŋ mɛi komɛi baahi shĩa gbɛkɛ loo otsi lɛ naagbeei. Ani obaanyɛ oto gbɛjianɔ koni oya amɛŋɔɔ yɛ be ni sa mli? (1 Kor. 10:24) Kɛ́ onyɛŋ ofee nakai lɛ, obaanyɛ okɛ mɛi ni bɛ shĩa lɛ aha shiɛlɔ ni baanyɛ aya jɛmɛ yɛ be kroko mli. Kɛ́ jeee nakai lɛ, obaanyɛ oŋma mɛi ni bɛ shĩa lɛ woji loo otswa amɛ tɛlifoŋ. Ekolɛ shiɛlɔi ni hela haaa amɛnyɛ amɛtsu shĩa kɛ shĩa shiɛmɔ nitsumɔ lɛ babaoo lɛ baaná he miishɛɛ akɛ amɛaaye abua bo kɛfee enɛ.
4. Mɛɛ niiashikpamɔ maa bɔ ni ehe hiaa akɛ adi mɛi ni bɛ shĩa lɛ asɛɛ lɛ nɔ mi?
4 Niiashikpamɔ ni nyiɛ sɛɛ nɛɛ maa bɔ ni ehe hiaa akɛ abɔ mɔdɛŋ ni adi mɛi ni bɛ shĩa lɛ asɛɛ lɛ nɔ mi. Shiɛlɔi komɛi kɛ afii etɛ tee nɔ amɛyadi mɔ ko sɛɛ yɛ shĩa ko mli, ni naagbee lɛ amɛyana mɔ lɛ. Yɛ nɛkɛ bei nɛɛ fɛɛ mli lɛ, asomoaŋ eetao koni Odasefonyo ko aba ni ekɛ lɛ abatsa Biblia mli nikasemɔ ni akɛ lɛ feɔ dani efã kɛbahi nakai akutso lɛ mli lɛ nɔ.
5. Mɛɛ be abaanyɛ akɛɛ akɛ atsu shikpɔŋkuku ko mli nii agbe naa?
5 Tsu Oshikpɔŋkuku lɛ Mli Nii Kɛgbe Naa: Mɛɛ be abaanyɛ akɛɛ akɛ atsu shikpɔŋkuku ko mli nii agbe naa? Bei pii lɛ, kɛ́ abɔ mɔdɛŋ jogbaŋŋ ni ashiɛ aha mɔ ko yɛ shĩa fɛɛ shĩa mli lɛ, abaanyɛ akɛɛ akɛ atsu shikpɔŋkuku lɛ mli nii agbe naa. Ekolɛ ebaahi ákɛ akɛ hiɛshikamɔ aaashi dɛhiɛmɔ wolo ko loo wolo tɛtrɛɛ momo ko yɛ shiai ni ayaninaaa mɛi yɛ jɛmɛ lɛ amli, titri lɛ yɛ shikpɔŋkukuji ni afɔɔɔ mli nitsumɔ lɛ mli. Esa ákɛ akɛ nyɔji ejwɛ atsu shikpɔŋkuku lɛ mli nii agbe naa. Kɛ́ agbe emli nitsumɔ naa lɛ, esa akɛ awo sɔɔlɔ ni kwɛɔ shikpɔŋkuku lɛ nɔ lɛ toi nɔ amrɔ nɔŋŋ koni eŋma he sane ewo ewoji amli.
6. Mɛni hewɔ esa akɛ wɔbɔ mɔdɛŋ ni wɔshiɛ sanekpakpa lɛ wɔha mɛi fɛɛ ni yɔɔ wɔshikpɔŋkuku lɛ mli lɛ?
6 Wɔmiisumɔ ni mɛi babaoo ni wɔnine baanyɛ ashɛ amɛnɔ lɛ aná hegbɛ kɛkase Yehowa he nii ni amɛtsɛ egbɛi lɛ koni ahere amɛyiwala. (Rom. 10:13, 14) Mɛi ni kɛ́ wɔtee amɛshĩa lɛ wɔyaninaaa amɛ lɛ hu fata he. Taakɛ bɔfo Paulo fee lɛ, tswaa ofai shi ‘akɛ obaaye Nyɔŋmɔ duromɔ sanekpakpa lɛ he odase kɛmɔ shi.’—Bɔf. 20:24.