Nyɛjáa Yehowa akɛ Weku
1 Yɛ Biblia beaŋ lɛ, weku mli bii feɔ ekome kɛtsuɔ nitsumɔi babaoo. Amɛfeɔ ekome kɛtsuɔ shĩa nitsumɔi daa gbi, ni titri lɛ amɛfeɔ ekome kɛjáa Yehowa. (3 Mose 10:12-14; 5 Mose 31:12) Ŋmɛnɛ, yɛ hei babaoo lɛ, nibii fioo komɛi pɛ weku mli bii feɔ ekome kɛtsuɔ. Shi kɛlɛ, Kristofoi naa sɛɛnamɔ ni yɔɔ ekome ni afeɔ kɛtsuɔ nii akɛ weku lɛ he, titri lɛ ekome ni afeɔ kɛjáa Yehowa lɛ. Kɛ́ weku Shishitolɔ lɛ na akɛ wekui efee ekome kɛmiijá lɛ lɛ, enáa he miishɛɛ waa!
2 Nyɛfea Ekome Kɛshiɛa: Ekome ní weku lɛ mli bii lɛ aaafee kɛshiɛ sanekpakpa lɛ haa ekomefeemɔ ni yɔɔ amɛteŋ lɛ mli waa. No hewɔ lɛ, eyɛ mli akɛ esa akɛ asafoŋ onukpa afata shiɛlɔi krokomɛi ni yɔɔ asafo lɛ mli lɛ ahe kɛya shiɛmɔ moŋ, shi esa akɛ ekɛ eŋa kɛ ebii hu afɔ shiɛmɔyaa. (1 Tim. 3:4, 5) Yɛ dekã ni nɔkwɛlɔi gbɛfalɔi lɛ bɛ fɛɛ sɛɛ po lɛ, amɛtoɔ be ni amɛkɛ amɛŋamɛi yaa shiɛmɔ.
3 Fɔlɔi ni kɛ amɛbii yaa shiɛmɔ lɛ nyɛɔ amɛyeɔ amɛbuaa gbekɛbii lɛ ni amɛyaa amɛhiɛ akɛ sanekpakpa jajelɔi. Jeee akɛ gbekɛbii lɛ baakase miishɛɛ ni amɛfɔlɔi lɛ yɔɔ lɛ kɛkɛ, shi moŋ amɛbaana bɔ ni amɛfɔlɔi lɛ jieɔ suɔmɔ kpo amɛtsɔɔ Yehowa kɛ adesai krokomɛi lɛ hu. (5 Mose 6:5-7) Gbekɛbii lɛ yaa nɔ amɛnáa shiɛmɔ ni amɛfɔlɔi lɛ kɛ amɛyaa lɛ he sɛɛ beni amɛdaraa lɛ. Gbalashihilɛ mli hefatalɔi komɛi ni yɔɔ bihii ni amɛye afii 15, afii 18, kɛ afii 21 lɛ kã he amɛkɛ amɛbii lɛ fɔɔ shiɛmɔyaa. Tsɛ lɛ kɛɛ akɛ: “Be fɛɛ be ni wɔkɛ amɛ baaya shiɛmɔ lɛ, wɔhaa amɛkaseɔ nɔ ko kɛjɛɔ wɔŋɔɔ. Ni wɔhaa shiɛmɔ nitsumɔ lɛ feɔ nɔ ni yɔɔ miishɛɛ ni woɔ amɛ hewalɛ.”
4 Nyɛfea Ekome Kɛsaa Nyɛhe: Kɛ́ wekui fee ekome kɛsaa amɛhe kɛha shiɛmɔyaa lɛ, amɛnaa akɛ ehe yɛ sɛɛnamɔ waa. Kɛ́ weku mli bii lɛ to naa ni amɛfee shiɛmɔ wiemɔi ahe nɔkwɛmɔnɔ lɛ, gbekɛbii lɛ náa he miishɛɛ waa. Wekui komɛi kɛ minitii fioo ko feɔ enɛ kɛ́ amɛgbe amɛweku nikasemɔ naa.
5 Wɔnáa miishɛɛ waa kɛ́ wɔkɛ mɛi ni wɔsumɔɔ amɛ lɛ fee ekome kɛtsu nitsumɔi ni he hiaa ní haa mɔ tsui nyɔɔ emli. Kwɛ bɔ ni eyɔɔ miishɛɛ akɛ wekui aaafee ekome kɛshiɛ yɛ shĩa kɛ shĩa, ní amɛfee sɛɛkuu-kɛsaramɔi kɛ Biblia mli nikasemɔi! No hewɔ lɛ, kɛ́ okɛ oweku lɛ fee ekome kɛjá Yehowa lɛ, obaanyɛ okɛ miishɛɛ ajaje akɛ: “Mi lɛ, mikɛ miwe lɛ, wɔɔsɔmɔ Yehowa!”—Yosh. 24:15.