Gbi Kome Kpee Krɛdɛɛ He Gbɛjianɔtoo Hee

Afi 2008 sɔɔmɔ afi lɛ gbi kome kpee krɛdɛɛ lɛ yitso ji ‘Wɔ lɛ, Sũ Ji Wɔ—Yehowa Ji Wɔshɔ̃lɔ,’ ni edamɔ Yesaia 64:7 lɛ nɔ. Ŋmalɛ naa ŋaawoo ni wɔnine baashɛ nɔ yɛ kpee nɛɛ shishi lɛ baaha hiɛsɔɔ ni wɔyɔɔ kɛha Yehowa nilee, jalɛsaneyeli, hewalɛ, kɛ suɔmɔ ákɛ Gbɛshɔ̃lɔ Kpeteŋkpele lɛ aya hiɛ.

Wiemɔ ni kpokpaa nɔkwɛlɔ lɛ baaha ni yitso ji “Ní Wɔɔsɔmɔ akɛ Sũ Nii ni Hiɛ Yɔɔ Nyam yɛ Sɔɔmɔ Nitsumɔ lɛ Mli” lɛ baatsɔɔ bɔ ni mɛi babaoo miiná jɔɔmɔi babaoo yɛ anɔkwale lɛ ni amɛkase ni amɛkɛ mɛi krokomɛi miigba he sane hu lɛ hewɔ. Wiemɔ ni ji “Sane Nɔjwɛŋmɔ Baabu Ohe” lɛ baaha wɔna bɔ ni hiɛdɔɔ ni wɔkɛjwɛŋɔ Yehowa jalɛ shishitoo mlai lɛ anɔ lɛ buɔ wɔhe ehaa. Wiemɔi ni saralɔ ni baaba lɛ baaha lɛ yitsei ji “‘Nyɛjeŋba Akatamɔ Jeŋbii Ajeŋba’” kɛ “Ha Gbɛshɔ̃lɔ Kpeteŋkpele lɛ Ashɔ̃ Bo.” Fɔlɔi kɛ oblahii kɛ oblayei baaná hewalɛwoo kɛjɛ wiemɔi ni ji “Oblahii kɛ Oblayei ni He Yɔɔ Sɛɛnamɔ Kɛha Yehowa” kɛ “Gbɛfaŋnɔ ni He Hiaa Waa ni Fɔlɔi Náa yɛ Amɛbii lɛ Ashɔ̃ɔ Mli” lɛ mli. Wɔbaatsɔ nɔkwɛmɔnii kɛ saji ni abaabibii wɔnyɛmimɛi hii kɛ yei lɛ anɔ wɔnu ni wɔna nɔ ni amɛnyɛɔ amɛtsuɔ yɛ amɛshiɛmɔ nitsumɔ lɛ mli, ni enɛ baaha wɔná miishɛɛ. Esa akɛ mɛi ni baasumɔ ni amɛkɛ nu mli baptisimɔ amã amɛhenɔ ni amɛjɔɔ amɛha Nyɔŋmɔ lɛ nɔ mi lɛ awó onukpai asɛinɔtalɔ lɛ toi nɔ amrɔ nɔŋŋ. Bɔɔ mɔdɛŋ ni okɛ Buu-Mɔɔ ni abaakase yɛ otsi ni abaafee gbi kome kpee krɛdɛɛ lɛ mli lɛ aba.

Nɔ fɛɛ nɔ ni Gbɛshɔ̃lɔ Kpeteŋkpele lɛ toɔ eyiŋ yɛ he lɛ, efeɔ. Shi ekã wɔteŋ mɔ fɛɛ mɔ nɔ akɛ ehala bɔ ni ebaafee enii eha beni Yehowa shɔ̃ɔ lɛ lɛ. Yehowa baanyɛ etsake mɛi ni jɛɔ nilee mli amɛbaa amɛhe shi amɛhaa egbɛtsɔɔmɔi kɛ ejajemɔ lɛ, ní esaa amɛ, ejaje amɛ, ni efee amɛ shɔ̃ɔ nii ni he yɔɔ sɛɛnamɔ tamɔ sũ yɛ gbɛshɔ̃lɔ ni he esa dɛŋ. Kɛ́ wɔŋmɛ gbɛ ni Yehowa shɔ̃ wɔ lɛ, wɔbaaha ana enɔyeli hegbɛ lɛ faŋŋ, ni wɔbaaná jɔɔmɔi babaoo.