Esa akɛ Wɔhiɛ Ekãa ni Wɔyɔɔ Kɛha Sɔɔmɔ Nitsumɔ lɛ Mli
1 Kɛjɛ afi 1992 kɛbaa nɛɛ, daa afi lɛ, Yehowa Odasefoi kɛ ŋmɛlɛtswai ni fa fe akpekpe toi akpe kome tsuɔ nii yɛ jeŋ fɛɛ yɛ Maŋtsɛyeli shiɛmɔ kɛ kaselɔfeemɔ nitsumɔ lɛ mli kɛ ekãa. Kwɛ bɔ ni eyɔɔ miishɛɛ akɛ wɔná nitsumɔ kpele nɛɛ mli gbɛfaŋnɔ fioo!—Mat. 28:19, 20.
2 Shi kɛlɛ, Yehowa, ni ji mɔ ni waje wɔ yɛ wɔsɔɔmɔ nitsumɔ lɛ mli yɛ “jaramɔ bei” nɛɛ mli lɛ ji mɔ ni sa ákɛ akɛ shidaa kɛ yijiemɔ fɛɛ aha. (2 Tim. 3:1) Mɛni esa akɛ wɔfee koni wɔnyɛ wɔya nɔ wɔkɛ ekãa atsu nitsumɔ ni he hiaa nɛɛ?
3 Nɔ ni Baaha Wɔná Ekãa: Suɔmɔ ni mli wa ni wɔyɔɔ kɛha Nyɔŋmɔ kɛ wɔnaanyo gbɔmɔ, kɛ shwelɛ ni wɔyɔɔ akɛ wɔbaahi shi yɛ wɔhenɔjɔɔmɔ lɛ naa lɛ haa wɔkɛ ekãa tsuɔ wɔ-Maŋtsɛyeli sɔɔmɔ nitsumɔ lɛ. (Mat. 22:37-39; 1 Yoh. 5:3) Suɔmɔ tsirɛɔ wɔ koni wɔkɛ wɔnibii ashã afɔle bɔni afee ni wɔnyɛ wɔkɛ wɔhe awo shiɛmɔ nitsumɔ lɛ mli kɛmɔ shi.—Luka 9:23.
4 Bɔɔ Mɔdɛŋ ni Ohiɛ Ekãa ní Oyɔɔ lɛ Mli: Wɔhenyɛlɔ Abonsam miibɔ mɔdɛŋ fɛɛ ni eeenyɛ koni eha ekãa ni wɔyɔɔ kɛha sɔɔmɔ nitsumɔ lɛ aba shi. Bɔ ni mɛi ni yɔɔ wɔshikpɔŋkuku lɛ mli lɛ booo wɔ toi, nibii ni yɔɔ je lɛ mli ni gbalaa wɔjwɛŋmɔ, daa gbi shihilɛ he naagbai, kɛ bɔ ni wɔsusuɔ wɔ diɛŋtsɛ wɔgbɔmɔtsoŋ hewalɛnamɔ ni baa shi lɛ he lɛ ji nibii ni ekɛtsuɔ nii koni ekɛje wɔnijiaŋ wui lɛ ateŋ fioo komɛi.
5 No hewɔ lɛ, esa akɛ wɔbɔ mɔdɛŋ waa koni wɔhiɛ ekãa ni wɔyɔɔ lɛ mli kpɛŋŋ. Ehe miihia ni wɔhiɛ ‘wɔ klɛŋklɛŋ suɔmɔ’ lɛ mli. Enɛ biɔ ni wɔkane Nyɔŋmɔ Wiemɔ, ni ji Biblia lɛ daa ni wɔjwɛŋ nɔ, ní wɔkɛ nibii fɛɛ ni Yehowa kɛhaa wɔ kɛtsɔ “tsulɔ anɔkwafo kɛ nilelɔ” lɛ nɔ lɛ atsu nii.—Kpoj. 2:4; Mat. 24:45; Lala 119:97.
6 Taakɛ Biblia gbalɛi tsɔɔ faŋŋ lɛ, gbi ni Yehowa kɛbaakpata efɔŋfeelɔi ahiɛ lɛ miibɛŋkɛ oyayaayai. (2 Pet. 2:3; 3:10) Akɛni enɛ yɛ wɔjwɛŋmɔ mli hewɔ lɛ, nyɛhaa wɔbɔa mɔdɛŋ akɛ wɔbaahiɛ ekãa ni wɔyɔɔ kɛha sɔɔmɔ nitsumɔ lɛ mli, ní wɔkɛ wɔhe awo Maŋtsɛyeli shiɛmɔ kɛ kaselɔfeemɔ nitsumɔ ni miiya nɔ amrɔ nɛɛ mli kɛmɔ shi!