Ani Obaakase Yehowa kɛ Yesu Hiɛdɔɔ lɛ yɛ Kaimɔ Be Nɛɛ Mli?

1. Mɛni Yehowa Odasefoi bɔɔ mɔdɛŋ akɛ amɛbaafee yɛ Kaimɔ be lɛ mli?

¹ Yehowa kɛ hiɛdɔɔ tsuɔ eyiŋtoo he nii. Be ni ŋmalɛ lɛ wieɔ jɔɔmɔi ni Nyɔŋmɔ Maŋtsɛyeli lɛ kɛbaaba lɛ ekomɛi ahe lɛ, Yesaia 9:6 lɛ kɛɛ akɛ: “Yehowa Zebaot hiɛdɔɔ lɛ aaafee enɛ.” Nakai nɔŋŋ be ni Nyɔŋmɔ Bi lɛ tsuɔ eshikpɔŋ lɛ nɔ sɔɔmɔ nitsumɔ lɛ, ana faŋŋ akɛ ehiɛ dɔɔ anɔkwa jamɔ he. (Yoh. 2:13-17; 4:34) Daa afi yɛ Kaimɔ be lɛ mli lɛ, shiɛlɔi akpekpei abɔ bɔɔ mɔdɛŋ amɛkaseɔ Yehowa kɛ Yesu hiɛdɔɔ lɛ kɛtsɔ amɛshiɛmɔ nitsumɔ lɛ mli ni amɛlɛɔ lɛ nɔ. Ani bo hu obaafee nakai?

2. Kɛjɛ March 7 kɛyaa lɛ, mɛni hiɛdɔɔ ni wɔkɛshiɛɔ lɛ baakanya wɔ ni wɔfee?

² Kaimɔ lɛ He Tafãa: Afi nɛɛ, abaaje ninefɔ̃ɔ kɛhã Kaimɔ lɛ shishi Hɔɔ, March 7. Too gbɛjianɔ amrɔ nɛɛ koni onyɛ okɛ hiɛdɔɔ ashiɛ. Asafoi lɛ amli baayi kɛ miishɛɛ be ni amɛkɛ ekãa tsuɔ amɛshikpɔŋkuku lɛ fɛɛ mli nii bɔ ni amɛaanyɛ lɛ. Bɔɔ mɔdɛŋ fɛɛ ni ooonyɛ koni ofɔ̃ mɛi ni okɛkaseɔ Biblia lɛ, mɛi ni oyasaraa yɛ shiɛmɔ nitsumɔ lɛ mli, onanemɛi nitsulɔi loo skulbii lɛ nine, kɛtsɔ ninefɔ̃ɔ wolo ni obaahã amɛ loo kɛtsɔ jw.org/gaa lɛ nɔ.

3. Mɛɛ gbɛ nɔ wɔbaanyɛ wɔlɛɛ wɔsɔɔmɔ lɛ mli yɛ March kɛ April mli?

³ Gbɛgbalɔi Awamɔ Nitsumɔ Lɛ: Hiɛdɔɔ baatsirɛ wɔ ni wɔlɛɛ wɔsɔɔmɔ nitsumɔ lɛ mli hu. Ŋwanejee ko bɛ he akɛ mɛi pii baaná hegbɛ ní amɛkɛ amɛhe awo gbɛgbalɔi awamɔ nitsumɔ lɛ mli yɛ March kɛ April mli, akɛni wɔbaanyɛ wɔhala akɛ wɔkɛ ŋmɛlɛtswai 30 baatsu lɛ hewɔ. Nyɛkɛ sɔlemɔ asusua bɔ ni nyɛbaanyɛ nyɛfee enɛ lɛ he be ni nyɛfeɔ weku jamɔ loo be ni ofeɔ aŋkro nikasemɔ lɛ. (Abɛi 15:22) Hiɛdɔɔ ni okɛaashiɛ yɛ tafãa be nɛɛ mli lɛ baatsirɛ mɛi krokomɛi ni amɛ hu amɛfee nakai. Kɛ́ oto obe he gbɛjianɔ koni onyɛ olɛɛ osɔɔmɔ lɛ mli lɛ, etsɔɔ akɛ ookase Yesu hiɛdɔɔ lɛ.​—Mar. 6:31-34.

4. Kɛ́ wɔkase Yehowa kɛ Yesu hiɛdɔɔ lɛ, mɛni baajɛ mli kɛba?

⁴ Kɛ́ wɔkase Yehowa kɛ Yesu hiɛdɔɔ lɛ yɛ Kaimɔ be nɛɛ mli lɛ, wɔbaaná jɔɔmɔi babaoo. Wɔbaaye mɛi ni yɔɔ wɔshikpɔŋkuku lɛ mli lɛ babaoo odase. Yehowa sɔɔmɔ kɛ yelikɛbuamɔ ni akɛhãa mɛi krokomɛi lɛ kɛ miishɛɛ baa, ni wɔbaaná miishɛɛ nɛɛ eko. (Bɔf. 20:35) Nɔ ni fe fɛɛ lɛ, wɔ-Nyɔŋmɔ ni kɛ hiɛdɔɔ tsuɔ nii lɛ kɛ e-Bi lɛ baakpɛlɛ wɔnɔ.