Kasemɔ Yesu Nɔkwɛmɔnɔ Lɛ
1. Mɛɛ nɔkwɛmɔnɔ Yesu fee efɔ̃ shi?
1 Kɛ́ wɔkɛ wɔhe wo kaselɔ feemɔ nitsumɔ lɛ mli lɛ, esa akɛ wɔha ehi wɔjwɛŋmɔ mli akɛ nɔkwɛmɔnɔ ni wɔfeɔ lɛ baanyɛ aná mɛi ni naa wɔ lɛ anɔ hewalɛ waa. Yesu tsɔ wiemɔ kɛ nifeemɔ nɔ etsɔɔ mɛi nii. Mɛi ni na lɛ lɛ yɔse ekãa ni ekɛshiɛ, bɔ ni esumɔɔ mɛi, oti ni ekɛma ehiɛ akɛ ebaatse e-Tsɛ lɛ gbɛi he, kɛ bɔ ni etswa efai shi akɛ ebaagbe e-Tsɛ lɛ suɔmɔnaa nifeemɔ naa kwraa kɛmɔ shi lɛ.—1 Pet. 2:21.
2. Mɛɛ gbɛ̀i anɔ nɔkwɛmɔnɔ ni wɔfeɔ lɛ baanyɛ aná mɛi ni wɔkɛ amɛ tsuɔ nii yɛ shiɛmɔ nitsumɔ lɛ mli lɛ anɔ hewalɛ?
2 Beni Oshiɛɔ yɛ Shĩa-kɛ-Shĩa: Taakɛ eji yɛ Yesu gbɛfaŋ lɛ, nɔkwɛmɔnɔ ni wɔfeɔ lɛ náa mɛi ni wɔkɛtsuɔ nii yɛ shiɛmɔ nitsumɔ lɛ mli lɛ anɔ hewalɛ. Kɛ́ shiɛlɔi heei kɛ shiɛlɔi ni he esako tsɔ lɛ na akɛ wɔkɛ wɔhe woɔ shiɛmɔ nitsumɔ lɛ mli kɛ ekãa lɛ, ebaaha amɛsusu bɔ ni amɛkɛ amɛhe woɔ shiɛmɔ nitsumɔ lɛ mli amɛhaa lɛ he. Kɛ́ amɛna miishɛɛ ni wɔyɔɔ kɛ bɔ ni wɔnáa mɛi krokomɛi ahe miishɛɛ lɛ, ebaaha amɛna nɔ hewɔ ni ehe hiaa akɛ amɛhu amɛjie sui ni tamɔ nakai nɔŋŋ kpo yɛ amɛshiɛmɔ nitsumɔ lɛ mli lɛ. Kɛ́ amɛna akɛ wɔbɔɔ mɔdɛŋ ni wɔkɛ Biblia lɛ atsu nii, ni wɔfeɔ sɛɛkuu-kɛsaramɔi kɛ Biblia mli nikasemɔi lɛ, ebaatsirɛ amɛ ni amɛhu amɛfee nakai.
3. Mɛni wɔnɔkwɛmɔnɔ lɛ baanyɛ atsɔɔ wɔ-Biblia kaselɔi lɛ, ni mɛni amɛbaanyɛ amɛkase?
3 Kɛ́ Oofee Biblia Mli Nikasemɔi: Nɔ titri ni wɔ-Biblia mli nikaselɔi lɛ kwɛɔ ji wɔsubaŋ. Ákɛ nɔkwɛmɔnɔ lɛ, eyɛ mli akɛ ekolɛ wɔbaaha amɛle nɔ hewɔ ni ehe hiaa akɛ amɛsaa amɛhe kɛha nikasemɔ lɛ, amɛkane ŋmalɛi ni yɔɔ nikasemɔ lɛ mli lɛ, ni amɛfolɔ saji otii lɛ ashi moŋ, shi amɛ hu amɛbaana kɛji wɔsaa wɔhe loo wɔsako wɔhe kɛha nikasemɔ lɛ. (Rom. 2:21) Kɛ́ wɔyeɔ be ní wɔkɛ amɛ eto kɛha nikasemɔ lɛ nɔ lɛ, amɛkɛ nibii krokomɛi atsumɔ yeŋ be ní wɔkɛ amɛ eto lɛ najiaŋ. Ekã shi faŋŋ akɛ amɛbaayɔse he-kɛ-afɔleshãa mumɔ ni wɔyɔɔ yɛ shiɛmɔ nitsumɔ lɛ mli, kɛ hemɔkɛyeli ni mli wa ni wɔyɔɔ lɛ hu. Ebɛ naakpɛɛ akɛ bei pii lɛ, mɛi ni kaseɔ Yesu nɔkwɛmɔnɔ lɛ jogbaŋŋ lɛ a-Biblia kaselɔi lɛ batsɔmɔɔ shiɛlɔi ni yɔɔ ekãa ni woɔ yibii.
4. Mɛni mɛi krokomɛi kaseɔ kɛjɛɔ nɔkwɛmɔnɔ ni wɔfeɔ yɛ asafoŋ kpeei ashishi lɛ mli?
4 Yɛ Asafoŋ Kpeei Ashishi: Mɛi fɛɛ ni yɔɔ Kristofoi asafo lɛ mli lɛ baanyɛ aha mɛi krokomɛi akase nɔkwɛmɔnɔ ni amɛfeɔ lɛ yɛ asafoŋ kpeei ashishi. Mɛi ni yɔɔ wiemɔ lɛ he miishɛɛ ni baa kpeei lɛ náa nɔkwɛmɔnɔ kpakpa ní amɛyɔseɔ yɛ asafo lɛ mli lɛ he sɛɛ. Amɛbaayɔse miishɛɛ ni yɔɔ nyɛmimɛi lɛ ateŋ lɛ, ekomefeemɔ ni yɔɔ wɔteŋ ákɛ Kristofoi lɛ, kɛ bɔ ni wɔhesaamɔ kɛ atadewoo yɔɔ hiŋmɛi nɔ lɛ. (Lala 133:1) Amɛbaayɔse bɔ ni wɔyaa asafoŋ kpeei daa, kɛ bɔ ni wɔjajeɔ wɔhemɔkɛyeli lɛ yɛ faŋŋ beni wɔyɔɔ kpeei lɛ ashishi lɛ hu. Nuu ko ni tee wɔkpeei lɛ eko lɛ yɔse bɔ ni gbekɛ yoo fioo ko kɛ oyaiyeli gbele ŋmalɛ ni atsɛ́ lɛ yɛ lɛ diɛŋtsɛ e-Biblia lɛ mli, kɛ bɔ ni efee dioo kɛnyiɛ nikanemɔ lɛ sɛɛ lɛ. Gbekɛ yoo fioo lɛ nɔkwɛmɔnɔ lɛ tsirɛ nuu lɛ ni ebi koni akɛ lɛ akase Biblia lɛ.
5. Mɛni hewɔ esaaa akɛ wɔbuɔ sɛɛnamɔ ni yɔɔ nɔkwɛmɔnɔ ni wɔfeɔ lɛ he lɛ akɛ nɔ ko ni he ehiaaa lɛ?
5 Ŋmalɛi lɛ woɔ wɔ hewalɛ koni wɔkase mɛi krokomɛi anɔkwɛmɔ kpakpa lɛ. (Fil. 3:17; Heb. 13:7) No hewɔ lɛ, esa akɛ wɔkai akɛ kɛ́ wɔkase Yesu nɔkwɛmɔnɔ lɛ jogbaŋŋ lɛ, mɛi krokomɛi baana, ni ebaaná amɛnɔ hewalɛ yɛ gbɛ kpakpa nɔ. Enɛ hewɔ lɛ, eba akɛ wɔɔha wiemɔi ni yɔɔ 1 Timoteo 4:16 lɛ aná wɔ nɔ hewalɛ waa akɛ: “Ohiɛ ahi ohe nɔ kɛ tsɔɔmɔ lɛ nɔ.”