Mɛni Hewɔ Esa akɛ Okadi Mɛi ni Bɛ Shia Lɛ?

¹ Odasefoi ni ji gbalashihilɛ mli hefatalɔi tee shiɛmɔ leebi maŋkpa. Yɛ sɛɛ mli lɛ amɛku amɛsɛɛ kɛtee mɛi ni bɛ shiai amli ni yɔɔ nakai shikpɔŋkuku lɛ mli lɛ aŋɔɔ nakai gbi lɛ. Nuu ko tsɛ amɛ kɛba ni ebo amɛ toi jogbaŋŋ. Ehe Obaanyɛ Ohi Shi wolo lɛ eko ni ebi kɛji Odasefoi lɛ baaba ekoŋŋ. No mli lɛ ekɛ Yehowa Odasefoi ewieko pɛŋ ni eyɛ sanebimɔi ni eesumɔ ni aha hetoo; aje Biblia mli nikasemɔ shishi. Gbalashihilɛ mli hefatalɔi lɛ amli fili amɛ fe nine akɛ amɛna mɔ ni tamɔ gwantɛŋ lɛ. Ani obaasumɔ ni ona niiashikpamɔ ni tamɔ nakai? Ni oookadi mɛi ni bɛ shia jogbaŋŋ ni oya amɛŋɔɔ mra ekoŋŋ lɛ baanyɛ aha ofee nakai.

² Awoɔ wɔ hewalɛ nɔtonɔto koni wɔkadi mɛi ni bɛ shiai amli lɛ jogbaŋŋ ni wɔya amɛŋɔɔ mra ekoŋŋ. Taakɛ niiashikpamɔ ni yɔɔ yiteŋgbɛ lɛ tsɔɔ lɛ, ni oooyasara lɛ ekoŋŋ nakai gbi lɛ nɔ nɔŋŋ lɛ baanyɛ awo yibii kpakpai babaoo. Yɛ be mli ni wɔkɛmaa wɔhiɛ akɛ wɔɔtsu shikpɔŋkuku ni akɛha wɔ lɛ mli nii lɛ, ekolɛ wɔfeŋ ekãa yɛ mɛi ni bɛ shiai amli lɛ akadimɔ mli nakai. Mɛi komɛi kɛɔ akɛ: ‘Wɔtsuɔ wɔ shikpɔŋkuku lɛ mli nii daa otsii enyɔ loo etɛ; ehe ehiaaa ni wɔkadi nii ni tamɔ nɛkɛ ejaakɛ etsɛŋ kwraa moŋ ni wɔbaaba ekoŋŋ.’ Shi no po haa wɔnaa yiŋtoo babaoo hewɔ ni esa akɛ wɔkadi enɛ. Yɛ hei ni atsuɔ shikpɔŋkuku lɛ mli nii waa lɛ, mɛi ni bɛ shiai amli lɛ ni wɔɔdi amɛ sɛɛ lɛ haa wɔnyɛɔ wɔtaoɔ mɛi ni sa lɛ jogbaŋŋ kɛmɔɔ shi. Yɛ mɛɛ gbɛ nɔ?

³ Yɛ hei pii lɛ, akutsoŋ bii ni fa fe oha fɛɛ mli 50 bɛ shia shwane. No hewɔ lɛ, wɔfeɔ enɛ kɛnaa shikpɔŋkukuji babaoo kɛtsɔɔ mɛi ni bɛ shia ni wɔyaa amɛŋɔɔ lɛ nɔ. Kɛ afɔɔɔ shikpɔŋkuku lɛ mli nitsumɔ po lɛ, wɔbaanyɛ wɔwo yibii babaoo kɛya hiɛ kɛ abɔ mɔdɛŋ ni nine shɛ mɔ fɛɛ mɔ nɔ dani eba akɛ wɔɔkadi nakai shikpɔŋkuku lɛ akɛ atsu emli nii lɛ agbe naa.

⁴ Bei pii lɛ abaanyɛ ato gbi kroko he gbɛjianɔ kɛha mɛi ni bɛ shiai amli lɛ aŋɔɔyaa, kɛ eeehi lɛ yɛ otsi lɛ mli. Mɛi pii naa akɛ ehi moŋ akɛ aaaku sɛɛ aya gbi kroko yɛ be kroko ni tamɔɔɔ be ni atee jɛmɛ klɛŋklɛŋ lɛ nɔ. Ekolɛ obaasumɔ ni okɛ be ko atsu nii Hɔɔ loo Hɔgbaa koni odi mɛi ni bɛ shiai amli ni okadi yɛ otsi lɛ mli lɛ asɛɛ. Agbɛnɛ hu lɛ, asafoi babaoo ena akɛ saramɔi ni tamɔ nɛkɛ ni afeɔ mra dani je naa lɛ ewo yibii. Amɛbaanyɛ amɛna mɛi ni yɔɔ shia lɛ mli lɛ ateŋ mɛi ni fa fe amɛyifalɛ lɛ fã.

⁵ Esa akɛ oto sɛɛsaramɔi anaa oshwie shi yɛ bo diɛŋtsɛ owoji amli. Kɛ onyɛɛɛ oku osɛɛ oya he ni mɔ ko bɛ shia lɛ mli lɛ, no lɛ esa akɛ okɛ mɛi ni bɛ shiai amli lɛ ni okadi amɛ lɛ aha nyɛmi ni kwɛɔ kuu lɛ nɔ lɛ, koni kuu kroko ni baaya nakai shikpɔŋkuku lɛ mli lɛ kɛtsu nii.

⁶ Kɛ wɔsusu wɔ shiɛmɔ nitsumɔ lɛ fa nɛɛ he jogbaŋŋ lɛ ebaanyɛ eha wɔwo yibii babaoo ni wɔmiishɛɛ lɛ afa hu. Ebaanyɛ eha wɔ nine ashɛ tsui ni nyɔɔ mɔ mli ni baa kɛjɛɔ le ni wɔleɔ akɛ wɔtaoɔ mɛi ni tamɔ gwantɛŋi lɛ jogbaŋŋ kɛmɔɔ shi ni akɛ wɔsusuɔ amɛhe lɛ nɔ.—Ezek. 34:11-14.