Mɛɛ Gbɛ nɔ Wɔbaanyɛ Wɔtsɔ Wɔye Wɔbua Mɛi ni Baaba Kaimɔ Lɛ?
1. Mɛɛ odaseyeli kple ko akɛbaaha yɛ March 22, afi 2008?
1 Yɛ March 22, afi 2008 lɛ, mɛi akpekpei abɔ anine baashɛ odaseyeli kple ko nɔ yɛ je lɛŋ fɛɛ. Mɛi ni baaba Kaimɔ lɛ baanu suɔmɔ kple ni Yehowa jie lɛ kpo etsɔɔ adesai kɛtsɔ kpɔ̃mɔ afɔleshaa lɛ nɔ lɛ he saji. (Yoh. 3:16) Amɛbaakase nibii ni kɔɔ Maŋtsɛyeli lɛ kɛ gbɛ ni Yehowa baatsɔ nɔ eha eyiŋtoo kɛha shikpɔŋ lɛ aba mli lɛ he nii. (Mat. 6:9, 10) Amɛ diɛŋtsɛ amɛbaana suɔmɔ kɛ ekomefeemɔ ni yɔɔ Nyɔŋmɔ webii lɛ ateŋ lɛ, ni amɛbaaná wɔgbɔfeemɔ lɛ he sɛɛ.—Lala 133:1.
2. Te wɔɔfee tɛŋŋ wɔye wɔbua Biblia kaselɔi ni ba kamɔi lɛ?
2 Biblia Kaselɔi: Mɛi ni baaba lɛ ateŋ mɛi komɛi yɛ ni kpaako akɛ amɛ eje Biblia lɛ kasemɔ shishi. Okɛ amɛ aŋá nyɛmimɛi lɛ. Gbálamɔ nikasemɔi ni afeɔ yɛ otsi lɛ mli lɛ amli otsɔɔ amɛ, ni okɛ amɛ ashara shi yɛ Maŋtsɛyeli Asa lɛ nɔ kɛ ehewɔ fɛɛ. Beni wielɔ lɛ haa wiemɔ lɛ, ebaawo mɛi ni tamɔ nɛkɛ lɛ hewalɛ koni amɛya nɔ amɛha wekukpaa ni kã amɛkɛ Yehowa teŋ lɛ mli awa. Obaanyɛ okɛ saji ni wielɔ lɛ kɛtsu nii lɛ awo o-Biblia kaselɔ lɛ hewalɛ.
3. Mɛni abaanyɛ afee ni akɛye abua shiɛlɔi ni ekpa shiɛmɔyaa ni ba Kaimɔ lɛ?
3 Mɛi ni Ekpa Shiɛmɔyaa: Ekolɛ mɛikomɛi ni ekpa shiɛmɔyaa lɛ baaba kaimɔ lɛ shishi. Ŋɔɔ hegbɛ lɛ ni ojɛ suɔmɔ mli oŋa amɛ. Okɛ sanebimɔi loo wiemɔi ni baawo amɛ hiɛgbele akatsu nii. Kaimɔ lɛ sɛɛ gbii fioo lɛ, esa akɛ onukpai lɛ ayasara shiɛlɔi ni ekpa shiɛmɔyaa ni ba kaimɔ lɛ, koni amɛjie nɛkɛ mɛi nɛɛ ayi yɛ mɔdɛŋ ni amɛbɔ kɛba Kaimɔ lɛ, ni amɛkɛ miishɛɛ afɔ̃ amɛ nine kɛha asafoŋ nikasemɔ ni baanyiɛ sɛɛ lɛ.
4. Mɛɛ gbɛ nɔ wɔteŋ mɔ fɛɛ mɔ baanyɛ atsɔ eye ebua gbɔi ni baaba Kaimɔ lɛ?
4 Gbɔi: Wɔnanemɛi kɛ wɔweku mlibii ni wɔfɔ̃ amɛ nine lɛ ekomɛi fata mɛi ni baaba Kaimɔ lɛ shishi lɛ ahe. Mɛi ni nine shɛ ninefɔɔ wolo lɛ eko nɔ lɛ hu ateŋ mɛi komɛi baaba. Kɛ́ ona mɛi komɛi ni olé amɛ lɛ, ŋɔɔ hegbɛ ni ojie ohe shi otsɔɔ amɛ ni ohere amɛ hiɛmɛɛ. Eeenyɛ efee akɛ amɛbako wɔkpee lɛ eko da. Yɛ okɛ amɛ sanegbaa mli lɛ, obaanyɛ oha amɛtsɔɔ bo bɔ ni obaafee ni onine ashɛ amɛnɔ. Ekolɛ kɛtsɔ saramɔ ni obaayasara amɛ loo be kukuoo ni okɛaatswa amɛ telifon yɛ Kaimɔ lɛ sɛɛ gbii fioo ko lɛ nɔ lɛ, obaanyɛ owo amɛ hewalɛ ni amɛyanɔ amɛkase nii ni okɛ amɛ abɔ̃i Biblia mli nikasemɔ feemɔ.
5. Mɛni wɔbaanyɛ wɔwie kɛje Biblia mli nikasemɔ shishi?
5 Obaanyɛ okɛ saji ni yɔɔ wiemɔ ni aha yɛ Kaimɔ lɛ shishi lɛ mli lɛ atsu nii ni okɛjie Biblia lɛ Tsɔɔ wolo lɛ yi yɛ sɛɛkuu kɛ saramɔ feemɔ mli. Ákɛ nɔkwɛmɔnɔ lɛ, mɔ ni baaha Kaimɔ lɛ he wiemɔ lɛ baakane Yesaia 65:21-23. Kɛ́ oku osɛɛ oyasara mɔ lɛ, obaanyɛ otsɛ wiemɔ ni aha lɛ yisɛɛ, koni okɛɛ akɛ: “Ha matsɔɔ bo jɔɔmɔi krokomɛi ni kpɔ̃mɔnɔ lɛ haa wɔnine shɛɔ nɔ.” No sɛɛ lɛ okɛ lɛ asusu Biblia lɛ Tsɔɔ wolo lɛ baafa 4-5 lɛ he. Aloo obaanyɛ okɛɛ akɛ: “Mɛi babaoo leee be pɔtɛɛ ni Yesaia gbalɛ nɛɛ baaná emlibaa.” No sɛɛ lɛ, okɛ lɛ asusu kuku 1-3 ni yɔɔ yitso 9 lɛ mli lɛ he. Gbɛ kroko ni obaanyɛ otsɔ nɔ ofee enɛ ji ni otsɛ Kaimɔ lɛ he wiemɔ ni aha lɛ eko yisɛɛ, ni ojie Biblia lɛ Tsɔɔ wolo lɛ otsɔɔ lɛ, no sɛɛ lɛ feemɔ bɔ ni akaseɔ wolo lɛ he nɔkwɛmɔnɔ otsɔɔ lɛ.
6. Beni wɔyeɔ Yesu famɔ akɛ akai egbele lɛ nɔ lɛ, mɛɛ hegbɛi wɔnáa?
6 Eba akɛ wɔteŋ mɔ fɛɛ mɔ baaŋɔ hegbɛ fɛɛ ni eeená lɛ koni ekɛye ebua Biblia kaselɔi, mɛi ni ekpa shiɛmɔyaa, kɛ gbɔi krokomɛi ni baaba Kaimɔ lɛ shishi lɛ. (Luka 22:19) Bɔ fɛɛ bɔ ni fee lɛ, Yehowa baajɔɔ ekãa ni wɔkɛtsuɔ Maŋtsɛyeli nitsumɔ lɛ he nii lɛ nɔ.