Nyɛherea Amɛ Hiɛmɛɛ!

1. Mɛɛ nifeemɔ haa wɔnáa hegbɛ ko ni fe fɛɛ kɛyeɔ odase, ni mɛni hewɔ?

¹ Nifeemɔ ko kwraa bɛ ni haa wɔnáa hegbɛ ni fe fɛɛ kɛyeɔ odase fe daa afi Kaimɔ lɛ yeli. Susumɔ he okwɛ: Afi nɛɛ wɔmiikpa gbɔi ni fa fe akpekpei nyɔŋma gbɛ kɛmiiba Kaimɔ lɛ yeli shishi koni amɛbabo suɔmɔ nifeemɔi enyɔ ni fe fɛɛ, ni atsɔ kpɔmɔnɔ lɛ nɔ ajie kpo lɛ toi. (Yoh. 3:16; 15:13) Yɛ Yehowa nikeenii lɛ hewɔ lɛ, amɛbaale jɔɔmɔi ni yɔɔ kɛha amɛ. (Yes. 65:21-23) Kɛlɛ, jeee wielɔ lɛ pɛ ji mɔ ni baaye odase yɛ nifeemɔ nɛɛ shishi. Mɛi ni eba nifeemɔ lɛ shishi lɛ fɛɛ baaná hegbɛ kɛye odase kpele kɛtsɔ gbɔi lɛ ni amɛaahere amɛ hiɛmɛɛ lɛ nɔ.—Rom. 15:7.

2. Mɛɛ gbɛ nɔ wɔɔtsɔ wɔhere gbɔi lɛ hiɛmɛɛ?

² Yɛ nɔ najiaŋ ni oootao he ni obaata, ni ota shi diŋŋ kɛmɛ ni nifeemɔ lɛ aje shishi lɛ, bɔɔ mɔdɛŋ ni ojie ohe shi otsɔɔ mɛi ni bɛŋkɛ bo lɛ. Ekolɛ hiɛgbele baamɔmɔ gbɔi lɛ ni amɛhiɛ baafee amɛyaa yɛ nɔ ni baaya nɔ lɛ he. Wɔhiɛ ni wɔɔha efee ŋmɔlɔŋmɔlɔ kɛ miishɛɛ ni wɔkɛaaŋa amɛ lɛ baaye abua ni amɛná miishɛɛ ni amɛhiɛ amɛ. Kɛ́ oootao ole akɛ mɔ ko ni eba nifeemɔ lɛ shishi lɛ ba yɛ ninefɔ̃ɔ wolo ni aha lɛ lɛ hewɔ lɛ, obaanyɛ obi lɛ kɛ́ enɛ ji eklɛŋklɛŋ ni ebaa wɔkpeei lɛ eko loo ákɛ ele mɔ ko yɛ asafo lɛ mli. Ekolɛ obaanyɛ ofɔ̃ lɛ nine ni ebata omasɛi ni okɛ lɛ akwɛ o-Biblia kɛ lala wolo lɛ mli. Kɛ́ Maŋtsɛyeli Asa lɛ nɔ ji he ni nyɛfeɔ yɛ lɛ, obaanyɛ okɛ lɛ ashara shi ni otsɔɔ lɛ nibii fioo komɛi yɛ jɛmɛ. Kɛ́ agbe nifeemɔ lɛ naa lɛ, feemɔ klalo akɛ obaaha sanebimɔi ni eyɔɔ lɛ ahetoo. Kɛ́ esa akɛ nyɛsafo lɛ ashi he ni afee Kaimɔ lɛ yɛ lɛ oya nɔŋŋ nyɛha asafo kroko lɛ, obaanyɛ obi akɛ: “Te ona nifeemɔ lɛ tɛŋŋ? Te mafee tɛŋŋ minine ashɛ onɔ lɛ?” No sɛɛ lɛ, too gbɛjianɔ ni okɛ lɛ agba sane be kroko. Esa akɛ onukpai lɛ titri aha amɛhiɛ ahi amɛhe nɔ yɛ shiɛlɔi ni ekpa shiɛmɔyaa ni ba Kaimɔ lɛ anɔ ní amɛwo amɛ hewalɛ.

3. Mɛni hewɔ ehe hiaa ni wɔŋɔ hegbɛ kɛhere gbɔi ni eba Kaimɔ lɛ hiɛmɛɛ lɛ?

³ Kɛha gbɔi lɛ ateŋ mɛi babaoo lɛ, enɛ baafee klɛŋklɛŋ ni amɛbaaná miishɛɛ, toiŋjɔlɛ, kɛ ekomefeemɔ ni yɔɔ mumɔŋ paradeiso ni wɔnáa mli ŋɔɔmɔ akɛ Yehowa webii lɛ mli gbɛfaŋnɔ. (Lala 29:11; Yes. 11:6-9; 65:13, 14) Mɛni gbɔi ni baaba Kaimɔ lɛ baakai be ni amɛshi kɛtee shĩa sɛɛ? Babaoo baadamɔ hegbɛ ni wɔɔŋɔ kɛhere amɛ hiɛmɛɛ lɛ nɔ.